Ramil Hüseynov: “Bunu şərtləndirən bir sıra faktorlar var”
2020-ci ildə Enerji Xartiyasının Konfransı Bakıda keçiriləcək. Belə ki, artıq Azərbaycanın 2020-ci ildə Enerji Xartiyası Konfransına sədrlik etməsi barədə qərar qəbul olunub.
Qeyd edək ki, Cənub Qaz Dəhlizinin 2020-ci ildə tam istismara veriləcəyi və həmin vaxt tədbirin keçirilməsi üçün ən münasib məkanın Bakı olacağı nəzərə alınaraq, Azərbaycan Enerji Xartiyası Konfransına sədrliyə namizədliyini irəli sürmüşdü. 2020-ci il üçün Konfrans sədrliyinə, Azərbaycandan başqa, Ermənistan və Monqolustan da namizədliyini irəli sürdüyündən, 3 ölkə arasında rəqabət vəziyyəti yaranmışdı.
Lakin Azərbaycan tərəfinin bu məsələ ilə əlaqədar davamlı fəaliyyəti, gərgin əməyi və diplomatik kanallar vasitəsilə aparılmış danışıqlar nəticəsində 2020-ci ildə Enerji Xartiyası Konfransına sədrliyə ən uyğun namizəd kimi ölkəmiz müəyyənləşib. Ermənistanın 2020-ci il üçün sədrlik iddiasının qarşısı alınıb. Bu ölkə konfransa 2021-ci ildə, Monqolustan isə 2022-ci ildə sədrlik etməyə razılaşıb.
Azərbaycan üçün enerji siyasəti baxımından son dərəcə əlamətdar bir ildə Enerji Xartiyası Konfransına ev sahibliyi etməsi ölkəmizin növbəti uğurudur.
Məlumat üçün qeyd edək ki, Enerji Xartiyası üzrə konfrans - 1994-cü il Enerji xartiyasının Müqaviləsi əsasında təsis edilmiş beynəlxalq hökümətlərarası təşkilatdır. Enerji Xartiyası üzrə Konfrans istehsalçı, istehlakçı və enerji daşıyıcıları olan dövlətləri əhatə edən enerji sektorunda dövlətlərarası əməkdaşlıq təşkilatıdır. Konfransın fəaliyyəti yalnız iqtisadiyyatın bir hissəsi - enerji ilə məhdudlaşsa da, dövlətlərin investisiya, ticarət, enerji resurslarının tranziti, enerji ilə bağlı ekoloji aspektləri üzrə beynəlxalq əməkdaşlığını əhatə edir.
Bütün hallarda, Azərbaycanın sözügedən məsələdə Ermənistanı sıxışdırıb kənarda qoyması hər mənada böyük uğurdur. Həm iqtisadi, həm də siyasi baxımdan bunun əhəmiyyəti böyükdür.
Maraqlıdır, bəs ekspertlər bunu necə şərh edir?
Məsələyə münasibət bildirən VİP-in sədr müavini Ramil Hüseynovun sözlərinə görə, Azərbaycanın bu məsələdə Ermənistanı üstələməsi təqdirəlayiq haldır: “Bunu şərtləndirən bir sıra faktorlar var. Əvvəla, Azərbaycanın buna mənəvi haqqı var. Məsələ ondadır ki, regionda enerji layihələrinin reallaşdırılması ilə bağlı Azərbaycan lokomativ ölkə statusunda çıxış edir. Nəinki enerji, o cümlədən nəqliyyat layihələri ilə bağlı bir sıra layihələrin həyata keçirilməsində Azərbaycan arbitr roluna malikdir. Belə olan halda, əlbəttə ki, sözügedən mötəbər tədbir Azərbaycanda keçirilməli idi. Nəzərə alsaq ki, Cənub Qaz Dəhlizi layihəsi 2020-ci ildə istismara veriləcək, o zaman tədbirin Azərbaycanda keçirilməsinin böyük əhəmiyyəti var. Əlbəttə ki, Ermənistan məhz həmin il Konfransın öz ölkələrində keçirilməsinə nail olsaydı, o zaman bu, Azərbaycanın imicinə mənfi təsir göstərə bilərdi. Ancaq göründüyü kimi, Azərbaycanın fəal diplomatik səyi nəticəsində ermənilər öz istəyinə çata bilmədi. Hesab edirəm ki, bu məsələdə Azərbaycanın nüfuzu və həlledici rolu nəzərə alınıb. Digər tərəfdən, Avropanın enerji xətlərinin diversifikasiyası ilə bağlı Azərbaycandan gözləntiləri böyükdür. Məhz Azərbaycanın hesabına Avropa ölkələri, qismən də olsa, Rusiyadan olan enerji asılılığını azaldacaq. O baxımdan Azərbaycanın haqqı var ki, belə tədbirlərə ev sahibliyi etsin. İstənilən halda, tədbirin Bakıda keçirilməsi ilə bağlı qərarın verilməsi Azərbaycanın uğurudur”.
Vidadi ORDAHALLI
