Məhəmməd Əsədullazadə: “Ona görə də ölkəmizin önəminə xüsusi hörmət var”
“NATO terrorizmlə mübarizədə Azərbaycanın rolunu yüksək dəyərləndirir”. Sözügedən fikirləri jurnalistlərə açıqlamasında NATO baş katibinin müavini Rouz Qottemüller deyib.
Onun sözlərinə görə, Azərbaycan terrorizmə qarşı mübarizədə NATO-nun səylərini dəstəkləyir: “Azərbaycanın Əfqanıstandakı mövcudluğunu artıraraq oradakı sülhməramlı missiyanı dəstəklədiyinə görə çox şadıq. Azərbaycan, həmçinin, Əfqanıstana malların təchizatının diversifikasiyası məsələsində çox əhəmiyyətli nəqliyyat rolu oynayır. Beləliklə, Azərbaycan fəal şəkildə terrorizmə qarşı mübarizədə NATO-nun səylərini dəstəkləyir”.
R.Qottemüller, eyni zamanda, regionun mühüm oyunçusu kimi Azərbaycanla əməkdaşlığın əhəmiyyətini qeyd edib: “Bir çox layihələr üzərində işləyirik və bu layihələr Azərbaycanın maraqlarına xidmət edir”.
Onun sözlərindən belə məlum olur ki, Azərbaycan regionda açar roluna malik olan ölkədir. Həqiqətən də NATO rəsmisinin Azərbaycanın regionda başlıca oyunçu olması ilə bağlı səsləndirdiyi fikirlər reallığı özündə əks etdirir. Əvvəla Azərbaycan həm ərazisinə görə, həm də iqtisadi göstəricisinə görə Cənubi Qafqazda lider dövlətdir. Azərbaycanın razılığı və iştirakı olmadan regionda heç bir layihə reallaşa bilməz. Azərbaycan həm siyasi, həm də iqtisadi müstəvidə regionda həlledici gücə malikdir. Azərbaycan NATO və digər beynəlxalq qurumlar çərçivəsində dünyanın müxtəlif yerlərində sülhməramlı əməliyyatlara dəstək verir. Azərbaycanın beynəlxalq tərəfdaşlıqda vacib bir ölkə olduğunu nəzərə alan aparıcı qurumlar bu amili hər zaman nəzərə alırlar. Bu baxımdan NATO rəsmisinin Azərbaycanın regionda önəmi ilə bağlı səsləndirdiyi fikirlərə ekspertlər necə yanaşırlar?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə kontekstdən yanaşdı: “NATO baş katibi muavininin ölkəmizə səfəri Alyansla ölkəmiz arasında əməkdaşlığın yüksək səviyyədə olduğunun göatəricisidir. Bu gün NATO Azərbaycanın regionda əhəmiyyətini görür və ölkəmizin Cənubi Qafqazda əsas oyunçu dövlət olaraq roluna xüsusi yanaşır. Hazırda Alyansla ölkəmiz Əfqanıstanda sıx əməkdaşlıq edir. NATO öz hərbi təyinatlı yüklərini Əfqanıstana məhz Azərbaycan vasitəsilə daşıyır. Bundan əlavə, beynəlxalq sülhün qorunmasında, terrorizmlə mübarizədə NATO ilə ikitərəfli əlaqələr uğurla davam edir. Gürcüstanda NATO hərbi təlimlərində Azərbaycanın iştirakı məhz ölkəmizin tərəfdaş kimi Alyansla əlaqələrinin yüksək olduğunun göstəricisidir. Bu gün Azərbaycan regionun aparıcı ölkəsidir. Azərbaycansız, demək olar ki, regionda geosiyasi məsələlərin həlli mümkünsüzdür. Bu gün Azərbaycan Şərqlə Qərbi birləşdirən enerji və nəqliyyat infrastrukturlarına malikdir. Məhz Bakı-Tiflis-Qars dəmir yolu Qərblə Şərq arasında mühüm körpüdür. NATO, həmçinin, ölkəmizin regionda enerji təhlükəsizliyinə töhfə verməsini də nəzərə alır. Ona görə də Azərbaycanın önəminə xüsusi hörmət var”.
Vidadi ORDAHALLI
