Xaqani Cəfərli: “Davos İqtisadi Forumunun işinə də mənfi təsir edəcək”
İsveçrənin Davos şəhərində 2026-cı ilin Dünya İqtisadi Forumu keçirilir. Qrenlandiya adasına görə ABŞ-Avropa ziddiyyətləri mövcuddur. Bu məsələnin Davos İqtisadi Forununun işinə necə təsir edəcəyi müzakirə olunur.
Məlumdur ki, Qrenlandiya ətrafında ABŞ-Avropa ziddiyyətləri artır. Ekspertlər hesab edir ki, ABŞ və Avropa arasında Qrenlandiya ətrafında baş verənlər əsasən, onun strateji geoiqtisadi və hərbi əhəmiyyəti, xüsusən Arktikadakı təbii sərvətlər, dəniz yolları və müdafiə sistemləri ilə bağlıdır. Qeyd olunur ki, Tramp administrasiyasının bəyan etdiyi kimi ABŞ-ın istəyi adanı almaqdır, bu da Avropa müttəfiqlərində, xüsusən NATO üzvü Danimarka və Kanadada narahatlıq doğurur, çünki bu, kollektiv Qərb daxilində gərginliyi artırır.
Qrenlandiyanın üstündə ABŞ-Avropa ziddiyyətləri Davos İqtisadi Forununun işinə necə təsir edəcək?
Nəzərə alsaq ki, 8 Avropa dövləti bəyanat yaydı ki, Tramp NATO-nu dağıdır. Bu baxımdan, bu ziddiyyətlər iqtisadi forumun işinə necə təsir edəcək?
“Avroatlantik münasibətlərin 20 yanvar 2025-ci ildən öncəyə qayıtması üçün Ağ Evin sahibi dəyişməlidir”
Politoloq Xaqani Cəfərli baki-xeber.com-a bildirdi ki, Donald Trampın Qrenlandiyanı ilhaq etmək niyyəti ABŞ-la Avropa arasındakı 80 illik Avroatlantik münasibətləri zədələyib. “Qənaətimcə, Trampın hakimiyyətdə olduğu müddətdə Avroatlantik münasibətlərin normallaşması, əvvəlki vəziyyətinə qayıtması mümkün deyil. Buna görə də Davos İqtisadi Forununun işinə də mənfi təsir edəcək.
NATO Avroatlantik əməkdaşlığın nəticəsi olduğu üçün yaranmış vəziyyət Şimali Atlantika Alyansına da təsir edir. Bütün bunlar isə onu deməyə imkan verir ki, Qrenlandiyanın ilhaqının qarşısını alacaq, eyni zamanda da Trampı qane edəcək çıxış yolu tapılana qədər münasibətlər gərgin olaraq qalacaq”.
X.Cəfərlinin fikrincə, əgər, Qrenlandiyanın ilhaqının qarşısını alacaq, eyni zamanda Trampın istəklərini təmin edəcək çıxış yolu tapılsa münasibətlərdəki gərginlik azalacaq. “Ancaq Avroatlantik münasibətlərin 20 yanvar 2025-ci ildən öncəyə qayıtması üçün Ağ Evin sahibi dəyişməlidir”-deyə X.Cəfərli bildirdi.
İradə SARIYEVA
