Elşad Həsənov: "Görünür, ona tapşırığı İranın xüsusi xidmət orqanları verib - məntiq bunu deyir"
Dövlət Təhlükəsizliyi Xidməti (DTX) tərəfindən keçirilmiş əməliyyat-axtarış tədbirləri nəticəsində Azərbaycanda fəaliyyət göstərən dini icmalardan birinin üzvünə qarşı terror aktı planlaşdırmış Gürcüstan vətəndaşı Aslanov Aqil Göycə oğlu və Azərbaycan Respublikasının vətəndaşı İsmayılov Ceyhun Şahin oğlu saxlanılıb. Bu barədə Dövlət Təhlükəsizliyi Xidməti məlumat yayıb.
Məlumata görə, Aslanov Aqil xarici ölkələrdən birinin xüsusi xidmət orqanlarından 200 min dollar müqabilində Azərbaycanda fəaliyyət göstərən dini icma rəhbərinin öldürülmasi tapşırığını alıb. Lakin 2 min dollarlıq avans müqabilində hədəf seçdiyi şəxsin ev və iş yeri ünvanlarını sifarişçıyə göndərdikdən sonra o, DTX tərəfindən yaxalanıb. Teraktı həyata keçirmək üçün Aslanov Aqil işə İsmayılov Ceyhunu da cəlb edib.
Adətən münaqişələr dini icmalar və təriqətlər arasında baş verir və dini təriqət yetkililəri özlerinə rəqib saydığı din xadimlərini aradan götürmək istəyir. Lakin bu məsələdə çox maraqlı nüans ondan ibarətdir ki, xarici ölkənin xüsusi xidmət orqanı Azərbaycanda fəaliyyət göstərən dini icma rəhbərinə qarşı terakt sifariş edir, özü də 200 min dollar müqabilində...
Burada xarici ölkənin xüsusi xidmət orqanlarının marağını cəlb edən məsələ nə ola bilər?
Bakı-xeber.com saytına açıqlamasında Elşad Həsənov bildirdi ki, xarici kəşfiyyat orqanlarının Azərbaycanda kəşfiyyat-təxribat işləri aparmaq istəmələri və onların da DTX əməkdaşları tərəfindən qarşısının alınması haqqında məlumatlara tez-tez rast gəlmək olur: "Hələ 2023-cü ilin dekabrında Fransa kəşfiyyatçılarının Azərbaycan təhlükəsizlik orqanları tərəfindən ifşa olunmasının şahidi olduq. Onlar diplomatik pasportla diplomat pərdəsi altında fəaliyyət göstərirdilər. Onlar Azərbaycanda "arzolunmaz şəxs" elan edildilər, agentləri olan Azərbaycan və Fransa vətəndaşları saxlanıldı. Hazırda onların məhkəməsi gedir.
İndi isə Gürcüstan vətəndaşı Aqil Aslanov və Ceyhun İsmayılovun saxlanılması ilə bağlı məlumat ictimaiyyətə təqdim edildi. Xarici xüsusi xidmət orqanlarının məqsədi Azərbaycanda təxribat-pozuculuq işləri aparmaqdır. Bunu, təbii ki, Azərbaycanın uğurlarını və inkişafını arzulamayan dövlətlər edir. Bildiyimiz kimi, son 10-15 ildə Gürcüstanda İranın xüsusi xidmət orqanları geniş fəaliyyət göstərir. Azərbaycanlıların kompakt yaşadığı Gürcüstan ərazilərdə İran mollaları genişmiqyaslı təxribat işi apardılar, insanlari mövhumata və cəhalətə sürükləyirlər. Bir çox adamları oradan İranın Qum şəhərində yerləşən dinı hövzəyə cəlb edib, orada dini təhsil adı altında onlara təlimlər keçdilər, beyinlərini zəhərləyib geri göndərdilər. Həmin Aqil Aslanov da belə gənclərdən biridir. Görünür, ona tapşırığı da İranın xüsusi xidmət orqanları verib - məntiq bunu deyir.
90-cı illərdən bəri İran bizə qarşı çoxsaylı kəşfiyyat-təxribat və pozuculuq işləri aparıb. Mən əminliklə bildirirəm ki, bizim fədakar təhlükəsizlik əməkdaşları əks-kəşfiyyat tədbirləri həyata keçirib, onların hamısını ifşa edərək qarşısını vaxtında alıblar. Bizim xüsusi xidmət orqanlarının peşəkarlığı nəticəsində bu təxribatların qarşısı alınıb. Bizim İranda olan mənbələrimizin və digər əməliyyat-texniki tədbirlərin sayəsində biz onları həmişə qabaqlamışıq, bundan sonra da İnşəAllah, belə davam edər.
Bu təxribatçılara verilən tapşırıq ondan ibarət olub ki, dini icmanın rəhbərini öldürməklə təriqətlər arasında qarışıqlıq salsın, Azərbaycanda sabitliyi pozsun və İran "bulanlıq suda balıq tutsun".
Biz 30 illik işğal dövründə də, 44 günlük müharibə dövründə də İranın əsl sifətini gördük. Onlar İslam dini pərdəsi altında gizlənərək daim Ermənistana silah-sursatla kömək etdilər, hər cür dəstək verdilər. Ermənilər İran-fars rejiminin gözləri qarşısında bizim 65 məscidimizi dağıtdı və onlarda donuz saxladı. İran mollaları isə buna susdu. Reallıq budur, İran bu gün də müxtəlif təxribatlarla Azərbaycanda sabitliyi pozmağa çalışır. Lakin onlar heç vaxt buna nail ola bilməyəcək. Aqil Aslanovun bu məsələyə cəlb edilməsi Gürcüstan və Azərbaycan tərəfinin bir qədər diqqətsizliyinin nəticəsidir. Son illər Azərbaycan səfirliyinin nümayəndələri və ziyalılarımız Gürcüstanda müvafiq işlər aparır - əhalini maarifləndirərək mövhumatdan uzaqlaşdırırlar".
Dəniz NƏSİRLİ
