Bu gün paytaxtın ən müxtəlif yerlərində istismar müddəti başa çatmış binaların söküntü prosesi aparılır. Ayrı-ayrı tikinti şirkətləri, MTK-lar köhnə binaları sökürlər, özü də necə gəldi. Binaların sökülməsi nəticəsində ətrafı toz-duman başına götürür, nəinki söküntü aparılan yerin yanından, heç yüz metrliyindən belə keçmək mümkün deyil. Bir tərəfdən atmosfer çirklənir, başqa bir tərəfdən söküntülərdən yayılan toz-torpaq ciyərlərimizə hopur. Buna görə isə nə tikinti şirkətləri, nə də dövlətin müvafiq qurumları məsuliyyət daşımaq istəyir. Bütün hallarda vətəndaş əziyyət çəkir.
Söküntü işi elə-belə, kor-koranə aparılmamalıdır, tikinti normaları olduğu kimi, söküntü normaları da olmamış deyil. Mütəxəssislərin bildirdiyinə görə, binaların söküntüsü zamanı binalar müvafiq qaydada isladılmalıdır ki, söküntü zamanı ifrat həddə olan toz ətrafa yayılmasın. Amma təəssüf ki, Azərbaycanda tikinti şirkətləri söküntü normalarını da çox ciddi şəkildə pozurlar. Buna görə isə indiyə qədər aidiyyəti qurumlar heç bir şirkəti cəzalandırmayıb.
“Azərbaycanda söküntünün ciddi normaları elə də formalaşmayıb”
Ekspert Akif Nəsirli bizimlə söhbətində bildirdi ki, bu problem dünyanın böyük şəhərlərində tənzimlənir. “Yəni ekoloji vəziyyətə, ətraf mühitə nəzarət edən müəyyən qurumlar böyük şəhərlərdə tikinti və söküntünün proporsiyasını gözləyirlər ki, atmosferə aşırı dərəcədə toz-torpaq atılmasın, atmosfer çirklənməsin. Amma çox təəssüflər olsun ki, Azərbaycanda söküntü və tikinti proseslərinə nəzarət edildiyi görsənmir. Heç bir qayda gözləmədən kim harda haranı istəyir sökür, istədiyi yerdə tikinti aparır. Düzdür, tikinti və söküntü prosesi qanuniləşdirilir. Amma bu söküntü və tikintiyə həm də ekoloji və ətraf mühitin çirkənməsi baxımından Ekologiya və Təbii Sərvətlər Nazirliyi nəzrət etməlidir. Tikinti sahəsində ciddi normal olsa da, Azərbaycanda söküntünün ciddi normaları elə də formalaşmayıb. Həm də atmosferi çirkləndirən təkcə söküntü deyil, həm tikintidir”.
A.Nəsirlinin sözlərinə görə, Azərbaycanda yüzlərlə bina var ki, yarımçıqdır və on illiklərlə onun tikintisi davam edir. Həmin o yarımçıq tikililərin də tikintisinin uzanması ətraf mühitə müəyyən təsirlər edir, ətraf mühiti çirkləndirir deyən A.Nəsirlinin fikrincə, Bakı kimi böyük, milyonluq şəhərdə həm də akustik nəzarət olmalıdır, akustik çirklənməyə nəzarət edilməlidir, onun normaları müəyyənləşdirilməlidir. “Ekologiya və Təbii Sərvətlər Nazirliyi bu normalara nəzarət etməlidir. Eyni zamanda şəhərin çirkəndirilməsinin qarşısını almaqdan ötrü söküntülərin qrafiki müəyyənləşməlidir. Yəni hər hansı binanın sökülməsi qərarı qanuni şəkildə qüvvəyə mindisə belə, şirkət, şəxs heç zaman onu edə bilməz. Ekologiya və Təbii Sərvətlər Nazirliyinə müraciət edilməlidir, nazirlik həmin tikintinin sökülməsinə vaxt, qrafik müəyyən etməlidir. Buna uyğun da söküntü konkret vaxt ərzində qısa müddətdə başa çatdırılmalıdır. Eyni zamanda yarımçıq tikililərin də uzanması qarşısı alınmalıdır. Ekologiya və Təbii Sərvətlər Nazirliyinə həm də ona nəzarət etməlidir ki, tikinti müddətdən artıq uzanmasın. Tikintinin uzanması da ətraf mühitə çox mənfi təsir edir. Bakı küləklər şəkəridir və tikinti meydançasından da güclü toz yayılır. Bu da atmosferi çşirkəndirir, nəticədə həm əhalinin sağlamlığına ziyan dəyir, həm də ətraf mühitin çirklənmə səviyyəsini artırır və sair. Bu məsələyə Ekologiya və Təbii Sərvətlər Nazirliyi nəzarət etməlidir və o cavabdeh olmalıdır. Çox təəssüf ki, bu nazirlik öz işinin öhtəsindən lazımınca gələ bilmir. Ona görə də biz Bakı şəhərində bu cür çirkli atmosferdə nəfəs almaq məcburiyyətində qalırıq” - deyə A.Nəsirli vurğuladı.
İradə SARIYEVA
