Sahil Kərimli: "Rusiya yanlış siyasətini bununla ört-basdır etməyə çalışır və özünə haqq qazandırmaq istəyir"
Rusiyanın xarici işlər naziri Sergey Lavrov Moskvada keçirdiyi mətbuat konfransında Rusiya diplomatiyasının 2024-cü ildəki fəaliyyəti barədə açıqlama verib və bildirib ki, Rusiya Suriyadakı vəziyyətin yaxşılaşdırılması səylərində faydalı olmaq istəyir.
Lavrovun sözlərinə görə, Suriyada bəzi hadisələr baş verib. Bunun səbəbi 10 ildir siyasi prosesin ləngiməsidir. Keçmiş Suriya rəhbərliyini Konstitusiya Komitəsinin işinə yenidən başlamağa təşviq etdiklərini deyən Lavrovun sözlərinə görə, Dəməşq rəhbərliyi komitənin işləməsini, bəzi razılaşmalar əldə etməsini və hakimiyyətin terrorçu olmayan müxalif qüvvələrlə bölüşdürülməsini istəmirdi.
Lavrov deyib ki, biz son 10 ildə Əsədə təşviq edirdik ki, konstitusiyanı dəyişsin, hakimiyyəti müxalifətlə bölüşsün və sair. Bu nə dərəcədə inandırıcıdır ki, onlar Əsəd rejiminin belə bir islahatlar aparmasını təklif edirdilər? Yəni Əsəd o qədər həddini bilməz hala gəlmişdi ki, dünyada yeganə asılı olduğu dövlət olan Rusiyanın belə təkliflərinə əhəmiyyət vermirdi?
Bu, əslində Əsəd rejimi süquta uğrayanda sonra Rusiyanın ordakı siyasətinin üstünün ört-basdır edilməsi cəhdi sayıla bilərmi?
Çünki bir çox ekspertlərə görə, bu, Əsəd rejiminin çökməsində Rusiyanın özünü məsuliyyətdən kənara çəkmək cəhdidir. Əsəd rejiminin iflasa uğraması ilk növbədə Rusiyanın məsuliyyətidir. Çünki lap əvvəldən Suriyanın daxili siyasətini yanlış mövqeyə yönəltdilər, Qərblə bütün əlaqələrini kəsirdilər, tam təcrid olunmuş, öz xalqı ilə müharibə aparan bir rejim vəziyyətinə saldılar, nəticədə də baş verənlər göz önündədir. Yəni Lavrovun bu bəyanatı Suriyada Əsəd rejiminin çökməsində Rusiyanın məsuliyyətini danmaq cəhdidir. Belədirmi doğrudan da?
"Vaxtilə Suriyada baş verən proseslərdən müəyyən qədər bu şəkildə boyun qaçırmaq tipli addımlar atır"
Siyasi ekspert Sahil Kərimli "Bakı-Xəbər"ə şərhində "Əlbəttə ki, bu gün Rusiya, xüsusən də bu ölkənin xarici işlər naziri Sergey Lavrov Rusiyanın uzun illərdir Yaxın Şərqdə yürütdüyü uğursuz siyasəti ört-basdır etmək və malalamaq məqsədilə müxtəlif üsullardan istifadə edir, müxtəlif bəyanatlar səsləndirirlər. Hətta Lavrov Əsəd rejimini günahlandıran bəyanatlarla çıxış edir. Təbii, sual yaranır ki, əgər bu gün Rusiya Əsəd rejimini günahlandırırsa, vaxtilə onun düzgün siyasət yürütmədiyini, Rusiyanın tövsiyələrinə rəğmən loyal addımlar atmadığını bildirirsə, bəs niyə Əsədə, onun özü ilə bərabər xeyli sayda ailə üzvlərinə, yaxınlarına, hətta hakimiyyəti dövründə ən yaxınında olanlara sığınacaq verib, qucaq açıb? Təbii ki, Rusiya yanlış siyasətini bununla ört-basdır etməyə çalışır və özünə haqq qazandırmaq istəyir. Vaxtilə Suriyada baş verən proseslərdən müəyyən qədər bu şəkildə boyun qaçırmaq tipli addımlar atır".
S.Kərimlinin sözlərinə görə, amma reallıq ondan ibarətdir ki, Suriyada uzun onilliklər Əsəd rejimi qanlı cinayətlər həyata keçirib. Ekspertin fikrincə, ümumiyyətlə, bu qanlı cinayətlərin Suriyada çiçəklənməsi, xüsusi terrorçu qruplarının, təşkilatlarının daha da bəslənməsi və vüsət alması prosesində Rusiyanın da müəyyən qədər maraqları vardı. "Bu maraqları qorumaq üçün Əsəd rejimi ilə Rusiya uzun müddət əməkdaşlıq edib. Amma bu gün Suriyada yeni reallıqlar yaranıb və təbiidir ki, bu reallıqlar fonunda Rusiya müəyyən qədər Yaxın Şərqdəki proseslərdən uzaqlaşıb və təsir imkanlarını itirib. Təbiidir ki, Rusiya da çalışacaq indən sonra bu proseslərdə öz varlığını, öz təsir imkanlarını və rıçaqlarını qoruyub saxlamaq üçün müəyyən addımlar atsın. Amma mən hesab edirəm ki, yeni reallıqlar başlayıb və bu reallıqlar daha çox qardaş Türkiyə tərəfindən yaradılıb və bu gün də idarə olunur. Suriyada yeni dövr başlayacaq, terrorçu qrupların, terrorçu təşkilatların ləğvi ilə bağlı Türkiyə çox qətiyyətli addımlar atır və bu istiqamətdə çox müsbət irəliləyişlər gözləyə bilərik" - deyə S.Kərimli bildirdi.
İradə SARIYEVA
