Sahil İsgəndərov: "Paşinyanın baş qərargahından belə bir hərbiçinin delimitasiya və demarkasiya komissiyasina daxil edilməsinin bir neçə səbəbi ola bilər"
Azərbaycan-Ermənistan sərhədində demarkasiya və delimitasiya işləri aparılan günlərdə Ermənistan tərəf birgə komissiyanın tərkibində dəyişiklik edib.
Qeyd olunur ki, Ermənistan Silahlı Qüvvələrinin 3-cü Ordu Korpusunun komandiri vəzifəsini tutan Aleksandr Çakanyan 2024-cü il noyabrın 27-dən Ermənistan prezidentinin fərmanı ilə Baş Qərargah rəisinin birinci müavini təyin edilib. Ermənistan Silahlı Qüvvələri Baş Qərargahının Baş Əməliyyat İdarəsi Ermənistanın baş naziri Nikol Paşinyanın yanvarın 14-də verdiyi qərarla demarkasiya və sərhəd məsələləri üzrə komissiyanın tərkibinə daxil edilib.
Qeyd edilir ki, Çakanyan general rütbəsini 2024-cü il mayın 24-də demarkasiya və delimitasiya prosesi fonunda alıb.
Pasinyan demarkasiya komissiyasinin tərkibini niyə dəyişdi?
Paşinyan baş əməliyyatçı generalı Azərbaycanla iş üzrə Komissiyaya niyə daxil etdi?
"Bununla Paşinyan hərbi elita ilə münasibətləri tənzimləməyə, düzəltməyə çalışır"
Politoloq Sahil İsgəndərov "Bakı-Xəbər"ə şərhində "Hesab edirəm ki, Paşinyanın baş qərargahından belə bir hərbiçinin delimitasiya və demarkasiya komissiyasina daxil edilməsinin bir neçə səbəbi ola bilər.
Burda həm daxili siyasət, həm xarici siyasət amilləri konkret özünü göstərə bilər. Birinci ona görə ki, İkinci Qarabağ savaşındakı məğlubiyyətdən sonra Ermənistanın baş naziri Nikol Paşinyana qarşı hərbi cəbhə açılıb, hərbiçilərin müxalif mövqeyi daha da güclənib.
Ümumiyyətlə götürdükdə, Paşinyan hakimiyyətdə olduğu bütün bu illər ərzində hərbiçilərlə, hərbi elita ilə ortaq məxrəcə gələ bilməyib. Düşünürəm ki, məhz hərbi elitanın təmsilçilərindən birinin bu komissiyaya daxil edilməsi bir növ Paşinyanın onların gözündə özünə bəraət qazandırmaq cəhdi də ola bilər. Yəni bildiyimiz kimi, sərhədlərin delimitasiyası və demarkasiyası məsələsi sıradan bir məsələ deyil. Həmin komissiyaya bir hərbiçinin, xüsusən də baş qərargah təmsilçisinin daxil edilməsindən o nəticəyə gəlmək olur ki, bununla Paşinyan hərbi elita ilə münasibətləri tənzimləməyə, düzəltməyə çalışır" - deyə bildirdi.
Məsələnin ikinci tərəfinə gəlincə, S.İsgəndərovun qeyd etdiyinə görə, burda digər bir məqam ondan ibarətdir ki, dəfələrlə belə məqamlara toxunulub, belə fikirlər səsləndirilib ki, Azərbaycanla Ermənistan arasında sərhədlərin delimitasiyası və demarkasiyası Sovet dövründə SSRİ baş qərargahında saxlanmış hər hansısa xəritələr əsasında aparılmalıdır. S.İsgəndərovun fikrincə, sözsüz, SSRİ-nin ümumi baş qərargahında olan xəritələr vaxtilə ittifaqa daxil olan respublikalarda yerləşmiş ordu qərargahlarında da bu və digər şəkildə var. "Ola bilər, Paşinyan general Çakanyanı bu komissiyaya üzv etməklə Sovet dövründə baş qərargahda olan xəritələrlə bağlı fikirlərin öz təsdiqini tapdığını göstərmək və doğrudan da bu komissiyada məhz belə bir təmsilçini görmək istəyir.
Mən bir məqamı da qeyd etmək istəyərdim ki, burda üçüncü bir məqam da xarici amil kimi görsənə bilər. Ola bilsin, Paşinyan erməni cəmiyyətinə onu göstərmək istəyir ki, mən hərbiçilərin fikirləri ilə razılaşıram. Bilirik ki, Ermənistan ordusunda kifayət qədər revanşist ruhlu qüvvələr var. Yəni onlar İkinci Qarabağ müharibəsindəki məğlubiyyətin acısını heç cür uda bilmirlər. Bir növ, bəlkə Paşinyan həm də Azərbaycan tərəfə göstərmək istəyir ki, siz elə bilməyin Ermənistan sizin bütün şərtlərinizlə razılaşacaq, biz daha prinsipial generalı bu komissiyaya salırıq. Bu baxımdan, Ermənistanın fikrincə, onların prinsipial mövqeyini bu adam birgə komissiyada qarşı tərəfə çatdırmalıdır.
Bütün hallarda, ötən il sərhədlərin delimitasiyası və demarkasiyası məsələsində irəliləyişin şahidi olduq və bu da ondan xəbər verir ki, rəsmi İrəvan geriyə artıq yolu qalmadığını, məhz Azərbaycanın beynəlxalq hüquqa söykənən haqlı şərtləri çərçivəsində sərhədlərin delimitasiyası və demarkasiyasının başa çatmalı olduğunu bilir. Yəni bu prosesin uzadılması Ermənistanın ümumi maraqlarının əleyhinə işləyir. Düşünürəm ki, artıq rəsmi İrəvanda da bu reallıq anlaşılır. Yəni general Çakanyanın bu komissiyaya qatılması ilə əldə olunan razılıqla erməni cəmiyyətinə göstəriləcək ki, bu yalnız bəzilərinin fikrincə, Paşinyanın "satqınlıq siyasətinin" nəticəsi deyil, hətta Ermənistanın siyasətinə qarşı müxalif mövqedə dayanan erməni hərbi elitası da buna razılaşıb. Yəni əslində Paşinyan burda bir neçə hədəf götürüb, bir güllə ilə bir neçə dovşan vurmaq istəyir. Həm bir növ özünü sığortalamaq, həm də Azərbaycana göstərmək istəyir ki, "bizim prinsipial mövqeyimizi ortaya qoyan generalımız var", eyni zamanda da delimitasiya və demarkasiya məsələsində SSRİ ordusunun, Müdafiə Nazirliyinin baş qərargahında saxlanılan xəritələr məsələsini bir növ yenidən aktuallaşdırır" - deyə S.İsgəndərov qeyd etdi.
İradə SARIYEVA
