Mübariz Göyüşlü: "Öcalan belə bir addım atsa, onun terror vasitəsilə fiziki cəhətdən məhv edilməsi də mümkündur"
Ötən ilin noyabr ayının sonunda MHP lideri Dövlət Baxçalı Türkiyə Böyük Millət Məclisində Öcalana çağırış etdi: "Gəlsin parlamentdə DEM Partiyasının fraksiyası deputatlar qarşısında PKK-nın silahı yerə qoyduğunu elan eləsin. Bundan sonra böyük əfvdən yararlana bilərlər".
Dekabrın 28-də isə Türkiyədə əsasən kürdlərin partiyası sayılan DEM Partiyası üzvləri ilə İmralı adasında cəzasını çəkən terror təşkilatı PKK-nın lideri Abdullah Öcalan arasında görüş baş tutdu.
Ədliyyə Nazirliyinin icazəsi ilə DEM Partiyasının funksionerləri - deputat Sırrı Süreyya Öndər, Pervin Buldan və Əhməd Türk Öcalanla həbsxanada bir araya gəldilər.
DEM Partiyasının həmsədri Tuncer Bakırhan deyib ki, İmralıda danışıqlar yeni ildə yeni bir dövr açacaq: "Buna inanıram..."
Amma həmin görüşdən iki həftədən çox vaxt keçsə də, hələ də Abdullah Öcalandan heç bir açıqlama yoxdur. Doğrudan Öcalan silahdaşlarını silahı yerə qoymağa çağıracaq? Əgər çağıracaqsa, niyə gecikdirir?
Baki-xeber.com saytına açıqlamasında Cross Media Təhlil Mərkəzinin analitiki, siyasi şərhçi Mübariz Göyüşlü bildirdi ki, fikrimcə, bu çox cətin və ağrılı bir prosesdir: "Düzdür, Türkiyə tərəfindən bu addımın atılması birinci dəfə deyil. Türkiyə bir neçə dəfə kürd problemini danışıqlar və diplomatik yolla çözməyə çalışıb. Amma gözlənilən nəticəni almaq mümkün olmayib. Hazirda MHB liderinin, əvvəllər isə Ərdoğan və onun silahdaşlarının bu qəbildən olan çağrışları sərgilənib. Hətta Türkiyə hökuməti düşmənlərin əfv edilməsi planını da hazırlayıb. Amma bu cəhdlərin hec biri gözlənilən nəticəni verməyib. Gözlənilən nəticə isə ondan ibarət idi ki, PKK terroru tamamilə aradan qaldırılsın.
O ki qaldı hazırki çağırışa, mən Öcalanın belə bir addım atacağına böyük şübhə ilə yanaşıram. Öcalanın parlamentə gəlib üzr diləməsini və silahdaslarını silahı yerə qoymağa çağıracağını mən real hesab etmirəm. Öcalan buna özü cəhd etsə belə, çox ciddi problemlər yaşaya bilər. Öcalan belə bir addım atsa, onun terror vasitəsilə fiziki cəhətdən məhv edilməsi də mümkündür. Çunki PKK üçün terror adi bir insidentdur. Bu səbəbdən də indiki cəhdə ümid bəsləmirəm"
Amma onu da qeyd etmək gərəkir ki, Türkiyə PKK probleminin həllinə kompleks yanaşma sərgiləyir. Yəni proses yalnız Öcalanın çağrışlarından asılı deyil. Ankara Dəməşqin yeni hökuməti ilə birlikdə Suriya ərazisində olan PKK/YPG/PYD terror qruplaşmasını tərksilah etməyə çalışır. Türkiyə buna görə terrorçulara vaxt verib, ya tərkisilah olunacaqlar, ya da məhv ediləcəklər.
Türkiyə rəsmilərinin bu istiqamətdə çox çiddi açıqlamaları var.
PKK-nın israrla müqavimət göstərməsinin əsas səbəbi isə onun bir neçə himayədarının olmasıdır. Atalar demişkən, arxalı köpək qurd basar. PKK İran, Rusiya, İsrail və ABŞ kimi bir-birinə rəqib olan ölkələrdən belə dəstək və təlimat alır. Bu əlamətinə gorə PKK bəlkə də dünyanın yeganə terror təşkilatıdır. Həmin dövlətlər isə PKK-nın təslim olmasını istəmir. Çunki PKK təslim olsa Türkiyənin əsas problemi həll edilir və onun gücü bölgədə birə-beş artacaq. Bunu isə PKK-nı dəstəkləyən dövlətlər istəmir.
Abdullah Öcalan da gözlənilən müraciəti edə bilər. Amma bu o demək deyil ki, Öcalanın çağırışı ilə dərhal bütün PKK-çılar silahı yerə qoyacaq. Belə bir nəticə gözləmək sadəlövhlük olardı. Amma bu çağırışla bir qrup silahı yerə qoyacaqsa, bu da işin xeyrinə olacaq.
Hazırda Suriyada son aylar baş verənlərdən dolayı PKK problemini həll etmək istiqamətində Türkiyə üçun tarixi bir fürsət yaranıb. Türkiyə bu fürsətdən mütləq istifadə edəcək.
Akif NƏSİRLİ
