Azər Allahverənov: “Kütləvi axın olmasa da, müəyyən geri dönən şəxslər olacaq”
Rusiya Ukraynaya qarşı işğalçı müharibəyə başladıqdan sonra qeyri-rus millətlərə qarşı qanun və zor tətbiqinə əsaslanan seleksiya siyasəti daha da dərinləşib. Əvvəlcə giriş-çıxış qaydaları sərtləşdirildi və nəticədə çoxsaylı insan ölkəni tərk etmək məcburiyyətində qaldı.
Daha sonra Moskva və digər regionlarda miqrantların əmək bazarına çıxış imkanları məhdudlaşdırıldı. Beləliklə, bir çox miqrant ya ölkəni tərk etdi, ya da kölgə iqtisadiyyatına keçdi.
Yeni mərhələdə isə vətəndaşlıq almış qeyri-rusların sistemdən kənarlaşdırılması hədəflənib. Bu məqsədlə rusların “milli hərbə-zorba simvolu”na çevrilmiş OMON meydana çıxarılıb. Son olaraq Yekaterinburq şəhərində baş vermiş cinayət hadisəsi hər kəsə bəllidir. Yekaterinburq şəhərində azərbaycanlılara zorakılıq tətbiq edilib, vətəndaşlar işgəncəyə məruz qalıb.
Maraqlıdır, son proseslər Rusiyada yaşayan azərbaycanlıların ölkəmizə axını ilə nəticələnəcəkmi?
“Gözləniləndir ki, Rusiyada əmək fəaliyyəti ilə məşğul olan azərbaycanlı miqrantların sayında müəyyən azalmalar olsun”
Millət vəkili, “Avrasiya Miqrasiya Təşəbbüsləri Platforması” İctimai Birliyinin sədri Azər Allahverənov “Bakı-Xəbər”ə şərhində qeyd etdi ki, Rusiyada azərbaycanlı miqrantlara qarşı baş verən hüquqazidd əməllər ciddi narahatlıq doğuran hal kimi dəyərləndirilməlidir: “Yaxın tarixə nəzər yetirdikdə görürük ki, son zamanlar azərbaycanlı miqrantlara qarşı müxtəlif səviyyələrdə hüquq pozuntuları artmaqdadır. İstər Azərbaycan Respublikası vətəndaşı olub Rusiyada əmək fəaliyyəti ilə məşğul olan şəxslər, istərsə də Rusiya vətəndaşı olan etnik azərbaycanlılar eyni dərəcədə bu cür qanunsuz münasibətlərin qurbanına çevrilirlər. Bu, Rusiyada miqrantlara qarşı aparılan sistematik, ideoloji və ayrıseçkilik yönümlü siyasətin göstəricisidir. Miqrantlara qarşı bu münasibət, xüsusilə də bəzi siyasi dairələr tərəfindən təşviq edilən şovinist və imperiya zehniyyətindən qaynaqlanır. Son zamanlar Rusiyada miqrantlara qarşı yönələn sərt siyasətin şahidiyik. Miqrantlara qarşı münasibət ilkin mərhələdə hüquqi müstəvidə müəyyən qaydaların tətbiq edilməsi, miqrasiya qanunvericiliyində müəyyən dəyişikliklərin edilməsi və yeni prosedurların müəyyən olunması yolu ilə həyata keçirilirdisə, indi bununla kifayətlənməyən Rusiyanın aidiyyəti strukturları, xüsusilə də DİN-in müvafiq bölmələri axtarışlar, müxtəlif məqsədlərlə miqrantların çalışdığı sahələrə, yaşadığı ünvanlara basqınlar edir. Yekaterinburqda baş vermiş məlum hadisə, xüsusilə də azərbaycanlı miqrantların ölümü ilə nəticələnən bu kobud şəkildə tətbiq olunan siyasət digər şəhərlərdə də yaşanır. Voronej, Moskva və digər şəhərlərdə həm azərbaycanlı, həm də xüsusilə Mərkəzi Asiyadan olan miqrantların çalışdığı, əmək fəaliyyəti ilə məşğul olduğu yerlərə də basqınlar davam etdirilib. Zaman-zaman Rusiyada miqrantlara qarşı bu kimi etiraz dalğası miqrantların sayının azalmasına gətirib çıxarır. Yəni miqrantların bir qisminin öz ölkələrinə qayıtması ilə nəticələnir. Hazırda gözləniləndir ki, Rusiyada əmək fəaliyyəti ilə məşğul olan azərbaycanlı miqrantların sayında müəyyən azalmalar olsun. Çünki ticarət, eləcə də digər sahələrdə bu tipli yanaşmalar, təzyiq üsulları tətbiq olunarsa, təbii ki, bu insanlar müəyyən müddətə bu və ya digər sahələrdə əmək fəaliyyətini dayandırmaq məcburiyyətində qalacaqlar. Hesab edirəm ki, kütləvi axın olmasa da, müəyyən geri dönən şəxslər olacaq. Digər bir tərəfdən, son 2-3 il ərzində tətbiq edilən sərt miqrasiya qaydaları müəyyən sayda azərbaycanlı miqrantların Rusiya ərazisində sayının azalmasına gətirib çıxarıb. İstənilən halda bu, bizim miqrantların mövcud vəziyyətinə mənfi təsir edəcək”.
Həmsöhbətimiz onu da əlavə etdi ki, Rusiyada miqrantlara qarşı ictimai qınaq formalaşdırılır. Rusiya-Ukrayna müharibəsində iştirakdan imtina edənlər "etibarsız", "satqın" kimi təqdim olunur və bu, cəmiyyət arasında miqrantlara qarşı mənfi rəyin formalaşmasına səbəb olur. Ruslar miqrantlara qarşı hücumlara, zorakılığa əl atmaqdan çəkinmirlər: “Bu, irqi ayrıseçkiliyin ən qabarıq və ifrat formasına çevrilib. Rusiya həqiqətən də özünü demokratik dövlət kimi təqdim etmək niyyətindədirsə, bu ilk növbədə insan hüquqlarının qorunması və təmin olunması ilə başlamalıdır”.
Günel CƏLİLOVA
