Mübariz Əhmədoğlu: “Onun istefası ilə bağlı edilən tələblər...”
İraq Kürdüstanının müxalifəti lider Məsud Bərzanini istefaya getməyə çağırıb. Əsas müxalifət partiyası "Qorran" və ya "Dəyişikliklər Hərəkatı" hesab edirlər ki, Bərzani İraq Kürdüstanının başçısı postundan istefa verməli və milli qurtuluş hökuməti formalaşdırılmalıdır.
Partiya Bərzanini Kərkükün İraq Kürdüstanının müstəqilliyi haqqında referendumla əlaqədar Bağdadla Ərbilin qarşıdurmasından sonra 16 oktyabrda itirilməsi səbəbindən kürdlərin fəlakətə düçar olmalarında ittiham edir.
"Kürdüstanın prezidentliyi buraxılmalı və indiki vəziyyətdən çıxmaq üçün milli qurtuluş hökuməti formalaşdırılmalıdır", - deyə partiya rəhbərliyinin kürd şəhəri Süleymaniyyədəki görüşündən sonra dərc edilmiş bəyanatında deyilir. Bəyanatda, həmçinin, bildirilir ki, "Qorran" kürdlərin öz müqəddəratını təyin etmə hüququnu dəstəkləyir, ancaq hesab edir ki, müstəqillik haqqında referendum üçün vaxt uğursuz seçilmişdi.
Yaranmış vəziyyət Bərzaninin sonunun çatdığını deməyə əsas verirmi?
Politoloq Mübariz Əhmədoğlunun sözlərinə görə, Bərzani özünü və xalqını çətin vəziyyətə salıb: “İran da, Türkiyə də vaxtilə İraqdakı kürdlərlə əməkdaşlıq edib. Onlar İraqın ərazi bütövlüyünü dəstəkləyə-dəstəkləyə, həm də arzulayırdılar ki, kürdlərin müstəqil idarəçilik forması olsun. Amma təbii ki, bu müstəqillik İraqın ərazi bütövlüyü çərçivəsində olmalı idi. İraq Kürdüstanının müstəqillik haqqında referendum keçirməsi başqa məsələdir. Yəni Kürdüstanın referendumuna dünya ictimaiyyəti, Türkiyə, İran münasibət bildirdi. Heç kəs də İraq Kürdüstanında keçirilən referendumu qəbul etmədi və hamı İraqın ərazi bütövlüyünü dəstəklədi. Kürdlər İraqa qarşı ikinci davanı açdılar. Yəni onsuz da kürdlərin müstəqillik haqqında referendum keçirməsi İraq konstitusiyasına müharibə elan etmək idi. Eyni zamanda kürdlər Kərküklə bağlı mövqelərində həm də Bağdadla Ərbil arasında olan razılaşmaya da müharibə elan etdilər. Əslində, Kərkük birbaşa Bağdadın idarəçiliyində olan ərazidir, amma kürdlər dedilər ki, həmin ərazini vermirik. İndi buna görə Bağdad ilk növbədə öz haqqın tələb edir və İraqın tam haqqı var ki, Kərkükə qoşun yeritsin, oranı kürdlərdən azad etsin. Bunu da edir.
Onu da qeyd edim ki, bu, kürdlərin çox böyük səhvidir. Bu səhvdən də istifadə edərək İran, Türkiyə və İraq kürdləri çox çətin vəziyyətə sala bilərlər. İraq Kürdüstanı rəhbərliyinin ən böyük səhvi İsrailin siyasi dəstəyini yaxın buraxması oldu. Məhz İsrail faktına görə Türkiyə də, İran da axıra qədər çalışacaqlar ki, kürdlər xeyli zəif vəziyyətdə qalsınlar. Buna görə də Bərzani siyasi cəhətdən ciddi səhvə yol verdi. Onun istefası ilə bağlı edilən tələblər isə baş verən hadisələrin fonunda təbiidir”.
Məhəmmədəli QƏRİBLİ
