Rusiyadan xaricə səyahət edən sərnişinlərin arasında ən populyar şəhərlər müəyyənləşib. Rusiyanın “tutu.ru” səyahət xidmətinin mütəxəssisləri tərəfindən istifadəçi sifarişlərinin məlumatları təhlil edilərkən məlum olub ki, Rusiyanın paytaxtı Moskvadan İstanbul, Bakı, Daşkənd və Oş şəhərlərinə uçuşlar daha çox maraq doğurur. Bu istiqamətlər birlikdə axtarış sorğularının təxminən 17 faizini təşkil edir.
Xaricə uçanların təxminən üç faizindən bir qədər çoxu İstanbul və Bakıya gedir. Həmçinin səyahətçilər Antalya, Bişkek, Düşənbə, Təl-Əviv və Kişinyovla maraqlanırlar. Analitiklər qeyd edir ki, xaricə aviabiletlərin bronlaşdırılmasının sayı az olaraq qalır. Rusiyanın turoperatorları isə turistlərə səyahət üçün Azərbaycanı və daha 11 ölkəni tövsiyə edir. Məsələn, “Fun&Sun” tur operatoru Rusiyadan Azərbaycan, Birləşmiş Ərəb Əmirlikləri, Türkiyə, Tailand, Qətər, Misir, Maldiv adaları, Seyşel adaları, Şri-Lanka, İndoneziya, Serbiya və Ermənistana birbaşa və ya üçüncü ölkələrlə reyslər təklif edir. Ekspertlər hesab edir ki, Azərbaycan Rusiya-Ukrayna müharibəsi fonunda Moskvaya tətbiq edilən sanksiyalardan turizmin dirçəldilməsi üçün istifadə edə bilər. Çünki 148 milyon əhalisi olan Rusiya vətəndaşları hazırda bir çox ölkələrə gedə bilmir. Azərbaycan bundan məharətlə istifadə etməlidir. Ölkə, xüsusilə də yay mövsümündə Rusiya turistlərinə burada müxtəlif təkliflər edə bilər. Məlumdur ki, Rusiyanın bir çox əraziləri şimal bölgələridir, orada insanlar çox Günəş görmür, vitamin çatışmazlığı və digər belə hallar olur. Buna görə də onlar çalışırlar ki, daha çox cənub ərazilərinə üz tutsunlar. Bu fonda hesab edilir ki, Azərbaycan düzgün turizm siyasəti aparsa, ölkəmizdə bu sahədə canlanma olar. Rusiyalı turistlər üçün daha çox nə maraqlıdırsa, bunun üzərində iş aparılmalıdır. Ancaq o da etiraf olunmalıdır ki, Azərbaycan rusiyalı turistlər üçün hər zaman maraqlı ölkə olub. Odur ki, birbaşa hava xətləri bərpa olunduqdan sonra Rusiyadan Azərbaycana turist axını gözləniləndir. Azərbaycanda mətbəx turizmi, istirahət turları rusiyalı turistlərin marağına səbəb olur. Bu sahələr üzrə turistlərin qəbulu üçün ölkəmizdə bütün şərait var. İstisna edilmir ki, rusiyalı turistlərin ən çox Naftalan, Qalaaltı kimi sağlamlıq turizminə axını baş verə bilər. Çünki əvvəl də termal turizm növü üzrə Rusiyadan Azərbaycana çoxlu sayda şəxs gəlib. Həmçinin Bakı və Abşerona səyahətlərə, şərab marşrutlarına da Rusiyadan gələn turistlər maraq göstərir. Bundan başqa, hazırkı şəraitdə rusiyalı turistlərin çimərlik istirahəti üçün Azərbaycana gəlməsi də mümkündür.
Xatırladaq ki, Rusiyanın Azərbaycandakı səfiri Mixail Boçarnikov keçirdiyi mətbuat konfransında bildirib ki, Azərbaycan hər zaman rus turistlərin diqqət mərkəzində olub: “Artıq quru sərhədlərini açmaq lazımdır. Bununla daha çox turist səfər edəcək”. Səfir əlavə edib ki, Rusiya və Azərbaycan arasında aviareyslər bərpa olunur: “Biz Azərbaycandan xahiş etdik ki, Rusiya aviaşirkətləri uçuş həyata keçirə bilsinlər”. Qeyd edək ki, koronavirus pandemiyasına görə iki ildən çoxdur ki, Azərbaycan quru sərhədlərini bağlayıb, ölkəni yalnız hava yolu ilə tərk etmək mümkündür, bircə Naxçıvanla Türkiyə arasındakı quru sərhədi açıqdır. Nazirlər Kabinetinin son qərarına görə, ölkədə pandemiyaya görə tətbiq edilən bir sıra məhdudiyyətlər aradan qaldırılsa da, yerüstü sərhədlərin bağlı qalması iyulun 1-nə kimi uzadılıb. Türkiyənin Dilucu sərhəd-keçid məntəqəsindən də bildirilir ki, bu ilin martından istər Azərbaycan, istərsə də Türkiyə vətəndaşları hər iki istiqamətə maneəsiz gedib-gəlir, onlardan hər hansı icazə sənədi istənilmir. Elə Azərbaycandakı bəzi turizm şirkətləri də Türkiyəyə Naxçıvan üzərindən turlar təşkil edirlər.
Bakıda fəaliyyət göstərən turizm şirkətlərindən birinin təmsilçisi BBC-yə bildirilib ki, Türkiyəyə turistləri maneəsiz aparırlar, sadəcə, müştəriləri özləri Naxçıvana getməlidir: "Giriş-çıxışda sadəcə koronavirus pasportu yoxlanılır. Əlavə heç bir sənəd tələbi yoxdur. Pandemiyadan əvvəl Gürcüstandan gedirdik. İndi isə Naxçıvandan heç bir problem olmadan gedib-gəlirik". Azərbaycanın Nazirlər Kabineti yanında Operativ Qərargahın statistikasına görə, son həftələrdə koronavirusa ən çox günlük yoluxma sayı 33 olub. Mayın 11-nə olan məlumata görə, hazırda aktiv xəstə sayı 70 nəfərdi, mayın ilk 10 günündə ölkədə koronavirusdan ölüm faktı qeydə alınmayıb. Bunlar fonunda hesab edilir ki, quru sərhədlərinin açılması vacibdir. ən azı Rusiya istiqamətində. Bu, turizmin inkişafına mühüm təkan verə bilər. Bununla belə, ekspertlər hesab edir ki, müxtəlif məqsədli turizm səyahətləri ilə bağlı tələbin yüksək olması Rusiyadan və digər ölkələrdən Azərbaycana gələcək turistlərin sayına çox ciddi şəkildə təsir göstərə bilər. Gözlənilir ki, sektorun hazırlıq səviyyəsi, ölkədə mehmanxana nömrə fondunun yetərliliyi, daha çeşidli təkliflərin olması 2022-ci il üçün statistik göstəricilərə müsbət təsir edəcək. Eyni zamanda nəzərə almaq lazımdır ki, 85-dən artıq ölkə ilə səyahət məhdudiyyətlərinin aradan qaldırılması da turizm axınında müsbət saldonun yaranmasına səbəb olacaq.
Ramil QULİYEV
