Qabil Hüseynli: “Azərbaycan həm də örnək müsəlman dövləti olaraq Vatikan dövləti ərazisindəki katakomba qəbirlərinin bir hissəsinin təmirini öz üzərinə götürüb”
Azərbaycan Prezidenti İlham Əliyev oktyabrın 4-də Müqəddəs Taxt-Tacın ölkəmizdəki apostol nunsisi arxiyepiskop Pol Fitzpatrik Rasselin etimadnaməsini qəbul edib.
Prezident İlham Əliyev Azərbaycanla Vatikan arasında münasibətlərin çox yüksək səviyyədə olduğunu vurğulayaraq qeyd edib ki, biz bu günə kimi Roma Papası Fransiskin Azərbaycana səfərinin təəssüratı altındayıq. Prezident İlham Əliyev həmin səfər zamanı Roma Papası Fransisklə keçirdiyi görüşləri, eləcə də özünün Vatikana səfərini məmnunluqla xatırladıb. Roma Papası Fransiskin ölkəmizə səfərini tarixi hadisə kimi dəyərləndirən Prezident İlham Əliyev onun ölkəmizdə olarkən Azərbaycanla yaxından tanışlığının, insanlarla təmasda olmasının, eləcə də Azərbaycandakı dini icmaların nümayəndələri ilə görüşünün önəmini qeyd edib. Prezident İlham Əliyev, eyni zamanda, bu yaxınlarda Roma Papası Fransiskin xanım Mehriban Əliyevanı qəbul etdiyinə görə minnətdarlığını çatdırıb və qeyd edib ki, bu görüş xanım Mehriban Əliyevada dərin təəssürat hissi yaradıb. Prezident İlham Əliyev salamlarını və ən xoş arzularını Roma Papası Fransiskə çatdırmağı xahiş edib.
Doğrudan da Vatikanla Azərbaycan arasında əlaqələrin inkişafı, sözün əsl mənasında, bir nümunəyə çevrilib. Bu xüsusda Roma Papası ilə İlham Əliyevin Bakıya və Vatikana qarşılıqlı səfərlərini qeyd etmək olar. Həmçinin, Azərbaycanın Birinci vitse-prezidenti Mehriban Əliyevanın sentyabrın sonlarında Vatikana baş tutan səfərini və həmin ölkədə keçirdiyi məhsuldar görüşləri də bu sıraya aid edə bilərik. Xatırladaq ki, həmin səfər zamanı Mehriban Əliyeva Vatikanda Roma Papası Fransisklə görüşüb. Görüşdə Müqəddəs Taxt-Tacla Azərbaycan arasında əlaqələrin yüksək səviyyəsindən məmnunluq ifadə olunub. Əməkdaşlığın mədəni irsin qorunması sahəsində daha da genişləndiyi vurğulanıb. Azərbaycanın dinlərarası, mədəniyyətlərarası dialoqa mühüm töhfələr verdiyi qeyd edilib. Habelə Heydər Əliyev Fondunun çoxşaxəli fəaliyyəti, Fondun xristian abidələrinin qorunması, bərpası istiqamətində gördüyü işlər yüksək qiymətləndirilib. Dünyanın mühüm xristian mərkəzi sayılan Vatikanla müsəlman ölkəsi olan Azərbaycanın bütün sahələr üzrə qeyd edilən şəkildə geniş əməkdaşlığı bəşəriyyət üçün hansı örnək sayılacaq əlamətlərə malikdir?
Politoloq Qabil Hüseynli “Bakı-Xəbər”ə açıqlamasında bildirdi ki, Azərbaycanla Vatikan arasındakı münasibətlər doğrudan da bəşəriyyət üçün yaxşı örnək sayıla bilər: “Bu münasibətləri kənardan cəzbedici göstərən bir sıra amillər var. Təbii ki, onlardan ən başlıcası bizim ölkələrimizin fərqli mədəniyyətlərə malik olması, fərqli dinlərə etiqad etməsidir. Bu, eyni zamanda, ölkəmizdəki dini tolerantlığın və multikultural dəyərlərin yüksək səviyyədə olmasına dəlalət edir. Azərbaycan bu sahədə dünyanın diqqətini çəkə biləcək səviyyədə siyasət yürüdür. Belə bir vəziyyətin olması Katolik kilsənin başçısı olan Roma Papasının da diqqətindən kənarda qalmayıb. Azərbaycan uzun müddətdir dünyaya örnək ola biləcək multikultural siyasət yeridir. Öz ölkəsində azsaylı xalqların nümayəndələrinin inkişafı üçün bütün lazımi şəraiti yaradır. Nəticə etibarilə bizdə olan millətlərarası münasibətlərdə hər hansı bir problem yaşanmır. Bizim bu cür inkişaf modelimiz, yəni azsaylı xalqlara və fərqli dinlərə olan tolerant münasibətimiz sözsüz ki, həm də fərqli dinlərin bizə olan münasibətində də özünü göstərmiş olur. Azərbaycan üçün kimin hansı milli mənsubiyyətə, hansı milli mədəniyyətə aid olması önəm daşımır”.
Politoloqun sözlərinə görə, ölkəmiz bütün bəşəriyyətin ortaq saydığı dəyərlərə sayğı ifadə edən siyasət yürüdür: “Bunu əsas götürərək biz fərqli dinlərə etiqad edən ölkələrlə normal münasibətlər qura bilirik. Bu baxımdan da Azərbaycanla Vatikan arasında uzun illər boyunca davam edən dostluq münasibətini qeyd etmək yerinə düşər. Hələ bundan əvvəlki Papanın da mərhum Prezident Heydər Əliyevlə olan səmimi və xoş münasibətini xüsusi qeyd etmək lazımdır. Onun da Azərbaycana etdiyi səfəri hamı gözəl xatırlayır. Yeni Papa ilə də münasibətlər çox yüksək səviyyədədir. Azərbaycan həm də örnək müsəlman dövləti olaraq Vatikan dövləti ərazisindəki katakomba qəbirlərinin bir hissəsinin təmirini öz üzərinə götürüb. Biz Birinci vitse-prezident Mehriban xanımın Vatikana son səfəri zamanı təmiri yekunlaşan və artıq muzey ekspozisiyasına çevrilmiş həmin qəbirlərin açılış mərasimindəki iştirakının şahidi olduq. Bütün bunlar bir daha göstərir ki, Azərbaycan dini dözümlülüyün nümunəsi olan örnək ölkədir və bu istiqamətdə lazımi addımlar atır”.
Məhəmmədəli QƏRİBLİ
