"Bayden administrasiyası, dövlət katibi olmuş Blinken dünyada yeni münaqişələrin, müharibənin yaranmasının birbaşa səbəbkarları, günahkarlarıdırlar"
Co Bayden administrasiyasının həyata keçirdiyi yanlış siyasət ABŞ-ın dünyada etibarına, nüfuzuna ciddi təsir göstərir. Belə ki, bu gün dünya xalqları, dünya dövlətləri ABŞ-a inanmır, bu ölkəni dünyanı qarışdıran, təcavüzkar planlar quran ədalətsiz, riyakar bir dövlət kimi qiymətləndirirlər. Sözsüz ki, bu rəyin də yaranmasında Bayden administrasiyasının ikiüzlü, riyakar siyasəti əsas rol oynayıb, eyni zamanda bu ölkənin Dövlət katibi olmuş Entoni Blinkenin də burada "rolu" az olmayıb, o da var gücü ilə çalışıb ki, ABŞ nüfuzdan düşsün.
Dünyada ABŞ-a inamın, etimadın sarsılması ABŞ-ın siyasətindəki ikili standartların daha qabarıq şəkildə təzahür etməsində, ABŞ-ın dünyada biabır olmasında və sair kimi nəticələrdə son beş ildə Bayden administrasiyasının, şəxsən Baydenin və Blinkenin məsuliyyəti və rolu nə qədərdir?
"İkiüzlü, riyakar, qarışdırıcı siyasət bütün dünyaya ziyan vurmaqla yanaşı, ABŞ-ın nüfuzdan düşməsinə də səbəb olub"
Cross Media Təhlil Mərkəzinin analitiki, siyasi şərhçi Mübariz Göyüşlü baki-xeber.com-a şərhində bildirdi ki, Bayden administrasiyasının həyata keçirdiyi səhv siyasət nəinki dünyaya, eləcə də ABŞ-ın özünə böyük ziyan vurub.
"Dünyada bütün dövlətlər öz milli maraqlarını təmin etmək üçün addımlar atırlar. Hesab edirəm ki, amma ABŞ-ın maraqları tamam başqa yöndədir və dünyada müharibələrin, münaqişələrin yaranması ilə nəticələnən bir siyasətin nəticəsidir. Xüsusən də gedər ayaqda olan Bayden administrasiyası, dövlət katibi olmuş Blinken dünyada yeni münaqişələrin, müharibənin yaranmasının birbaşa səbəbkarları, günahkarlarıdırlar. Bayden administrasiyasının apardığı ikiüzlü, riyakar, qarışdırıcı siyasət bütün dünyaya ziyan vurmaqla yanaşı, ABŞ-ın nüfuzdan düşməsinə də səbəb olub"-deyə M. Göyüşlü bildirdi.
M.Göyüşlünün sözlərinə görə, bu münaqişələrdən danışarkən biz ilk növbədə Rusiya-Ukrayna müharibəsini göstərə bilərik. "Eyni zamanda İsrail-Fələstin müharibəsini də qeyd etməliyik. Deyə bilərlər ki, burada ABŞ ordusu iştirak etməyib, ABŞ işğal etməyib. Amma Ukraynanın bu vəziyyətə düşməsində şəxsən Bayden administrasiyası günahkardır. Çünki bir növ Ukraynanı cəsarətləndirdilər, qızışdırdılar, amma indi Ukrayna xalqı belə ağır vəziyyətə düşüb. Elə İsraillə HƏMAS arasında olan məsələlər də bu cürdür. Bayden administrasiyası istəsəydi, bu müharibəni dayandıra bilərdi, amma bunu etmədi, prosesləri daha da qızışdırdılar. Fikrimcə, xalqların ABŞ-a etimadının azalmasında Bayden administrasiyasının böyük günahı olub. Bayden administrasiyası, onun təmsilçisi olan Blinken daim ikiüzlü siyasət yürüdüb, ikili standartlar nümayiş etdirib. Bu da Bayden administrasiyasının yanlış, səhv siyasətinin nəticəsidir"- deyə M.Göyüşlü qeyd etdi.
İradə SARIYEVA
