İki gün əvvəl Azərbaycanı ATƏT Parlament Assambleyasında təmsil edən və həmin qurumun vitse-prezidenti olan millət vəkili Azay Quliyev öz “Tvitter” hesabı üzərindən maraqlı bir anons verdi: "Bu gün ATƏT PA-nın Bürosu illik sessiyada təsdiq olunmaq üçün Azərbaycanla bağlı detallarını hələ açıqlamaq istəmədiyim, lakin milli maraqlarımıza tam cavab verən, çox vacib və tarixi qətnamə layihəsi qəbul etdi”.
Maraqlıdır ki, Azay Quliyevin bu anonsu media mənsublarının da ciddi marağına səbəb olub. Ancaq bütün səylərə baxmayaraq, Azay Quliyev sənədlə bağlı əlavə məlumat verməyib. ATƏT Parlament Assambleyasında hansı sənədin qəbulundan söz gedə bilər və bu məsələnin gizli saxlanmasının səbəbi nə ilə izah olunur?
Tahir Mirkişili: “Çünki layihə müxtəlif mərhələlərdən keçməlidir”
ATƏT Parlament Assambleyasında Azərbaycanı təmsil edən millət vəkli Tahir Mirkişili “Bakı-Xəbər”ə bildirdi ki, qurumun növbəti sessiyası yay aylarında olacaq: “Sözügedən sənədin müəllifi Azay Quliyev olduğu üçün, açıqlama da məhz ondan gəlməlidir. Açıqlamanın tam verilməməsinin siyasi tərəfləri də var. Çünki layihə müxtəlif mərhələlərdən keçməlidir. Mənim bildiyimə görə, layihə ilkin instansiyadan keçib, ardı yay sessiyasında müzakirə ediləcək. Yəqin ki, tam açıqlamanın verilməməsi məhz bununla bağlıdır”.
Yeganə Hacıyeva: “Yeni qətnamədə belə missiyaların təşkili öz əksini tapacaq”
ATƏT-lə sıx əməkdaşlıq edən, beynəlxalq məsələlər üzrə ekspert Yeganə Hacıyeva isə qəzetimizə bildirdi ki, bu sualla maraqlanan birinci jurnalist deyilik: “Hamını da bu sual maraqlandırır, niyə bu layihənin mətni mediadan gizlədilir? Ehtimalım budur ki, həmin sənəd sırf Azərbaycana yönəlik deyil, ümumi xarakter daşıyır. ATƏT-in seçki fəaliyyətilə bağlı bu sənədin üstündə ağır yük olacaq. Nəzərə alsaq ki, ATƏT-ə üzv olan bir çox ölkədə seçki prosesləri aparılır və aparılacaq, həmin seçkilərdəki neqativlikləri əsas gətirərək hökumətlərə təzyiqlər edilir. Yəqin ki, bu amillərin aradan qaldırılması, neytrallaşması həyata keçiriləcək. Eyni zamanda, təhlükəsizlik və iqtisadi problemlərin həlli də həmin sənəddə əksini tapacaq. Düşünürəm ki, Azərbaycanın milli maraqlarının təmin olunması məhz bu məqamlarla bağlı ola bilər. ATƏT-ə üzv dövlətlərin ərazi bütövlüyünün tam tanınması, ATƏT coğrafiyasındakı münaqişələrin həllində təkliflər öz əksini tapıb. Ən əsası da, təxmin edirəm ki, uzun müddətdir münaqişə zonasında faktaraşdırıcı missiyaların səfərlərinin təşkil edilməməsi halı var. Fikrimcə, yeni qətnamədə belə missiyaların təşkili öz əksini tapacaq. Bu baxımdan da milli maraqlarımıza uyğun sənəd olacağı qənaətindəyəm. Bunun mediadan gizli saxlanması maraqların toqquşmasını kompensasiya etmək xarakterini daşıyır. Üzümüzə gələn həftələrdə biz bunun mediaya açıq variantını görəcəyik”.
Məhəmmədəli QƏRİBLİ
