Murad Fərzəliyev: "Paris Olimpiyasında medal qazanan bütün Azərbaycan idmançılarının medalları yoxlanılır"
Fransa hökumətinin, prezident Makronun biabırçılığa, saxtakarlığa söykənən siyasəti özünü Paris-2024 Yay Olimpiya Oyunlarında da göstərdi. Müşahidələr və araşdırmalar göstərir ki, Yay Olimpiya Oyunları tarixində hələ bu səviyyədə biabırçılıqlar, saxtakarlıqlar olmayıb.
Məlum olduğu kimi, bir müddət əvvəl Fransa nəşri olan La Lettre-nin çap etdiyi məqalədə bildirilir ki, Olimpiya iştirakçılarına verilən gümüş və bürünc medallar saxta - qəlp olub. Qaydalara əsasən, qaliblərə təqdim edilən medalların materialı əslində adına müvafiq olan yüksək əyarlı metaldan hazırlanmalıdır. Yəni bürünc medalın medalyon hissəsi bürüncdən, gümüş medalin isə medalyon hissəsi gümüşdən hazırlanmalıdır. Lakin Paris hökumətindən Sikkəxanaya verilən sifarişə əsasən həmin medalların medalyon hissəsini adi dəmirdən hazırlayaraq. Sonra da lak vasitəsilə sözügedən əyarlı metalların effekti alınmalı imiş. Lakin qəza bəd gətirib, Sikkəxana laklarının keyfiyyəti layihədə nəzərdə tutulduğundan aşağı olub. Ona görə də medalların bir hissəsi hələ təqdimata qədər keyfiyyətini itirib - medalin lakları qopub. Digər hissəsi isə təqdimatdan sonra öz görkəmini itirib.
Bu səbəbdən də Fransanın paytaxtı Parisdə keçirilmiş Yay Olimpiya və Paralimpiya Oyunlarında mükafat əldə edən 100-dən çox idmançı qazandıqları medalları keyfiyyətsiz olması səbəbindən geri qaytarıb.
Yayılan məlumata görə, Azərbaycanda da Paris-2024 Yay Olimpiya Oyunlarında medal qazanan idmançılarımızın bəzilərinin medallarının keyfiyyətsiz olduğu ortaya çıxıb.
Məsələn, taekvondoçumuz Qaşım Maqomedovun Paris olimpiadasında qazandığı gümüş medalın keyfiyyətsiz olduğu məlum olub. Bu barədə mətbuata idmançımız özü məlumat verib.
Məlumata görə, Milli Olimpiya Komitəsi 2024 olimpiadasında qazanılan bütün digər medalları yoxlamaq fikrindədir və defektlər aşkarlanan medallar qaytarılacaq.
Məlumata görə, elə güləşçi Həsrət Cəfərovun bürünc medalında da qüsurlar üzə çıxıb.
Qeyd etdiyimiz kimi, daha əvvəl Paris Olimpiya oyunlarının iştirakçılarının artıq 100 keyfiyyətsiz medalı geri qaytardığı məlumdur.
Azərbaycan idmançıları da medalları qaytaranlar sırasına qoşula bilərmi? Ümumiyyətlə, Milli Olimpiya Komitəsi olaraq bu məsələyə münasibətiniz necədir? Medalların Fransaya qaytarılmasından söhbət gedə bilərmi? Təxminən neçə idmançının medalında o cür problem var? Komitə olaraq hansı addımlar atmaq niyyətindəsiniz?
"Araşdırma zamanı hansısa nöqsanlar aşkar olunarsa Milli Olimpiya Komitəsi Beynəlxalq Olimpiya Komitəsinə rəsmi qaydada müraciət edəcək"
Milli Olimpiya Komitəsinin mətbuat xidmətinin rəhbəri Murad Fərzəliyev "Bakı-Xəbər" ə bildirdi ki, hazırda idmançıların medallarında sözügedən problemin olub-olmamasını aydınlaşdırmaq üçün araşdırma aparılır:
"Sizin qeyd etdiyiniz məlumatlar doğru məlumatlardır. Doğrudan da Paris Yay Olimpiya Oyunlarında idmançılara verilən medalların tərkibində müəyyən dəyişikliklər baş verib. Dövlətlərin bir çoxunda bu problem üzə çıxıb və medalları qaytaranlar var.
Azərbaycanda hələlik bir idmançının - Qaşım Maqomedovun medalında keyfiyyətsizlik aşkarlanıb. Milli Olimpiya Komitəsi tərəfindən Paris Olimpiyasında medal qazanan bütün Azərbaycan idmançılarının medalları yoxlanılır. Bəzi idmançılar ölkədə deyildilər, təlim-məşq toplantısında idilər. Artıq onlar da qayıdıblar. Bütün medallara baxış keçiriləndən sonra əgər Azərbaycan idmançılarının medallarında aşınmalar və digər hər hansı bir nöqsan üzə çıxarsa həmin medallarla bağlı Milli Olimpiya Komitəsi prosedur qaydalara uyğun olaraq Beynəlxalq Olimpiya Komitəsinə rəsmi müraciət göndərəcək.
Hələlik medallarla bağlı araşdırmalar davam edir. Medallarda hər hansı bir nöqsan aşkarlanarsa bunu idmançılar özləri geri qaytarmırlar, Milli Olimpiya Komitəsi də Parisə, yaxud təşkilat komitəsinə yox, birbaşa Beynəlxalq Olimpiya Komitəsinə rəsmi müraciət göndərir. Yəni prosedur qaydaları belədir".
M.Fərzəliyev əlavə etdi ki, araşdırma başa çatandan sonra qərar qəbul ediləcək. "Bütün medallar yoxlanacaq və araşdırma zamanı hansısa nöqsanlar aşkar olunarsa Milli Olimpiya Komitəsi Beynəlxalq Olimpiya Komitəsinə rəsmi qaydada müraciət edəcək" - deyə müsahibimiz qeyd etdi.
İradə SARIYEVA
