Vüqar Qədirov: “Bizim, həmçinin, istəyimiz budur ki, Rusiya bu müsbət meyllərdən istifadə edərək münaqişənin həllində konkret irəliləyişə nail olmağa yardımçı olsun”
Rusiyanın Xarici İşlər Nazirliyinin (XİN) sözçüsü Mariya Zaxarova keçirdiyi brifinq zamanı Dağlıq Qarabağ münaqişəsinin həlli ilə bağlı məsələyə də toxunub: “Dağlıq Qarabağ münaqişəsinin həlli məsələsində meydana gələn bütün müsbət meylləri alqışlayırıq. İndi onları ehtiyatsız bəyanatlarla zədələmədən daha da inkişaf etdirmək lazımdır”.
O, Dağlıq Qarabağ probleminə dair son görüşlər və münaqişənin həllində Rusiyanın rolu barədə danışarkən deyib: “Biz də öz tərəfimizdən bu müsbət meyllərə mümkün qədər hər cür dəstək verəcəyik”.
Göründüyü kimi, M.Zaxarova Dağlıq Qarabağ münaqişəsinin həlli məsələsində meydana gələn müsbət meyllərdən danışıb. O bu cür müsbət meyllər deyəndə nəyi nəzərdə tutur?
Politoloq Vüqar Qədirov “Bakı-Xəbər”ə açıqlamasında bildirdi ki, M.Zaxarovanın nəyi nəzərdə tutduğu aydındır: “Bildiyiniz kimi, MDB ölkə başçılarının Düşənbədə təşkil olunan Sammitində Ermənitanın baş naziri Nikol Paşinyan Prezident İlham Əliyevlə təmas qurmağa təşəbbüs göstərib. Həmin vaxt ölkə rəhbərləri arasında baş tutan söhbət zamanı müsbət sayıla biləcək bəzi razılıqlar əldə olunub. Bura qoşunların təmas xəttində atəşkəs rejiminə nail olunması və tərəflər arasında operativ əlaqə mexanizmlərinin qurulması məsələsini aid edə bilərik. Əslində, Paşinyanın Düşənbədə atdığı addım danışıqlar prosesi üçün müsbət meyl kimi dəyərləndirilə bilər. Çünki Ermənistanda baş verən hakimiyyət dəyişikliyindən sonra ölkəyə rəhbərlik edən Paşinyan olduqca qeyri-konstruktiv mövqe tutmağı ilə yadda qaldı. Onun verdiyi bəyanatların hamısı danışıqlar prosesinə zidd idi. Məlumdur ki, bütün dünya birliyi və həmçinin, ATƏT-in Minsk Qrupu həmsədrləri region üçün təhlükəyə çevrilən bu münaqişənin dinc yolla nizama salınmasında maraqlıdır. Bu baxımdan da Paşinyanın hakimiyyətə gələndən sonra danışıqlar prosesinin formatı və başqa istiqamətlərdə verdiyi açıqlamalar sülh prosesilə daban-dabana zidd olub. Onun Düşənbədə atdığı addımı isə prosesdə baş verən müsbət dönüş kimi dəyərləndirə bilərik. Təbii ki, biz də bu mövqeyin davamlı olmasını istəyirik. Çünki Ermənistan rəhbərliyi konstruktiv mövqedən uzaqlaşmaq istədiyi təqdirdə Azərbaycan öz torpaqlarını işğaldan azad etmək üçün başqa mexanizmlər barədə fikirləşməyə vadar olur. Bizim, həmçinin, istəyimiz budur ki, Rusiya bu müsbət meyllərdən istifadə edərək münaqişənin həllində konkret irəliləyişə nail olmağa yardımçı olsun. Birmənalı şəkildə demək olar ki, Zaxarova müsbət meyl deyəndə Düşənbədə əldə olunan razılaşmanı nəzərdə tutub”.
Məhəmmədəli QƏRİBLİ
