Azər Həsrət: “Paşinyan və komandası bütün mümkün vasitələrlə Rusiyadan birdəfəlik qopmağa çalışır”
Ermənistan parlamentinin sədri Alen Simonyan bildirib ki, Ermənistana qarşı hakimiyyət dəyişikliyi məqsədilə siyasi əməliyyat həyata keçirməyə cəhd edilir. O, bunu Rusiya ilə münasibətlər kontekstində deyərək qeyd edib ki, Ermənistanı “quberniya”ya çevirməyə imkan verməyəcəyik:
“Əgər Ukraynada onlar öz maraqlarını hərbi yolla irəli aparmağa çalışırlarsa, Ermənistanda siyasi əməliyyat, hakimiyyətin ələ keçirilməsi cəhdi baş verir. Hazırda bizim demokratikliyimizi bizə qarşı istifadə etməyə çalışırlar: deyirlər ki, sizdə internet açıqdır, biz öz rublumuzla bu internetdə o qədər reklam alacağıq ki, hər şey bizim olacaq. Biz Ermənistanı “quberniya”ya çevirməyə imkan verməyəcəyik. Biz Belarus kimi idarə olunmayacağıq”.
Sözügedən məsələ ilə bağlı fikirlərini baki-xeber.com-la bölüşən siyasi şərhçi Azər Həsrət hesab edir ki, həqiqətən Rusiya Ermənistanı yenidən öz təsir dairəsinə salmaq üçün əlindən gələni edir: “Ancaq Paşinyan və komandası bütün mümkün vasitələrlə Rusiyadan birdəfəlik qopmağa çalışır. Parlament spikeri Alen Simonyanın açıqlaması bunu özündə ehtiva edir. Görünən odur ki, erməni xalqının böyük əksəriyyəti Paşinyanın bu seçimini təqdir edir və onun arxasındadır. Bu da təbii ki, Rusiyanı ciddi şəkildə narahat edir. Demək istədiyim odur ki, Rusiya bütün çirkin vasitələrlə Ermənistanı doğurdan da öz vassalına çevirmək istəyir. Yəni köhnə dönəmə qaytarmağa çalışır. Əlbəttə, buna nail ola bilməyəcəklər. Çünki əgər xalqın böyük çoxluğu Rusiyaya qarşıdırsa, yenidən vassal olmağı seçməyəcəksə, əlbəttə, Rusiyanın edə biləcəyi bir şey yoxdur. Düşünürəm ki, bu, prosesdə, hərəkatda Ermənistana Azərbaycan, qardaş Türkiyə, hətta Gürcüstan belə, yardımçı olmalıdır. Demirəm gedib onların daxili işinə qarışaq. Əlbəttə ki, yox. Ancaq ümumi götürəndə əlimiz və gücümüz nəyə çatırsa, onun vasitəsi ilə elə etməliyik ki, Paşinyan hakimiyyəti davamlı olsun. Rusiya yenidən Ermənistanda öz təsirini bərpa edə bilməsin. Növbəti mərhələdə isə, Rusiyanın hərbi bazaları da Ermənistandan çıxarılmalıdır. Bununla da Cənubi Qafqaz bütövlükdə Rusiyanın təsir dairəsindən tamamilə çıxmış olacaq. Daha sonra qonşu Gürcüstanın ərazi bütövlüyünün bərpası gündəmdə saxlanılmalıdır. Bütün bunlardan sonra Şimali Qafqazın azadlıq hərəkatı daha sürətlə həyata keçirilə bilər. Yəni Cənubi Qafqaz tam olaraq Rusiyanın təsir dairəsindən çıxacağı təqdirdə, Şimali Qafqazın da azad olması üçün yollar açılacaq”.
Vidadi ORDAHALLI
