Məhəmməd Əsədullazadə: “Prezident keçmiş və indiki erməni hakimiyyətinin siyasətini tam ifşa edərək, dəvət olunan qonaqlarda Ermənistan barədə tam dolğun rəy formalaşdırdı”
Ötən həftə Azərbaycan daha bir tarix yaşadı, qanunverici orqanı sayılan Azərbaycan Parlamentinin yaranmasının 100 illiyini qeyd etdi. Təntənəli şəkildə qeyd edilən həmin mərasimdə dünyanın bir çox ölkələrinin deputatları da iştirak edirdi. Milli Məclisdə təşkil edilən həmin mərasimdə Prezident İlham Əliyev çıxış edərək qanunverici orqanın keçdiyi şərəfli yol, onun tarixi fəaliyyəti, eləcə də günümüzdə qanunvericiliyin təkmilləşdirilməsində parlamentin rolundan danışdı.
Onu da xüsusi qeyd etmək lazımdır ki, ölkə başçısının sentyabrın 21-də Milli Məclisdə Azərbaycan parlamentinin 100 illiyi münasibətilə təntənəli iclasındakı çıxışının müəyyən tezisləri Ermənistanın işğalçılıq siyasətinə və bu ölkədəki xunta rejiminə həsr olunub. Xarici spikerlərin də iştirak etdiyi iclasda Prezident bildirib ki, Ermənistan uğursuz dövlətdir: “Ermənistanda bu ilin yazında baş vermiş çevriliş əslində göstərir ki, əvvəlki rejim xalqın dəstəyini tam itirmişdir. İyirmi il Ermənistana rəhbərlik etmiş rejim çökdü və bu bir daha onu göstərir ki, onların işğalçılıq siyasəti iflasa uğradı. Eyni zamanda, beynəlxalq təşkilatlar da bu məsələ ilə bağlı gərək ciddi təhlil aparsınlar və özlərinə sual versinlər ki, necə ola bilər, Ermənistanda son müddət ərzində keçirilmiş parlament və prezident seçkilərinə beynəlxalq müşahidəçilər müsbət reaksiya vermişlər. Məgər onlar bilmirdilər ki, Ermənistanda bütün seçkilər kobudcasına saxtalaşdırılır? Bilmirdilər ki, orada əvvəlki rejimin hörməti sıfıra bərabərdir? Bilirdilər, ancaq hansısa səbəblərə görə göz yumurdular. İndi də Ermənistanda yaranmaqda olan yeni diktatura rejimi, demək olar ki, eyni siyasəti aparır. Siyasi rəqiblərə qarşı zorakılıq həyata keçirilir, siyasi rəqiblər həbsə alınır, mətbuat nümayəndələrinə qarşı repressiyalar aparılır, mətbu orqanlar bağlanır, dövlət orqanları siyasi rəqiblərinin həbsi ilə bağlı açıq-aşkar göstərişlər verir, bu göstərişləri bütün dünya eşidir”.
Bütün bu deyilənlərin fonunda, Prezident İlham Əliyevin sözügedən tədbirdə bu ölkədəki xunta rejiminin təcavüzkar fəaliyyəti və diktatura şəraiti barədə verdiyi təhlil dünya parlament nümayəndələrində Ermənistan barəsində daha obyektiv rəyin formalaşmasında necə təsirli rol oynayacaq? Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “Prezident İlham Əliyevin parlamentin 100 illiyi ilə bağlı Milli Məclisdə dünya parlamentariləri qarşısında geniş təhlillə çıxışı hesab edirəm ki, Ermənistana qarşı informsiya savaşında ən sardıcı zərbədir. Qeyd edim ki, Milli Məclisə qonaq qismində dəvət olunan xarici ölkələrin parlamentariləri bir daha dolğun şəkildə Ermənistanın işğalçı siyasətinin şahidi oldular. Təbii ki, Ermənistanın ölkəmizə qarşı işğalçı siyasəti və işğalın doğurduğu nəticələr barədə ölkənin birinci şəxsindən eşitmək böyük siyasi əhəmiyyət daşıyır. Qeyd edim ki, Ermənstanda 20 ildən artıq xunta və işğalçı rejim hakimiyyətdə olub. Bu illər ərzində, demək olar ki, Ermənistanın tutduğu işğal siyasəti orada sabitliyə deyil, destabilizasiyaya xidmət etdi. Məhz Ermənistanda baş verən etirazlar və bu etirazlar fonunda hakimiyyətin möhkələnməməsi, davam edən siyasi böhran bu gün işğalıçı siyasətin mahiyyətinin göstəricisidir. Hesab edirəm ki, Prezident İlham Əliyev keçmiş və indiki erməni hakimiyyətinin siyasətini tam ifşa edərək, dəvət olunan qonaqlarda Ermənistan barədə tam dolğun rəy formalaşdırdı. Nə qədər ki, Ermənistan işğalçı siyasət aparacaq, dəyişən hakimiyyətlər yeni kurs həyata keçirməyərək işğal siyasətini davam etdirəcək, bu ölkədə hər hansı demokratik islahatlar mümkün olmayacaq. Bəli, bu gün Azərbaycan Ermənistana informasiya məkanında artıq qalib gəlməkdədir. Azərbaycan iqtidarı bu kimi siyasi xətti davam etdirərsə, Ermənistanın işğalçı siyasətinə etirazlar formalaşacaq”.
Vidadi ORDAHALLI
