Kommunikasiyalar üzrə danışıqlarda uğursuzluq Qərbin Ermənistana təsirləri ilə bağlıdır?
Ceyhun Məmmədov: "Əslində, bu məsələnin əsas günahkarı, əsas səbəbkarı məhz elə Ermənistandır"
"Zəngəzur dəhlizi ilə bağlı jurnalistin Rusiya televiziyasında yayımlanan fikirlərinə Ermənistanın hədsiz emosional mənfi reaksiyası təəccüb doğurur". Bu sözləri Rusiya Xarici İşlər Nazirliyinin rəsmi nümayəndəsi Mariya Zaxarova Rusiya televiziyasında səsləndirilən bəyanatlarla əlaqədar Rusiya səfirinin Ermənistan Xarici İşlər Nazirliyinə çağırılması faktını şərh edərkən bildirib.
"Biz həmişə İrəvandan eşitmişik ki, Ermənistan söz azadlığına sadiqdir. Bizim rəsmi mövqeyimiz İrəvana məlumdur. Biz ardıcıl olaraq üçtərəfli sazişlər əsasında Cənubi Qafqazda bütün nəqliyyat və iqtisadi əlaqələrin açılmasından danışırıq".
M.Zaxarova qeyd edib ki, Qərbin Ermənistana dağıdıcı təsiri səbəbindən Cənubi Qafqazda kommunikasiyaların bloklanması üzrə üçtərəfli işçi qrupun işində fasilə yaranıb.
"Əminik ki, tamhüquqlu əməkdaşlığın qrup çərçivəsində mümkün qədər tez bərpası Cənubi Qafqaz regionunda nəqliyyat və kommunikasiya sisteminin açılmasına töhfə verməklə yanaşı, bütün regionun gələcək sosial-iqtisadi inkişafını təmin edəcək", -deyə o əlavə edib.
Rusiya XİN-in nümayəndəsi vurğulayıb ki, Moskva bu problemin həllində Azərbaycana və Ermənistana kömək etməyə hazırdır.
Zaxarova deyir ki, Qərbin Ermənistana dağıdıcı təsirlərinin ucbatından bölgədə kommunikasiyaların açılması üzrə işçi qrupun fəaliyyətində fasilə əmələ gəlib. Yəni işçi qrupun fəaliyyətində fasilə əmələ gəlməsi təkcə Qərbin Ermənistana təzyiqlərinin nəticəsidir? Bəs burda Ermənistan hökumətinin özünün gunahı yoxdur? Ermənistan hökuməti bəyəm bunu istəyir? Əgər Ermənistan istəməsə Qərbin təzyiqi hansı bir rol oynaya bilər? Bunu tam şəkildə Qərbin təzyiqlərinin üstünə qoymaq nə dərəcədə doğrudur?
"Burda Qərb qədər Ermənistan, İran və Rusiya da məsuliyyət daşıyır"
Millət vəkili Ceyhun Məmmədov "Bakı-Xəbər" ə bildirdi ki, bu bəyanat anlaşılan bəyanat deyil. "Yəni kökündən yanlışdır. Yalnız bu məsələdə Qərbi günahlandırmaq doğru deyil. Yəni sanki bütün günahlar Qərbin üstündədir, guya Ermənistan istəyir, çalışır, amma Qərb buna imkan vermir. Əslində, bu məsələnin əsas günahkarı, əsas səbəbkarı məhz elə Ermənistandır. Yəni Ermənistan özü real addımlar atmaqda maraqlı deyil və bunu istəmir. Ona görə də, bu proses bu formada uzanır.
Təəssüf ki, Rusiya tərəfi də hər zaman yalnız Qərbi günahlandırır. Ona görə hesab edirəm ki, burda məsuliyyəti yalnız Qərb daşımır, Ermənistan da daşıyır. Ermənistan 10 noyabr razılaşmasını yerinə yetirməlidir və "Zəngəzur dəhlizi" açılmalıdır, komissiyaların iclasları sürətli formada getməlidir, davam etməlidir. Burda Qərb qədər Ermənistan, İran və Rusiya da məsuliyyət daşıyır".
C.Məmmədovun fikrincə, Rusiya vasitəçi dövlət kimi bu məsələdə Ermənistana təzyiq etməli idi, çünki bu sənəd Rusiya, Azərbaycan və Ermənistan arasında imzalanıb: "Rusiya vasitəçidir, Ermənistan icraçıdır. Ona görə hesab edirəm ki, burda bir tərəfi günahlandırmaq düzgün deyil. Yəni burda bütün tərəflərin məsuliyyəti var.
Bəli, Qərbin də müəyyən yanlışları və onun da müəyyən addımları var, Qərb də məsuliyyət daşıyır. Amma ən çox məsuliyyəti daşıyan Ermənistandır. Ermənistan imitasiya ilə məşğuldur, sülh istəmir, üçüncü qüvvəni bölgəmizə gətirməyə çalışır və sülh prosesinə mane olmaq üçün bütün addımları atır. Ona görə də, bu cür açıqlama verərkən diqqətli olmaq lazımdır. Bəlkə də məqsəd bu deyildi, amma görünən, anlaşılan odur ki, bütün məsələ, günah sanki Qərbdədir. Qeyd etdiyimiz amillər, səbəblər var. Rusiya da bu məsələdə fəal olmalıdır, Ermənistana təzyiq etməlidir ki, bu məsələ öz həllini tapsın".
İradə SARIYEVA
