Qabil Hüseynli: “Qarşıya müqəddəs vəzifələr qoyulsa da, alınan nəticə qənaətbəxş olmadı”
Sentyabrın 29-da bir qrup siyasi partiya və ictimai təşkilat “Məhsul” stadionunda “Qarabağa azadlıq” şüarı ilə mitinq keçirib. Azərbaycanın işğal edilmiş ərazilərinin azad edilməsi və ölkənin ərazi bütövlüyünün bərpa edilməsi tələbi ilə keçirilən mitinqdə minlərlə insan iştirak edib. Mitinq bu yaxınlarda yaradılmış “Qarabağ” ictimai komitəsi tərəfindən təşkil edilib.
Qarabağ Azadlıq Təşkilatının rəhbəri Akif Nağı mitinqi açarkən bildirib ki, aksiyanın məqsədi Qarabağın azad edilməsi üçün ictimai fəallığı ən yüksək səviyyəyə çatdırmaqdır: “Hakimiyyət və müxalifət Qarabağ məsələsində birləşməlidir. Cəmiyyətin bütöv iradəsini nümayiş etdirməli və hakimiyyətdən işğal edilmiş ərazilərin azad edilməsi üzrə radikal addımlar atmağı tələb etməliyik.
Mediada gedən məlumatlardan məlum olur ki, mitinqin təşkilatçısı olan “Qarabağ” komitəsi bu ilin yayında kütləvi aksiyaların, elmi konfransların, sərgilərin və s. keçirilməsi ilə Qarabağ münaqişəsinə daimi ictimai diqqətin saxlanması məqsədilə təsis edilib. Komitəyə 17 ictimai birlik və hərəkat, o cümlədən Qarabağ Azadlıq Təşkilatı, Klassik Xalq Cəbhəsi, Milliyyətçi Hərəkat, Vətəndaş Həmrəyliyi, İslam Partiyası, Bəyaz Partiya, Milli-Demokrat Partiyası, Qarabağ Veteranları Təşkilatı və s., həmçinin, fərdi qaydada 13 Qarabağ müharibəsi veteranı daxildir.
Qeyd edək ki, “Qarabağa azadlıq” şüarı ilə keçirilən mitinqə münasibət birmənalı olmayıb. Sosial şəbəkələr və mətbuat vasitəsilə bildirilən fikirlərdən aydın olur ki, narazılığın kökündə əsasən mitinqin adı ilə iştirakçıların sayı arasında olan uyğunsuzluq göstərilir. Qeyd edilir ki, Qarabağ problemi ilə bağlı təşkil olunan mitinqdə iştirakçı sayının minlərlə ölçülməsi müəyyən dairələrdə lazımsız təsəvvür yarada bilər. Həmçinin, qeyd edilir ki, bu problemlə Azərbaycan iqtidarı dərindən məşğul olur və mitinqdə bu yöndə iqtidara ünvanlanan iradlar tam yersizdir.
Yeni Azərbaycan Partiyası icra katibinin müavini, Milli Məclisin komitə sədri Siyavuş Novruzov bildirib ki, stadionda keçirilən bir mitinqlə Dağlıq Qarabağ problemi ilə bağlı münasibət formalaşdırmaq olmaz: "Bu gün Azərbaycan Prezidenti, Ali Baş Komandan İlham Əliyev Dağlıq Qarabağ münaqişəsinin həlli ilə bağlı zəruri addımları atır. Həm danışıqlarda, həm də ordunun gücləndirilməsində, yeni silahlarla təchiz olunmasında lazımi işlər görülür. Elə Bakıda keçirilən son iki hərbi parad buna daha bir nümunədir. O cümlədən qaçqın və məcburi köçkünlərin problemlərinin həlli, mənzil-məişət şəraitinin yaxşılaşdırılması, müharibə veteranlarına, şəhid ailələrinə diqqət və qayğı bilavasitə Dağlıq Qarabağ münaqişəsinə olan bir münasibətdir”.
Siyavuş Novruzovun sözlərinə görə, Dağlıq Qarabağ adı altında hər hansı bir mitinq keçirmək və bundan istifadə etmək bu gün yersiz addımdır: “Bugünkü mitinqin mahiyyəti ondan ibarətdir ki, bir qrup insan öz ətrafına adam toplaya bilmədiyi üçün Azərbaycanın taleyüklü məsələsini, yaxud hər bir Azərbaycan vətəndaşını düşündürən bir məsələni ortaya atmaqla orada insanları bir yerə cəmləyib öz maraqlarını həyata keçirməyə çalışır. Həmin qruplar Avropadan, başqa yerlərdən çağırışlar edirlər. Azərbaycanda mitinq keçirməyə nə ehtiyac var? Bütün Azərbaycan xalqı işğal olunmuş ərazilərimizin azad edilməsini istəyir. Əgər bu insanların Dağlıq Qarabağla bağlı belə ürəkləri yanırsa, onda Avropa küçələrində, Ermənistan səfirliklərinin, beynəlxalq təşkilatların qarşısında nümayiş keçirsinlər, Xocalı soyqırımı ilə bağlı müxtəlif təbliğat materialları yaysınlar, etirazlarını bildirsinlər. Ancaq əksinə, həmin insanlar orada Azərbaycan əleyhinə iş aparırlar, Azərbaycanın daxilində isə Dağlıq Qarabağ məsələsini qaldırırlar”.
Qeyd edək ki, məlum mitinqin keçirilməsi həm də Düşənbədə MDB dövlət başçılarının sammitində münaqişə tərəfləri arasında gərginliyin azaldılmasına dair razılığın əldə olunması ilə eyni ərəfəyə təsadüf edir. Məhz belə məqamda Qarabağ adı ilə mitinqin keçirilməsi nə dərəcədə lazım idi?
Politoloq Qabil Hüseynli qəzetimizə açıqlamasında bildirdi ki, belə təyinatlı mitinqlərə çox ciddi şəkildə hazırlaşılmalıdır: “Hiss edilirdi ki, mitinqi keçirən təşkilatlar uzun müddətdir ki, belə aksiyanın keçirilməsinə çalışırdılar. Bu təşəbbüsə cəmiyyətdə birmənalı mövqe yox idi. Hesab edilirdi ki, bu adla keçiriləcək aksiya çox möhtəşəm olmalıdır və orada yalnız bir siyasi zümrə təmsil edilməməlidir. Yəni bu mitinqdə siyasi mənsubiyyət kənara qoyulmalı və iqtidarlı-müxalifətli hamı orada iştirak etməli idi. Xüsusilə də əsas gözlənti bundan ibarətiydi ki, mitinqdə məcburi köçkünlər kütləvi şəkildə iştirak etməlidirlər. Ehtimallara görə, bu amillər nəzərə alınsaydı və təşkilat komitəsi deyilən istiqamətdə yaxşı iştirak etsəydi, nəticə yaxşı ola bilərdi. Etiraf edim ki, bu həm danışıqlar prosesinə müsbət təsir göstərərdi, həm də Qarabağ probleminə münasibətdə Azərbaycan xalqının iradəsini əks etdirə bilərdi. Ancaq mitinq komitəsinin istədiyi yerdən də görünürdü ki, onlar çox da kütləviliyi gözləməyiblər. Çünki mitinqin keçirildiyi stadion ən çox halda 10 min nəfərin iştirakını mümkün edirdi. Hazırlıqla bağlı vaxtın az olması da təşkilatçılara bağlı olan məsələdir. Çünki bunu da onların özləri müəyyən edirdi. Hesab edirəm ki, mitinqin təşkilat komitəsinə iqtidar nümayəndələri də əlavə edilməli idi. Bir sözlə, mitinq yaxşı hazırlanmalıydı. Hesab edirəm ki, bu mitinqi keçirənlər lazım olan məqsədlərinə nail ola bilmədilər. Həmçinin, yer uğurlu seçilməmişdi. Çünki bəri başdan bilinirdi ki, ora yüz minləri, milyonları yığmaq qeyri-mümkündür. Buna görə də keçirilən mitinq ümummilli xarakter daşımadı. Qarşıya müqəddəs vəzifələr qoyulsa da, alınan nəticə qənaətbəxş olmadı”.
Qabil Hüseynli mitinqin Düşənbədə münaqişə tərəfləri arasında əldə olunan razılaşma ərəfəsinə təsadüf etdiyinə də aydınlıq gətirdi: “Əslində, Paşinyanın belə bir təşəbbüsdə olacağı da gözlənilməz idi. Gördünüz ki, Paşinyan birdən-birə öz istiqamətini 180 dərəcə dəyişərək, əvvəlki radikallığından imtina edib, konstruktivliyə yaxın mövqe ortaya qoydu. Ancaq bu heç də o anlama gəlməməlidir ki, Ermənistan bu mövqeyini sona qədər qoruyacaq. Fikrimcə, izdihamlı Qarabağ mitinqi nə vaxt keçirilsə, təsirli olar”.
Məhəmmədəli QƏRİBLİ
