Yeganə Hacıyeva: “Əks halda, Azərbaycan tərəfi işğal olunmuş ərazilərinin azad edilməsində güc faktorunun istifadəsi məcburiyyətində qalacaq”
Erməni mətbuatı ABŞ Prezidenti Donald Trampın Ermənistan baş naziri Nikol Paşinyana ünvanladığı məktubun mətnini yayıb. Sözügedən məktubda Tramp ABŞ xalqı adından Ermənistan rəhbərini müstəqilliklərinin 27-ci ildönümü ilə bağlı təbrik edib.
Məktubda diqqətçəkən məqamlardan biri də budur ki, Tramp yaxın aylarda Dağlıq Qarabağ konfliktinin həlli istiqamətində yaxşı imkanların açıldığını vurğulayıb. Bu xüsusda ABŞ Prezidenti bildirib ki, bu hal ABŞ-Ermənistan münasibətlərinin inkişafında da yeni səhifə aça bilər. Çünki Minsk Qrupunun həmsədri kimi ABŞ uzun illərdir bu konfliktin həlli istiqamətində səylər göstərir.
Göründüyü kimi, Tramp konkret vaxt göstərərək, yaxın aylarda Dağlıq Qarabağ probleminin həlli istiqamətində imkanların olacağına işarə edir. Bu imkanlar deyəndə Tramp nəyi nəzərdə tutur?
Politoloq Yeganə Hacıyeva “Bakı-Xəbər”ə açıqlamasında bildirdi ki, son illər ABŞ-ın Ermənistanla münasibətlərində əvvəlki illərdən fərqli yanaşma mövcuddur: “Bu fərqlilik özünü ABŞ-ın gecikmiş məktubundan kənarda, bu ölkəyə maliyyə yardımlarının azaldılmış məbləğlərində də özünü göstərməkdədir. ABŞ Ermənistana 2016-cı ildə 20,4 milyon dollar məbləğində yardım ayırmışdısa, 2018-ci il üçün isə Ermənistana ayrılan maliyyə yardımı 6,2 milyon dollar məbləğində, yəni 3 dəfədən də çox azalıb.
Bu istiqamətdə bu günlərdə Nyu-Yorkda keçiriləcək BMT Baş Assambleyasının 73-cü sessiyası çərçivəsində ABŞ Prezidenti Donald Trampla Ermənistan baş naziri Nikol Paşinyan arasında planlaşdırılan görüşün ləğvini xüsusi qeyd etmək istəyirəm. Ermənistan tərəfinin xahiş etdiyi görüşdən Donald Tramp imtina edib. Bundan sonra Ermənistan tərəfi bu sessiya çərçivəsində ABŞ-ın vitse-prezidenti Maykl Penslə Nikol Paşinyanın görüşünü təşkil etməyə cəhd göstərdi ki, bu da uğursuzluqla nəticələndi”.
Yeganə Hacıyeva hesab edir ki, Ermənistanda hazırda siyasi səriştəsiz, təhlükəsizlik proseslərində təcrübəsiz, Ermənistan dövlətini şübhəli iqtisadi dairələrlə işbirliyinə təhrik edən populist bir baş nazirin hakimiyyətdə olması dünya liderlərini bu ölkənin yeni hakimiyyəti ilə diqqətli olmağa məcbir edir: “Bu reallığın fonunda ABŞ Prezidenti Donald Trampın Paşinyana göndərdiyi məktubu diqqət çəkir. Öncəliklə onu qeyd edim ki, mətnindən də aydın olduğu kimi, bu məktubu 3 ay gecikmiş, ABŞ-ın Ermənistana Respublika günü münasibətilə təbrik məktubu kimi qəbul etmək lazımdır. Məktubda Tramp Ermənistan-Azərbaycan münaqişəsinin tənzimlənməsinə də toxunaraq bildirib ki, bu hal ABŞ-Ermənistan münasibətlərinin inkişafında da yeni səhifə aça bilər. Çünki Minsk Qrupunun həmsədri kimi ABŞ uzun illərdir bu konfliktin həlli istiqamətində səylər göstərir.
Məktubda diqqətçəkən məqamlardan biri də budur ki, Tramp yaxın aylarda Dağlıq Qarabağ konfliktinin həlli istiqamətində yaxşı imkanların açıldığını vurğulayıb. Məsələ ondadır ki, indiki qlobal enerji və təhlükəsizlik sahəsində Cənubi Qafqazın artan rolu istər ABŞ, istərsə də Aİ üçün bu regionun təhlükəsizliyinə əsas hədə olan Dağlıq Qarabağ münaqişəsinin nizamlamasını vacib edir. Regionun strateji vacib ölkəsi kimi Azərbaycanın da öz strateji tərəfdaşları ilə danışıqlarının nüvəsini məhz konfliktin həllində real səylərinin artırılması tələbi təşkil edir və mövcud status-kvonun saxlanması ilə razılaşmaq fikri yoxdur. Əks halda, Azərbaycan tərəfi işğal olunmuş ərazilərinin azad edilməsində güc faktorundan istifadə məcburiyyətində qalacaq”.
Yeganə Hacıyeva hesab edir ki, istər ABŞ, istərsə də Aİ üçün isə mövcud status-kvonun saxlanması və ya müharibə ehtimalı qəbuledilməzdir: “Bundan öncə biz sizinlə Donald Trampın Azərbaycan rəhbərliyi ilə münaqişənin sülh yolu ilə həlli üçün birgə çalışmağa hazır olduğunu, üzümüzə gələn aylarda Dağlıq Qarabağ münaqişəsinin həlli üçün imkanlar açılacağını vurğulamasını şərh etmişik. Məsələ ondadır ki, regionla bağlı gedən proseslər və bu proseslərdə Azərbaycan diplomatiyasının fəallığı nəticəsində münaqişənin sülh yolu ilə həllinə yeni imkanlar yaranıb. İrəlidəki aylarda keçiriləcək danışıqlarda Minsk Qrupu həmsədrlərinin Ermənistandan zəbt etdiyi rayonların bir qismini tərk etməsini birbaşa formada tələb edəcəyi gözlənir. Sonrakı mərhələdə isə digər problemlərin həlli üçün əsas yaranmış olacaq”.
Məhəmmədəli QƏRİBLİ
