Suriyanın Afrin bölgəsində hərbi əməliyyatların başlanmasından sonra ABŞ-la Türkiyə arasında yaranmış gərginlik davam edir. Proseslərin gedişi onu göstərir ki, iki ölkə arasında yaranmış gərginlik hələ uzun müddət davam edəcək.
Baki-xeber.com xəbər verir ki, ABŞ-ın PKK-nın Suriya qolu PYD/YPG-ni silahlandırması və əsasını terrorçuların təşkil edəcəyi 30 minlik ordu qurmaq cəhdləri Türkiyəni sərt addımlar atmağa vadar edib. Ankara sərhədləri yaxınlığında hər hansı terrorçu ordusunun qurulmasını istəmir. Bu fonda Türkiyənin Azad Suriya Ordusu ilə birlikdə Afrində başlatdığı hərbi əməliyyatlar iki ölkə arasında gərginliyi daha da artırıb. Çünki Ankaranın hərbi addımları bir başa ABŞ-ın Suriyada yeganə müttəfiq kimi gördüyü PYD/YPG yaraqlılarının məhv edilməsinə yönəlib. Baxmayaraq ki, Vaşinqton Afrində onun dəstəklədiyi qrupların olmadığını deyir. Bununla yanaşı, Vaşınqton Türkiyənin Afrindəki əməliyyatlarını Suriyada İŞİD militantlarını məğlub etmək səylərinə yardım etmədiyini və hətta maneə törətdiyini bildirir. Ankara isə əməliyyatların tək PKK-ya qarşı deyil, İŞİD-ə qarşı da aparıldığını deyir.
ABŞ-ı narahat əsas məqam isə Türkiyə ordusunun Suriyada anti-terror əməliyyatlarının əhatə dairəsini daha da genişləndirmək niyyətidir. Bu çərçivədə Türkiyənin Birləşmiş Ştatların Suriyada dəstəklədiyi qrupların, eləcə də onlara təlim keçən amerikalı əsgərlərin yerləşdiyi Mənbic regionunda da hərbi əməliyyatlara başlaması qaçılmaz görünür. Artıq rəsmi Ankara bununla bağlı açıq mesajlar da verib. Türkiyə prezidenti Rəcəb Tayyib Ərdoğan bildirib ki, Türkiyə qüvvələri Afrindən şərqə doğru, Türkiyənin Suriya ilə sərhədindən daha irəli istiqamət götürəcək. Prezident Afrindən sonra əməliyyatların yeni hədəfinin Mənbic şəhəri olduğunu və daha sonra “heç bir terrorçu qalmayana qədər” şərqə, İraq sərhədinə qədər irəliləcəyini deyib. Ərdoğan ABŞ prezidenti Donald Trampla telefon danışığına eyham vuraraq deyib: "Məqsədləri terrorla mübarizə deyil, Türkiyənin sərhədləri boyunca terror dəhlizi yaratmaq, sonra da onun üzərindən regionda bitib tükənmək bilməyən bir qan bazarı qurmaqdırsa, olanlara cavabımız budur ki, biz Suriyadakı son terrorçu ortadan qalxana qədər, bu ölkə əsil sahibləri üçün əmin bir yer olana qədər əməliyyatımızı davam etdirəcəyik... Bunu nəzərə almayanlar, bizi yalanlarla, boş manevrlərlə yolumuzdan döndərməyə çalışmasın. Biz o mərhələləri çoxdan geridə qoyduq".
Ərdoğan, Türkiyənin Afrindəki əməliyyatının yalnız və yalnız terror təşkilatlarına, terrorçulara qarşı olduğunu deyib: “Avropa parlamentində bu hərəkatı bir istila hərəkatı olaraq göstərmək istəyənlərə də deyirəm ki, gedin, əvvəl işğal nümunələrini keçmişdə Liviyada, Ruandada, Malidə axtarın".
Ərdoğan həmcinin Türkiyə ordusunun İdlibdə də əməliyyat keçirəcəyi mesajını verib.
Ankaranın Mənbicdə hərbi əməliyyat qərarı, Türkiyə qoşunlarının, bölgədəki 2 minə yaxın ABŞ əsgəri ilə üz-üzə gəlmək təhlükəsini də özü ilə gətirir. Bu təhlükəni nəzərə alan Türkiyənin xarici işlər naziri Mövlud Çavuşoğlu isə bəyan edib ki, Birləşmiş Ştatlar Mənbic regionundan dərhal çıxmalıdır.
Hadisələri dəyərləndirən, Moskva mərkəzli Orta Şərq və Şərqşünaslıq Tədqiqatları İnstitutunun mütəxəssisi Konstantin Truyevtsev deyir ki, ABŞ bölgədə atdığı addımlarla “Marşal Planı”ndan bu yana 70 ildir tanıdığı Türkiyəni itirir: "ABŞ ən radikal kürd qüvvələri ilə bağlarını gücləndirir. Türkiyə əməliyyatları Mənbicə doğru istiqamətləndirərsə, ABŞ-la birbaşa qarşı-qarşıya gələcək. Bu halda ABŞ imicini zədələyə bilər və qarşılığında Türkiyənin düşmənlərinə daha çox silah yardımı edə bilər ki, bu vəziyyət iki ölkə münasibətlərini daha da pisləşdirə bilər.
Qeyd edək ki, Türkiyənin hədəfində olan PKK/PYD terror təşkilatı, ABŞ-ın dəstəyi ilə hazırda Suriya torpaqlarının dörddə birini, Türkiyə-Suriya sərhədinin isə 65 faizini nəzarətdə saxlayır.
TAHİR
