Əli Orucov: “Prezidentin belə bir çıxışı olarsa, bu, çox böyük marağa səbəb olacaq”
Məlum olduğu kimi, sentyabrın 22-də Prezident İlham Əliyev BMT Baş Assambleyasının 80-ci sessiyasında iştirak etmək üçün ABŞ-ın Nyu-York şəhərinə işgüzar səfərə yollanıb. Prezidentin BMT sessiyası çərçivəsində keçirdiyi görüşlər həm regional sülh gündəliyinə, həm də qlobal maliyyə və enerji əməkdaşlığına dair müzakirələri əhatə edib.
Diqqəti çəkən məqamlardan biri də ondan ibarətdir ki, İlham Əliyev prezident seçiləndən sonra 3 dəfə BMT tribunasında çıxış edib. Cənab İlham Əliyev BMT Baş Assambleyasının ümumi müzakirələrində ümumilikdə dörd dəfə çıxış edib - 2003-cü ildə Azərbaycanın Baş naziri qismində, 2004, 2010 və 2017-ci illərdə isə Azərbaycan Respublikasının Prezidenti kimi.
Bunların hər biri özünəməxsus xüsusiyyəti ilə səciyələnir. O mənada ki, hər üç dövr dünyada gərgin siyasi proseslərin getdiyi bir vaxta təsadüf edir. Məsələ ondadır ki, 2004-cü ildə postsovet məkanında rəngli inqilablar yaşanırdı. Çox gərgin və mürəkkəb bir siyasi atmosfer hökm sürürdü. O cümlədən, Azərbaycanda da seçki yolu ilə formalaşan hakimiyyəti bu yolla devirmək istəyən xarici dairələr var idi. Ərazilərimiz işğal altında idi və Qarabağın azad edilməsi bir nömrəli məsələ idi. Belə bir dövrdə Prezident İlham Əliyev BMT Baş Assambleyasında çıxış edərək, Azərbaycanın mövqeyini ortaya qoydu. Prezident Əliyevin BMT ali kürsüsündə ikinci çıxışı 2010-cu ildə oldu. O dövrdə ABŞ-da prezident Barak Obamanın timsalında Demokratlar Partiyası hakimiyyətdə idi. Məhz həmin ildə “Ərəb baharı” adı altında bir sıra ərəb ölkələrində hakimiyyətlərin güc yolu ilə devrilməsi başlandı. Bu da bəzi ölkələrdə xaosa səbəb oldu. Həmin ildə artıq Azərbaycan xeyli güclənmişdi. Yeddi il idi Prezident Əliyev ölkəyə rəhbərlik edirdi. Güclü ölkənin lideri olaraq, ölkə başçısı BMT tribunasında çıxış edib daha qətiyyətlə Ermənistanın işğalçı siyasətini ən ali kürsüdə gündəmə gətirdi. Ölkəmizin müstəqil siyasət yeritdiyini əyani şəkildə bir daha bəyan etdi. Prezident Əliyevin BMT-də 3-cü çıxışı 2017-ci ildə olub. O vaxt ABŞ-a Donald Tramp rəhbərlik edirdi. Həmin ilə qədər Azərbaycanla bağlı bir sıra hadisələr baş verdi. 2015-ci ildə Azərbaycanda iki dəfə devalvasiya baş vermişdi. Buna baxmayaraq, ölkə başçısı iqtisadiyyatı yenidən toparladı. O cümlədən, 2016-ci ilin aprelində baş verən 4 günlük müharibə nəticəsində ordumuz vacib strateji yüksəklikləri azad etdi. Prezident Əliyev Ermənistana və onun arxasında dayanan güclərə praktiki olaraq göstərdi ki, Azərbaycan işğalla barışmayacaq. Aprel döyüşləri bunun real xəbərdarlığı idi. 1994-cü ildə əldə edilən atəşkəsdən 22 il sonra Azərbaycan hərb meydanında gücünü göstərdi. Məhz bütün bunlardan sonra Prezident Əliyev 2017-ci ildə BMT kürsüsündə çıxış etdi.
Bu gün Prezident İlham Əliyev ərazi bütövlüyünü və suverenliyini tam təmin edən qalib ölkə başçısı kimi BMT sessiyasında iştirak edir. Bir sıra dövlətlər, dairələr Azərbaycanın öz ərazi bütövlüyünü təmin edə bilməsini heyranlıqla izləyir. Azərbaycan nümunəsini öyrənirlər. Hazırda da dünyada çox mürəkkəb vəziyyət hökm sürür. Qütbləşmə dərinləşir. Rusiya ilə Ukrayna arasında müharibənin sonu görünmür. Azərbaycanla Ermənistan arasında isə sülh sazişinin imzalanacağı gündəmdədir. Biz bilmirik ölkə başçısı çıxış edəcək, yoxsa etməyəcək. Ancaq belə bir mürəkkəb dövrdə BMT tribunası Prezident Əliyevin çıxışına ehtiyac duyur. Çünki 1945-ci ildən sonra qurulan dünya düzəni artıq işləmir, beynəlxalq hüquq işləksiz hala gəlib. Yeni dünya düzəninin qurulması ilə bağlı çağırışların artdığı bir dövrdə buna sanki bir ehtiyac duyulur. O baxımdan, bu dəfə də Prezident İlham Əliyev çıxış etsə, bu, 4-cü çıxış olacaq. Son 23 ildə dövlət başçısının dördüncü çıxışı gözlənilir.
“İşğalla barışmamağı bütün dünyaya göstərdi”
Sözügedən məsələni “Bakı-Xəbər”ə şərh edən AMİP funksioneri Əli Orucov hesab edir ki, qalib ölkənin dövlət başçısı olaraq Prezidentin belə bir çıxışı olarsa, bu, çox böyük marağa səbəb olacaq: “Çünki Azərbaycanın əldə etdiyi nəticə ortadadır. Bunu bütün dünya görür. Ona görə ki, Azərbaycan uzun illər beynəlxalq hüququn işləksizliyindən, BMT-nin və digər beynəlxalq qurumların heç nəyə yaramayan qərarlarından əziyyət çəkib. Beynəlxalq hüquq işləsəydi, ərazilərimiz 30 ilə yaxın işğal altında olmazdı, qaçqın və məcburi köçkünlər olmazın əziyyətlər çəkməzdilər. Bu, həm də digər dövlətlərə görk olardı. O mənada ki, beynəlxalq hüquqa hörmət edərdilər, Qəzzada insanlıq faciəsi bəlkə də yaşanmazdı. Azərbaycan öz gücü, əsgərlərimizin canı-qanı hesabına sahədəki reallıqları dəyişdi. İşğala son qoyuldu. İşğalla barışmamağı bütün dünyaya göstərdi. Bu baxımdan hesab edirəm ki, Prezident çıxış etsə, bu, ciddi marağa səbəb olacaq”.
Vidadi ORDAHALLI
