Zaur İbrahimli: “...İlk növbədə həm Qlobal Cənub, həm də Qoşulmama Hərəkatı ölkələrinin səsinin qlobal arenada daha güclü eşidilməsinə nail olacaq”
Bakıda Qlobal Cənub QHT Platformasının təsis edilməsini həm yerli, həm də beynəlxalq ictimaiyyət çox mühüm hadisə olaraq dəyərləndirilir.
Paytaxımızda keçirilən “Həmrəy fəaliyyət: yeni və ədalətli dünya üçün Qlobal Cənub QHT-lərinin gücləndirilməsi” Forumu çərçivəsində təşkil olunan “Artıq ikili standartlar yoxdur: QHT-lər katalizator kimi, Qlobal Cənubda ədalətli inkişaf” mövzulu paneldə Niger Milli Gənclər Şurasının nümayəndəsi Aliou Omarou deyib ki, ölkəsi illərlə beynəlxalq cəmiyyətin ikili standartlarına şahid olub. “Bu ikili yanaşmalar indi artıq sistemli bir üsula çevrilib. Bəziləri üçün hüquq və insan haqları prinsip, digərləri üçün isə sadəcə, alət halına gətirilib”.
O qeyd edib ki, münaqişələr, çətinliklər ən çox yerli əhaliyə təsir edir: “Mənim ölkəmin olduğu bölgə - Sahel və Qərbi Afrika iqlim dəyişikliyindən ən çox əziyyət çəkən coğrafiyalardan biridir. Amma qərb ölkələri bu vəziyyətə sadəcə baxmaqla kifayətlənirlər. Bizim torpaqlarımız qızıl, uran, neft, qaz və digər təbii ehtiyatlarla zəngindir. Ancaq bu sərvətlər bizə firavanlıq yox, istismar gətirib. Resurslarımız gizli şəkildə illərlə Qərb ölkələri tərəfindən istismar olunub. Bu istismar fəaliyyəti yalnız iqtisadiyyata deyil, həm də iqlimə böyük ziyan vurub. Daha acınacaqlı hal odur ki, Azərbaycan kimi ölkələr bizə yardım etmək istədikdə, “qarışmayın” deyirlər. Çünki bu yardım onların maraqlarına ziddir”.
Forumun nigerli iştirakçısı Cənub QHT-lərinin birgə fəaliyyət göstərməsinin həyati əhəmiyyət daşıdığını vurğulayıb. Onun sözlərinə görə, Azərbaycanın bu sahədə atdığı addımlar, Forum çərçivəsində Cənubun QHT-lərinə söz haqqı verməsi olduqca təqdirəlayiqdir. “Çünki bu təşəbbüslər təkcə siyasi deyil, həm də insani məsələdir və bu, bizim cəmiyyətlərimizin gələcəyi üçündür. İnanıram ki, biz birgə səylərlə ədalətli, davamlı və suveren gələcək qura bilərik”, - deyə Aliou Omarou əlavə edib.
Ədalətli dünya üçün Qlobal Cənub QHT platformasının gücləndirilməsi nə kimi rol oynaya bilər?
“Əminəm ki, Qlobal Cənub QHT Platformasını çox yaxın zamanlarda həm beynəlxalq təşkilatlar, həm də BMT müstəvisində görəcəyik və o beynəlxalq münasibətlər sistemində, qlobal arenada fəal aktorlardan biri olacaq”
Milli QHT Forumu İdarə Heyətinin üzvü Zaur İbrahimli “Bakı-Xəbər”ə bildirdi ki, Azərbaycan Milli QHT Forumunun təşəbbüsü ilə Bakıda Qlobal Cənub QHT Platformasının təsis olunması, ona rəhbərliyin Azərbaycana həvalə edilməsi ölkəmizin Qlobal Cənub və Qlobal Şimal arasında körpü rolunu oynamaq, səmərəli dialoq qurmaq və əməkdaşlığı inkişaf etdirmək siyasətini tamamlayır: “Bilirik ki, Azərbaycan Qoşulmama Hərəkatına sədrliyi dövründə instisional inkişafa nail olmuşdu, Hərəkatın dünyada daha çox tanınmasına imkan yaratmışdı. Eyni zamanda təşkilatın həm gənclər qolu yaradılmışdı, həm də daxili idarəetməsi təkmilləşdirilmişdi. Bakıda Qlobal Cənub QHT Platformasının yaradılması əslində elə Qoşulmama Hərəkatının QHT-lərin, vətəndaş cəmiyyətinin bir mərkəzdə əlaqələndirilməsi deməkdir. Azərbaycan bu missiyanı da uğurla yerinə yetirdi. Bu olduqca çətin bir missiya idi, 116 ölkəni bir araya gətirmək, konsensusa nail olmaq, eyni hədəflər ətrafında birləşdirmək əlbəttə asan iş deyildi. Lakin bu Azərbaycana, onun rəhbərliyinə olan inam və etibarın bir daha göstəricisi oldu. Qoşulmama Hərəkatı üzvləri, Qlobal Cənub ölkələri artıq Azərbaycanın inklüziv dünya, davamlı inkişaf, müstəmləkəçiliyə qarşı mübarizə, humanitar dəyərlərin qorunması istiqamətdə yürütdüyü siyasəti dəstəkləyirlər. Artıq onlarda Azərbaycanın bu dəyərləri müdafiə etmək gücündə olduğuna bir inam yaranıb. Bu inam və etibar da eyni zamanda transformasiya oldu və Qlobal Cənub QHT Platforması məhz Bakıda təsis olundu. Bu platformanın yaradılması ilk növbədə həm Qlobal Cənub, həm də Qoşulmama Hərəkatı ölkələrinin səsinin qlobal arenada daha güclü eşidilməsinə nail olacaq”.
Z.İbrahimli qeyd etdi ki, bu platforma Qlobal Cənub və Qoşulmama Hərəkatı üzvləri üçün aktual məsələlərin daha fəal müzakirəsini təşkil edəcək, eyni zamanda həm vətəndaş cəmiyyətinin səylərini birləşdirəcək, həm qarşıda duran problemlərin, xüsusən iqlim ədalətinin təmin olunması ilə bağlı məsələlərin, yoxsulluğa qarşı mübarizənin aparılmasında, həmçinin özəl sektorun cəlb olunmasında, beynəlxalq əməkdaşlığın inkişaf etdirilməsində mühüm töhfə verəcək: “Eyni zamanda QHT-lərin bir araya gəlməsi həmişə innovasiyalara yol açır, yeni yanaşmalar ortaya qoyur, mövcud problemlərə yeni baxışı müəyyənləşdirməyə imkan verir. Qlobal Cənub QHT Platforması da məhz belə bir müstəvi olacaq. Azərbaycana həvalə olunmuş Qlobal Cənub QHT platformasının instisional inkişafı ilə bağlı işlərin öhtəsindən uğurla gəlinəcək. Artıq Azərbaycan COP29-da sübut etdi. COP29 QHT koalisiyası yaradıldı və COP tarixində ilk dəfə olaraq uğurla fəaliyyət göstərdi. Sonradan həmin koalisiya da Qlobal Cənub QHT Platformasına transformasiya olundu. Əminəm ki, Qlobal Cənub QHT Platformasını çox yaxın zamanlarda həm beynəlxalq təşkilatlar, həm də BMT müstəvisində görəcəyik və o beynəlxalq münasibətlər sistemində, qlobal arenada fəal aktorlardan biri olacaq”.
İradə SARIYEVA
