Əkbər Qoşalı: “İƏT üzvü olan ölkələrin bir çoxu ilə xeyli iqtisadi, siyasi və hətta müəyyən qədər digər bağları olan Ermənistana vurulan hər zərbə…”
Azərbaycan İslam Əməkdaşlıq Təşkilatı (İƏT) dövlətlərinə Ermənistanı BMT Təhlükəsizlik Şurasının 822 (1993), 853 (1993), 874 (1993) 884 (1993) saylı qətnamələrində, eləcə də İƏT-in Dağlıq Qarabağ münaqişəsi ilə bağlı qəbul etdiyi qətnamə və qərarlarındakı tələblərə əməl etməyə vadar etmək üçün bu ölkə ilə ikitərəfli münasibətlərini aşağı səviyyəyə endirmələrini təklif edib.
Bunu xarici işlər naziri Elmar Məmmədyarov İƏT-in Ermənistanın Azərbaycana qarşı təcavüzü üzrə Əlaqə Qrupunun Nyu-Yorkda keçirilən 3-cü iclasında çıxışı zamanı deyib. Nazir bildirib ki, Ermənistanla Azərbaycan arasında münaqişənin başlamasından əsrin bir rübündən çox vaxt keçib. Lakin buna baxmayaraq, Ermənistan BMT Təhlükəsizlik Şurasının tələbləri və BMT Baş Assambleyasının qətnamələri, İƏT və digər beynəlxalq təşkilatların qərarları və ayrı-ayrı dövlətlərin mövqelərinə hörmətsizlik edərək və beynəlxalq hüququn norma və prinsiplərini kobud şəkildə pozaraq, Azərbaycan ərazilərinin qanunsuz işğalını davam etdirir.
Qeyd edək ki, İƏT (2011-ci il iyunun 28-dək İslam Konfransı Təşkilatı adlanıb) 1969-cu il sentyabrın 22-dən 25-dək Mərakeşin paytaxtı Rabatda keçirilən müsəlman ölkələri dövlət və hökumət başçılarının konfransında təsis olunub. Qurumun hazırda 57 üzvü var. BMT-dən sonra ən çox dövlətin birləşdiyi böyük təşkilatdır.
Keçmiş sovet respublikalarından Azərbaycan 1991-ci ildə İƏT-in üzvü olub. Ötən 27 il ərzində İƏT dəfələrlə Azərbaycanın ərazi bütövlüyünü dəstəkləyən bəyanat verib, Ermənistanın təcavüzünü pisləyən qətnamə qəbul edib. Hazırda təşkilat beynəlxalq toplantılarda Azərbaycana böyük dəstək verir.
Ancaq o da var ki, qurumun üzvü olan bəzi müsəlman dövlətləri Ermənistanla ikitərəfli əlaqələrə malikdirlər. Bu da, istər-istəməz, Ermənistana müəyyən üstünlüklər verir. Yəni Dağlıq Qarabağ münaqişəsinin həllində qeyri-konstruktiv mövqeyini davam etdirir.
Bu baxımdan, Elmar Məmmədyarovun fikirlərini ekspertlər necə şərh edirlər?
Məsələyə münasibət bildirən Azərbaycanda Atatürk Mərkəzinin şöbə müdiri, Milli QHT Forumu İdarə Heyətinin üzvü Əkbər Qoşalının sözlərinə görə, xarici işlər nazirinin səsləndirdiyi bu təklif çox vacib yanaşmadır: “Deyərdim ki, tamamilə haqlı təklifdir. Bu təklif bir yandan işğalçı və terroru dəstəkləyən, özü başqa ölkənin forpostu olan dövlətin yeni iqtidarının da, öncəki rejimlər kimi, işğalçılığa haqq qazandırdığı bir vaxtda irəli sürülüb. İƏT-in Ermənistanın Azərbaycana qarşı təcavüzü məsələsi üzrə Əlaqə Qrupunun Nyu-Yorkda keçirilən 3-cü iclasında səslənən təklif, işğalçı dövlətin yeni baş nazirinin BMT-nin ali tribunasından yeni sərsəmləmələri ilə, demək olar, eyni dövrə təsadüf etməsi ilə ayrı bir dəyər kəsb edir. Elə bilirəm, yalnız İƏT-də deyil, sözümüz çatan, üzv olduğumuz bütün platformalarda da bu və bu qəbildən olan təkliflər, çağırışlar etməliyik. Bizim qarşımızda işğalçılıq zehniyyəti, terrorçu təfəkkürü dəyişməyən bir qonşu var - özü bizim tarixi torpaqlarda süni şəkildə qurulmuş və neçə illərdir BMT tərəfindən tanınmış sınırlarımız daxilindəki 20 faiz torpağımızı da havadarlarının hərbi-siyasi dəstəyi ilə işğal altında saxlayan bir qonşu. Belə bir zehniyyətə qarşı bütün platformalarda, özü də işğalçılar kimi min dona girərək deyil, bax belə - İƏT-də olduğu kimi, dürüst, haqlı və açıq fikirlər səsləndirməlidir. O təkliflərin həyata keçməsinə nail olmalıyıq.
Bilirsiniz, İƏT üzvü olan ölkələrin bir çoxu ilə xeyli iqtisadi, siyasi və hətta müəyyən qədər digər bağları olan Ermənistana vurulan hər zərbə onsuz da ağır sosial-iqtisadi durumda olan, demoqrafik vəziyyəti get-gedə gərginləşən işğalçını uçuruma sürükləyəcək. Bu, tarixin də məntiqidir. Bir sözlə, haqq bizim tərəfdədir, biz qalib gələcəyik!”.
Vidadi ORDAHALLI
