Amerika Birləşmiş Ştatlarının (ABŞ) rəhbərlik etdiyi beynəlxalq koalisiyanın, əsas hissəsini PKK terror təşkilatının Suriya qanadı kürd PYD-nin təşkil etdiyi 30 minlik ordu yaratmaq planı Türkiyə sərt reaksiyasına səbəb olub. Artıq Türkiyə ordusunun ABŞ-ın dəstəklədiyi PYD-yə qarşı hərbi əməliyyatlara başlayacağı an məsələsidir.
Baki-xeber.com Türkiyə mediasına istinadən xəbər verir ki, Türkiyə Silahlı Qüvvələri yanvar ayının sonunadək Suriyanın Afrin şəhərində hərbi əməliyyatlara başlaya bilər. Ordu artıq Afrində PYD və YPG terror təşkilatlarına qarşı əməliyyatlara başlamaq üçün tam döyüş hazırlığı vəziyyətinə gətirilib.
Bununla bağlı ABŞ-na sərt mesajlar verən Türkiyə prezidenti Rəcəb Tayyib Ərdoğan bildirib ki, Türkiyə əvvəlki Türkiyə deyil: “Artıq yeni Türkiyə var. Bu gün arı yuvasına çöp soxulduğunu görürük. Suriya, İraq və Avropada baş verən hadisələrin heç biri bu səhnədən uzaq deyil. Nə edirlər, etsinlər, bizə mane ola bilməyəcəklər. Bəziləri Türkiyəyə yerini sözünü bilsin deyirlər. Ancaq biz Türkiyəyik, biz sıradan bir çadır dövləti deyilik. Bu millət saraylardan doğulub. Bəzi ayağı kirlilər Suriyadan bizi təhdid edir. PYD, YPG, İŞİD hamınız birdən gəlin, nə olursunuzsa olun, hamısı başınıza dəyəcək. Bunun başqa çarəsi yoxdur. Suriyada terrorçuların məskən saldıqları əraziləri hazırda artilleriya atəşinə tuturuq və atəşə davam etdirəcəyik”.
Afrin əməliyyatından sonra Menbiç istiqamətində də əməliyyat keçiriləcəyini deyən Ərdoğan vurğulayıb ki, Türk Silahlı Qüvvələri ən qısa müddətdə Afrin və Menbiç məsələsini həll edəcək: “Hazırlıqlarımız tamamlanıb. Əməliyyat hər an başlaya bilər. Daha sonra növbə digər ərazilərə gələcək. Sərhədlərimiz boyu nəinki 30 min, bir terrorçu qalmayana qədər əməliyyatlarımız davam edəcək”.
“Müttəfiqimiz dediyimiz bir ölkə bütün etirazlarımıza baxmayaraq, sərhədimiz boyu bir terror ordusu qurmağa çalışır. Bunun Türkiyədən başqa hədəfi ola bilərmi? ABŞ-ın artıq niyyətini açıq ifadə etməsindən məmnunluq duyarıq” – deyə Ərdoğan bildirib.
O, qeyd edib ki, ABŞ Türkiyə sərhədi boyu terror ordusu quracağını elan edib: "Bizə düşən də bu terror ordusunu doğulmamış, yerində boğmaqdır. ABŞ onlara 4800 yük maşını silah göndərib. Nə qurursan qur, o 30 minlik terror ordusu orada səni təmsil edə bilməyəcək və rəzil, rüsvay olacaqsan. Bizim müttəfiqlərimizə söylədiyimiz budur ki, terrorçularla, qatil sürüləri ilə aramızda durmayın, yoxsa ortaya çıxan nəticələrə görə biz məsuliyyət daşımayacağıq. Terror təşkilatlarının bazalarında qaldırılan bayraqlarınızı özünüz endirin ki, biz endirib, sizə verməli olmayaq. Terrorçuların üzərlərində olan işarələri sökün ki, terrorçularla birlikdə olan hərbçilərinizi biz torpağa gömmək məcburiyyətində qalmayaq”.
R. T. Ərdoğan qeyd edib ki, ABŞ Türkiyəyə müttəfiq kimi yanaşmalıdır: “Mən onlara demişəm ki, biz o terrorçuları yaxşı tanıyırıq, peşman olacaqsınız. İki gün sonra çətinə düşən zaman ABŞ əsgərlərinə ilk silah çevirən qurmaq istədikləri 30 minlik terrorçu ordusu olacaq”.
Türkiyənin Xarici İşlər Nazirliyi də ABŞ-ın Suriyada qurmağı hədəf götürdüyü 30 minlik terror ordusuna dair açıqlamalarına sərt reaksiya göstərib. Xarici İşlər Nazirliyinin açıqlamasında deyilir: "Terror təşkilatı PYD/PYG-nin ABŞ-ın dəstəyilə Suriyada dırnaqarası “Şimal ordusu” qurmağa hazırlaşdığı barədə beynəlxalq KİV-də yer tutan xəbərlərə görə ABŞ-ın müvəqqəti işlər vəkili yanvarın 10-da Xarici İşlər Nazirliyinə çağırılaraq izahat istənmişdi.
Bu dəfə DEAŞ-la Mübarizə Beynəlxalq Koalisiyasının sözcüsünün verdiyi açıqlamaya istinadla, qismi olaraq PYD/YPG ünsürlərindən qurulacaq və PYD/PKK-nın da tərkib hissəsində iştirak edəcək dırnaqarası “Suriya Demokratik Qüvvələri”nin komandirliyində fəaliyyət göstərəcək 30 min nəfərdən ibarət “Suriya Sərhəd Qüvvəsi” qurulması məqsədilə koalisiyanın “Suriya Demokratik Qüvvələri” ilə birgə işlədiyi barədə xəbərlər yayıldığı görülür.
Türkiyə DEAŞ-la mübarizənin və DEAŞ-dan təmizlənən bölgələrdəki sabitləşdirmə fəaliyyətlərinin bir başqa terror təşkilatı olan PYD/YPG ilə əməkdaşlıq edilərək davam etdirilməsinin səhv və əlverişsiz olduğunu hər platformada və səviyyədə dəfələrlə dilə gətirdi.
Digər tərəfdən dırnaqarası “Suriya Sərhəd Təhlükəsizliyi Qüvvəsi” qurulması barədə koalisiya üzvü olaraq Türkiyəyə müshələt edilməmişdir. Koalisiyanın həmin qərarının koalisiyanın hansı üzvlərinin təsdiqilə qəbul edildiyi məlum deyildir. Təktərəfli atılan addımları Koalisiya adından qəbul edilmiş kimi açıqlamaq DEAŞ-la mübarizəyə də zərər verə biləcək son dərəcə səhv hərəkətdir.
ABŞ-ın vədləri və bəyanatlarına zidd olan şəkildə PYD/YPG ilə əməkdaşlığın davam etdirilməsilə milli təhlükəsizliyimizi və Suriyanın torpaq bütövlüyünü təhlükə ilə üzləşdirən belə təşəbbüslər əsla qəbul edilə bilməz. Bu səhv yanaşmada təkid edilməsini qınayır və Türkiyənin ölkəsinə yönəldiləcək hər növ təhdidi aradan qaldırmağa qətiyyətli və gücü olduğunu bir daha xatırladırıq.”
Türkiyə dövlət aparatı sözçüsü İbrahim Kalın isə ABŞ-ın İŞİD-lə mübarizəyə görə PKK-nın Suriyadakı qolu olan PYD/YPG-yə verdiyi dəstəyə son qoymaq əvəzinə bu terror təşkilatını qanuniləşdirmək və bölgədə daimi hala gətirmək istiqamətində narahatlıq doğuran addımlar atdığını qeyd edib.
Kalın vurğulayıb ki, bu vəziyyət qəbuledilməzdir. Türkiyə öz təhlükəsizliyinin təminatı üçün bütün tədbirləri görəcək. İndiyədək olduğu kimi gələcəkdə də Türkiyə ölkənin daxilində, eləcə də onun hüdudları xaricində terrorla istənilən mübarizə hüququnu özündə saxlayır.
Bu arada, ABŞ-ın PYD/YPG-ni dəstəkləməsinə Suriyada Türkiyə ilə sıx əməkdaşlıq edən Rusiya da sərt reaksiya verib. Rusiya xarici işlər naziri Sergey Lavrov Amerikanın Suriyanın ərazi bütövlüyünün qorunub saxlanmasında maraqlı olmadığını deyib.
Suriyanın şimalında ABŞ-ın rəhbərliyi ilə yaradılması planlaşdırılan və əsas hissəsini PYD-li terrorçuların təşkil etdiyi 30 minlik ordu haqda danışan Lavrov deyib ki, bu müstəqil ölkənin suverenliyinin tapdalanması deməkdir.
"Türkiyəli, iranlı və digər həmkarlarımız kimi biz də bununla bağlı Vaşinqtondan izahat gözləyirik. Bu, Suriyanın ərazisinin bölünməsi baxımından çox ciddi və təhlükəli məsələdir. ABŞ böyük ehtimalla bu ordu vasitəsi ilə Suriyanın Türkiyə və İraqla sərhədinə nəzarət etməyi planlaşdırır" — Lavrov qeyd edib.
Vaşinqtonun yeni planına rəsmi Dəməşqdən də sərt açıqlama verilib. "ABŞ-ın yaratdığı orduda yer alan istənilən silahlı şəxs vətən xaini olaraq görüləcək. Bu plan müstəqilliyimizə və suverenliyimizə birbaşa təhdiddir. Ordumuz ABŞ və onun əlaltılarını ölkədən təmizləmək üçün tam əzmlidir" -Suriyanın Xarici İşlər Nazirliyindən bildirilib.
Qeyd edək ki, bir müddət əvvəl ABŞ-ın Suriyada PYD/YPG ordusu formalaşdırmaq, Suriyanın şimalındakı ərazidə terror təşkilatının hakimiyyəti ilə rəsmən diplomatik əlaqə yaratmaq niyyətində olması barədə məlumatlar yayılıb. Bununla əlaqədar bir həftə öncə ABŞ-ın Türkiyədəki müvəqqəti işlər vəkili Türkiyə Xarici İşlər Nazirliyinə çağırılmış və məsələyə aydınlıq gətirilməsi istənilmişdi. Dünən ABŞ-ın Suriya və İraqda İŞİD-ə qarşı mübarizə məqsədilə qurulan koalisiya əsasını PKK-nın Suriya qolu PYD/YPG-nin təşkil edəcəyi 30 minlik ordu quracağını bəyan edib. ABŞ-ın bu bəyanatı Türkiyə prezidenti Rəcəb Tayyib Ərdoğan yaxın günlərdə Türkiyə ordusunun Suriyada PYD/YPG-nin nəzarətində olan Afrin bölgəsində hərbi əməliyyat aparacağını açıqlamasından sonraya təsadüf edib.
Qeyd edək ki, ABŞ başçılığındakı DEAŞ əleyhinə koalisiyanın sözçüsü polkovnik Ryan Dillon Suriyada ümumilikdə (arxasında PYD/PKK olan) Suriya Demokratik Qüvvələrindən (SDQ) ibarət və 30 min nəfərdən təşkil tapacaq “Sərhəd Təhlükəsizlik Qüvvələri” qurulacağını açıqlayıb.
Dillon “Koalisiya yeni “Suriya Sərhəd Qüvvələri” qurmaq üçün “Suriya Demokratik Qüvvələri” ilə birgə işləyir.” ifadəsindən istifadə etmişdi.
Tahir TAĞIYEV
