Prezident çap industriyasının maddi vəziyyəti üçün müstəsna qərar verdi...
Mayın 13-də Azərbaycan Respublikasının Baş naziri Əli Əsədovun imzaladığı müvafiq qərara əsasən Azərbaycanda kütləvi informasiya məhsullarının, kitabların və dərslik komponentlərinin, həmçinin həmin məhsulların istehsalı və nəşri ilə bağlı kağızın idxalı və satışı Əlavə Dəyər Vergisindən (ƏDV) azad edilib. Bundan sonra kitab, qəzet, jurnal və onların istehsalı ilə bağlı kağız məhsullarının idxal və satışına görə 18 faiz ƏDV tutulmayacaq.
Qeyd edək ki, Prezident İlham Əliyevin Fərmanı ilə ötən ilin dekabrında Vergi Məcəlləsinə edilmiş müvafiq dəyişikliyə dair siyahının təsdiqi Nazirlər Kabinetinə həvalə olunub.
Ekspertlər idxalı ƏDV-dən azad edilən kağız və çap məhsullarının siyahısının təsdiqlənməsini müsbət dəyərləndirir. Bunun dövlətin çap sənayesinin inkişafına verdiyi böyük töhfə olduğunu deyən ekspertlər bildirir ki, bundan qəzetlər, nəşriyyatlar və başqa çap işi ilə məşğul olan qurumlar yararlanacaq. Ekspertlərin sözlərinə görə, idxalı və satışı əlavə dəyər vergisindən azad edilən kütləvi informasiya vasitələri məhsullarının, kitabların, dərslik və həmin malların nəşri ilə bağlı rulon və ya vərəqə şəklində kağızın siyahısının təsdiq edilməsi çoxdan bəri idi ki, gözlənilirdi.
Dövlətin bu qərarının çap sənayesinin daha da güclənməsinə, daha da inkişafına dəstək məqsədi daşıdığını deyən eskpertlərin sözlərinə görə, bura kitabların cildlənməsi üçün tikilən kağız və karton üzlük, illüstrasiyalı və ya illüstrasiyasız, içində reklam materialı olan və ya olmayan qəzetlər, jurnallar və digər dövri nəşrlər, kitab-şəkillər, rəsm üçün və ya rəngləmə üçün uşaq kitabları, kitablar şəklində çap edilmiş atlaslar, divar xəritələri, topoqrafik planlar da daxil olmaqla, coğrafi və hidroqrafik xəritələr və ya bütün növ analoji xəritələr hamısı daxildir, bu isə bütövlükdə bir sahəni deyil, çapla bağlı olan bütün sahələri əhatə edir.
- Qiymət Məhərrəmli: “Dövlətin bu dəstəyi çap sənayesini çox gücləndirəcək”
Filogiya üzrə fəlsəfə doktoru Qiymət Məhərrəmli bizimlə söhbətində bildirdi ki, çapa aid olan kağız məhsullarının idxal və satışına görə 18 faiz ƏDV tutulmaması ilə bağlı qərarın imzalanması çox mühüm məsələdir. “Bu məsələ yalnız bir, iki deyil, bütövlükdə çap sənayesinin inkişafına dəstək verəcək. Əlbəttə, bu, dövlətin mühüm qərarı kimi çox əhəmiyyətlidir. Burada dərsliklərdən, uşaq ədəbiyyatından tutmuş çap mediasına, qəzet və jurnallara qədər sahələrin əhatə olunması çox mühümdür. Bu, dövlətin çap sahəsinin bütün qollarına verdiyi dəyərin və inkişafda maraqlı olmasının təzahürüdür. Fikrimcə, günü bu gündən artıq kitab sənayesində tamamilə yeni ab-hava yaranacaq. Bütün hallarda dövlətin bu dəstəyi çap sənayesini çox gücləndirəcək” - deyən
- Qəşəm İsabəyli: “Bu, dövlətin çap sənayesinə, kitab çapına qayğısıdır”
“Şirvannəşr”in təsisçisi və baş redaktoru Qəşəm İsabəyli də hesab edir ki, yeni qərar çap sahəsində canlanma yaradacaq. Q.İsabəylinin sözlərinə görə, bu, dövlətin çap sənayesinə qayğısının göstəricisdir: “Bu, dövlətin çap sənayesinə, kitab çapına qayğısıdır.
Təkcə nəşriyyatlar yox, mətbəələr də, çap işi ilə məşğul olan digər subyektlər də bundan bəhrələnəcək. Bu çox yaxşıdır. Bu öz yerində. Çap sahəsinin bəlli növləri 18 faiz ƏDV-dən azad edilib. Amma çox istərdik ki, kitab satışı yerlərinin, obyektlərinin sayı artırılsın. Əgər kitab çapı da, satışı da, kitab kağızı da 18 faiz ƏDV-dən azad edilirsə biz mütləq mənada oxucunu kitaba qaytarmalıyıq. Əhalinin kitaba qaytarılması üçün isə, heç olmasa əvvəlki dövrlərdə olduğu kimi, hər rayonda bir kitab mağazası olmalıdır. Dövlət kitab mağazaları açsa lap yaxşı olar”.
Q.İsabəyli hesab edir ki, Mədəniyyət Nazirliyi həm kitab mağazalarının açılmasında, həm də kitabxana kollektorlarının formalaşdırılmasında maraqlı olmalıdır. Onun sözlərinə görə, bütün bu deyilənlər olarsa 18 faiz ƏDV-dən azad edilmənin faydası özünü daha parlaq şəkildə büruzə verəcək.
İradə SARIYEVA
