ABŞ-da həbsdə olan və bir müddətdir harada olması bilinməyən Türkiyə və İran vətəndaşı olan əslən azərbaycanlı iş adamı Rza Zərrab ətrafında müəmma davam edir.
Baki-xeber.com xəbər verir ki, Türkiyə Xarici İşlər naziri Mövlud Çavuşoğlu məsələ ilə bağlı ABŞ-a 2 nota ünvanladıqlarını, ancaq Zərrabın durumu ilə bağlı hələlik məlumat aldıqlarını vurğulayıb. "Zərrabın ev həbsində, yoxsa həbsxanada və ya başqa bir yerdə olub-olmadığından xəbərimiz yoxdur. Bizə bu barədə məlumat verməyiblər", - Çavuşoğlu qeyd edib.
Türkiyənin notalarının cavabsız qalması ilə yanaşı, məsələ ilə bağlı başqa xəbərlər də yayılmağa başlayıb. Belə ki, Zərrabın prokurorlarla əməkdaşlıq etməyə başladığına dair xəbərlər dolaşır.
Bununla bağlı xəbərlər hələlik təsdiqlənməyib, ancaq ABŞ və Türkiyə KİV-ində bununla bağlı son günlər xəbərlər daha da artıb. Işlə bağlı digər maraqlı məqam isə Zərrabın amerikalı vəkili onunla görüşə bildiyi halda, türk vəkilinin onunla görüşə bilməməsidir.
“The New York Times” qəzeti yazır ki, baş verən bütün hadisələr Zarrabın ittihamları qəbul etdiyini və prokurorlarla əməkdaşlıq etməyə başladığını göstərir.
ABŞ-ın ən nüfuzlu telekanallarından biri olan NBC xəbər kanalı da Rza Zərrabın Nyu-York prokurorluğu ilə əməkdaşlığa başlaması barədə məlumat yayıb. Kanalın iddiasına görə, prokurorluq Rza Zərrabdan Türkiyə hökuməti ilə vəzifədən uzaqlaşdırılan Milli Təhlükəsizlik müşaviri Maykl Flinin arasındakı əlaqələrə dair məlumatlar tələb edə bilər.
Zərrabun həbsxanadan çıxarıldığını, lakin hələ də nəzarət altında prokurorlarla əməkdaşlıq etdiyini iddia edən telekanal, yaydığı bu məlumatları 2 mənbədən dəqiqləşdirdiyini bildirib. Kanalın xəbərinə görə, Türkiyə Prezidenti Rəcəb Tayyib Ərdoğan Rza Zərrab bu proseslərin qarşısını almaq üçün xeyli cəhdlər göstərib.
"Ərdoğan 2016-cı ildə ABŞ vitse-prezidenti Co Baydendən Zərraba qarşı irəli sürülmüş iddiaların ləğvini və istintaqı başladan Nyu-Yorkun Cənub Dairə prokuroru Preet Bhararanın işdən çıxarılmasını tələb etmişdi", - deyə telekanal iddiasında qeyd edib.
Telekanal Tramp prezident seçildikdən sonra Bhararanın mart ayında vəzifəsindən uzaqlaşdırılmasına da diqqət çəkir.
"ABŞ xüsusi işlər prokuroru Robert Müller dekabr ayında Milli Təhlükəsizlik müşaviri olaraq vəzifəyə başladıqdan sonra Maykl Flinin Fətullah Gülənin qaçırılıb Türkiyəyə gətirilməsi ilə Zərrab iddiasının ləğvi üçün Türkiyədən 15 milyon dollar alıb-almaması mövzusunu da araşdırırıq", - deyə bildirilir.
Zərrabın vəkillərindən biri olan Nyu-Yorkun keçmiş meri Rudi Culiani ilə Mixael Mukaseyimin Türkiyəyə gedərək vəziyyəti Ərdoğanla görüşüb müzakirə etmələri barədə iddialara diqqət çəkən NBC bu cümlələrə yer verib: "Nyu-Yorkun Cənub Dairə prokurorluğu və Zərrabın vəkillər qrupunun sözçüsü Benjamin Brafman mövzu ilə bağlı açıqlama verməkdən imtina edir. Həmçinin Mukasey, Rudi Culian və Bayden bu günə qədər iddialarla bağlı onlara ünvanlanmış sorğuya da cavab vermirlər".
Son məlumatlara görə, Türkiyənin Ali Məhkəməsi işi araşdıran ABŞ-ın Nyu-York şəhərinin keçmiş prokuroru Pret Bharara, prokuror Con Kim və digər işçilər haqqında istintaq işi başladıb. Buna səbəb isə Rza Zərrabın məhkəmə prosesi ilə bağlı qaranlıq qalan məqamlar olub.
Ali Məhkəmə Rza Zərrab istintaqında istifadə edilən sənəd və dəllilərin oğurluq, saxta olduğunu və qaynağının bəlli olmadığını bildirib.
Məsələyə münasibət bildirən Türkiyənin müxalif Cümhuriyyət Xalq Partiyasının sədr müavini Ərdal Aksüngərin fikrincə, ABŞ Zərrab davasından Türkiyəyə qarşı dəyənək kimi istifadə edəcək.
“Zərrab itməyib. O, sadəcə olaraq, ABŞ hökumətinə etiraf edərək, şahidlərin qorunması proqramı çərçivəsində müdafiə altına alına bilər. Vəkillərinin Zərrab ilə görüşməməsi və harada olduğunu bilməmələri mümkün deyil. Əgər vəkilləri ilə Zərrab görüşmürsə, o zaman bunu biznesmenin özü istəmir. 27 noyabrda başlayacaq məhkəmə prosesində biz Zərrabı şahid olaraq görə bilərik. Mətbuatda onun ABŞ hökuməti ilə razılaşdığı kimi bir görüntü yaradılır. Bunun həqiqət olma ehtimalı isə 90%-dir. 2 ildir davam edən davada Rzaya göstərilən diqqət “Xalq Bank” və Hakan Atillaya göstərilmir. Burada Türkiyəni məhkum etmək istəyirlər. FETÖ bu davadan manipulyasiya kimi istifadə edir. Bu dava Türkiyəyə qarşı dəyənək kimi istifadə edilə bilər”, – deyə o bildirib.
Qeyd edək ki, əslən azərbaycanlı olan iş adamı Rza Zərrab keçən ilin martında ABŞ-ın Mayami şəhərində həbs olunub. Ona qarşı bank fırıldaqçılığı, çirkli pulların yuyulması, İrana qarşı embarqonu dəlmək ittihamı irəli sürülüb.
TAHİR
