Elşən Həsənov: “Bunun üçün Rusiya daha əməli fəaliyyətə keçərək Ermənistanı konstruktiv olmağa məcbur etməlidir”
Rusiya Federasiyası Xarici İşlər Nazirliyi (XİN) İlham Əliyevlə Nikol Paşinyan arasında Düşənbədə əldə olunan razılaşmanı şərh edib. Rusiya XİN-dən verilən məlumatda bildirilir ki,
Azərbaycan Prezidenti İlham Əliyev və Ermənistanın baş naziri Nikol Paşinyan arasında Düşənbədə baş tutmuş söhbət Dağlıq Qarabağ münaqişəsinin nizamlanmasına kömək edəcək.
Qeyd olunub ki, Rusiya Dağlıq Qarabağ məsələsinin həllinə yönəlmiş bütün razılaşmaları alqışlayır: "Ümid edirik ki, Düşənbədə baş tutmuş söhbət bu məqsədə çatmağa kömək edəcək”.
RF XİN-dən bildiriblər ki, ATƏT-in Minsk Qrupunun həmsədrlərindən biri kimi Rusiya, öz növbəsində, Azərbaycan və Ermənistana zəruri vasitəçilik yardımı göstərməyə hazırdır.
Xatırladaq ki, sentyabrın 28-də Düşənbədə MDB Sammiti çərçivəsində Azərbaycan Prezidenti İlham Əliyevlə Ermənistanın baş naziri Nikol Paşinyan arasında söhbət olub.
Tərəflər Ermənistan-Azərbaycan Dağlıq Qarabağ münaqişəsinin nizamlanmasına, tərəflərin təmas xəttində və Ermənistanla Azərbaycan arasındakı sərhəddə insidentlərin qarşısının alınması üçün atəşkəs rejiminin möhkəmlənməsinə dair danışıqlar prosesinə sadiq olduqlarını bildiriblər.
Həmçinin, tərəflər müvafiq strukturlar arasında operativ əlaqə qurulması üçün mexanizmlərin yaradılmasını qərara alıblar.
Göründüyü kimi, Rusiya XİN Düşənbədə əldə olunan razılaşmanın Dağlıq Qarabağ münaqişəsinin həllinə töhfə verəcəyi qənaətindədir. Düşənbə razılaşması ilə bağlı Rusiyanın nikbinliyini nə ilə izah edə bilərik?
Ekspert Elşən Həsənovun sözlərinə görə, Rusiya XİN-in budəfəki bəyanatında səmimi notlara rast gəlmək mümkündür: “Rəsmi Moskva hər zaman vasitəçilik missiyasını təklif etsə də, əməldə Ermənistana heç bir təzyiq göstərmirdi. Bilirsiniz ki, Ermənistanda baş verən hakimiyyət dəyişikliyindən sonra Dağlıq Qarabağ probleminin nizamlanma prosesində durğunluq yarandı. Hətta vəziyyət o həddə çatdı ki, Paşinyan uzun müddət Rusiyanın da təmsil olunduğu danışıqlar formatından imtina etdiyi barədə bəyanatlar səsləndirdi. Bunun da müqabilində Azərbaycan daha sərt reaksiyalar verdi. Hətta ölkəmizin bəzi məqamlarda güc nümayişi də gözə dəydi. Təbii ki, bütün bunlar regionun super dövləti olan Rusiyanın ürəyincə deyildi. Çünki proses hər an nəzarətdən çıxa bilərdi. Düşənbədə məhz Paşinyanın təmas təşəbbüsü göstərməsi Rusiyanın da ürəyincə olub. Çünki aydın hiss edilir ki, Ermənistanın yeni baş naziri meydan ab-havasından uzaqlaşmağı bacarıb və əsl dövlət adamı kimi düşünmək istəyir. Rusiyanın bu nikbinliyi onun təsir dairəsinə yaxın olan ərazidə stabilliyin yaranması ilə bağlıdır. Biz də anlayırıq ki, Dağlıq Qarabağ münaqişəsinin həlli bu xəritə üzrə getməli, yəni danışıqlar prosesinin bərpasından sonra reallaşa bilər. Ancaq gəlin bunu da etiraf edək ki, atəşkəsin əldə olunması heç də sırf problemin həllinə aparacaq addım deyil. Bunun üçün Rusiya daha əməli fəaliyyətə keçərək Ermənistanı konstruktiv olmağa məcbur etməlidir”.
Məhəmmədəli QƏRİBLİ
