Mehdi Mehdiyev: “Düşmən hər hansı bir təxribata və yaxud da hücum əməliyyatına hazırlaşarsa, o zaman biz bundan tez xəbər tutacağıq”
Məlum olduğu kimi, Azərbaycanın “Azerspace-2” peyki sentyabrın 26-da Fransa Qvianasında yerləşən Kuru kosmodromundan orbitə buraxılıb. "Azerspace 2" peykinin orbitə çıxarılması Azərbaycanın növbəti uğurudur. Məsələ ondadır ki, son beş il ərzində orbitə 3 peyk çıxaran Azərbaycan dünyanın kosmik klubunun üzvünə çevrilib və kosmik sənayedə öz mövqelərini möhkəmləndirib.
Azərbaycanın orbitə çıxardığı peyklərin informasiya təhlükəsizliyi baxımından çox böyük əhəmiyyəti var. Orbitə çıxarılan peyklər Azərbaycan telekanallarının dünyaya yayılmasında önəmli rol oynayırlar. Azərbaycan bu peyklər sayəsində telekommunikasiya sahəsində xarici tərəfdaşlardan asılılığını tam aradan qaldırıb. Ölkəmiz kosmik sənaye sahəsində beynəlxalq əməkdaşlığını dərinləşdirir. Kosmik sənayedə əldə edilən uğurlar iqtisadiyyatın qeyri-neft sektorunun inkişafını stimullaşdırır.
"Azersky" müşahidə peyki dünyanın istənilən nöqtəsində baş verən hadisələri müntəzəm izləməyə imkan yaradır. Azərbaycanın müdafiə və hərbi potensialının gücləndirilməsi işində "Azersky" peykinin xüsusi rolu var. Çünki bu müşahidə peyki hər gün istənilən ölkə, hərbi infrastruktur və düşmənə aid məlumatların əldə edilməsində əvəzsiz rola malikdir.
Prezident İlham Əliyev də bu münasibətlə xalqımızı təbrik edərkən bir sıra məqamlara toxunub: “Peyklərin orbitə çıxarılması dövlətimizin gücünü göstərir, bizim siyasətimizi göstərir. Bizim artıq 3 peykimiz var: “Azerspace 1” telekommunikasiya peyki, “Azersky” müşahidə peyki və “Azerspace 2”. Bu peyklərin çox böyük əhəmiyyəti var. İlk növbədə, Azərbaycan informasiya təhlükəsizliyi baxımından daha da önəmli addım atır. Eyni zamanda, “Azersky” müşahidə peyki vasitəsilə biz nəinki ölkəmizin, dünyanın istənilən nöqtəsində baş verən bütün hadisələri daim müntəzəm olaraq izləyə bilirik, nəzarət edə bilirik. Azərbaycanın müdafiə və hərbi potensialının gücləndirilməsi işində “Azersky” peykinin xüsusi rolu var”.
O da məlumdur ki, Azərbaycan Ermənistanla müharibə vəziyyətindədir. Torpaqlarımızın 20 faizi işğal altındadır. Bu baxımdan sözügedən peyk hərbi nöqteyi-nəzərdən Azərbaycana hansı üstünlüklər təmin edə bilər, nə kimi faydaları var?
Məsələyə münasibət bildirən hərbi ekspert Mehdi Mehdiyevin sözlərinə görə, orbitə göndərilən peyklər Azərbaycanın hərbi müstəvidə müdafiə qüdrətini xeyli artırır. O bunu bir sıra arqumentlərlə əsaslandırdı: “Nəzərə almaq lasımdır ki, kosmosda peykə malik olmaq istənilən dövlət üçün böyük uğurdur. Bu həm iqtisadi, həm də ölkə qarşısında olan digər vəzifələrin həyata keçirilməsi baxımından mühüm əhəmiyyət kəsb edir. Xüsusən də nəzərə almalıyıq ki, bizim torpaqların 20 faizi Ermənistanın işğalı altındadır. Bizim torpaqların müəyyən hissəsinin işğal altında olduğu dövrdə peykin olması çox önəmlidir. Çünki peykin olması imkan verir ki, dövlət sərhəd və cəbhə boyu düşmənə nəzarət etsin. Belə ki, düşmən hər hansı bir təxribata və yaxud da hücum əməliyyatına hazırlaşarsa, o zaman biz bundan tez xəbər tutacağıq. Yəni bizim üçün düşmənin istənilən hərəkəti gözlənilməz olmayacaq. Bunu zamanında müşahidə edib, dəqiq hazırlıq tədbirləri görüb, vaxtında layiqincə qarşısını alıb cavabını vermək iqtidarında olacağıq. O baxımdan peykin olmasının bu kimi üstünlükləri var. Hesab edirəm ki, Azərbaycanın kosmosda peykə sahib olmasının bu və digər üstünlükləri var”.
Vidadi ORDAHALLI
