Ukrayna Silahlı Qüvvələri yanvarın 11-də Avropaya qaz tədarükünü dayandırmaq üçün "Türk axını" qaz kəmərinin "Russkaya" kompressor stansiyasına pilotsuz uçuş aparatları ilə hücum edib.
Rusiya Müdafiə Nazirliyinin açıqlamasına görə, hava hücumundan müdafiə sistemləri bütün PUA-ları zərərsizləşdirib, lakin yerə düşən parçalar stansiyanın qaz ölçmə cihazlarına və bəzi binalara cüzi ziyan vurub. Hadisə zamanı itki olmayıb, dəymiş ziyan isə qısa müddətdə aradan qaldırılıb və stansiyanın işi bərpa edilib.
Hadisədən sonra Macarıstanın xarici işlər naziri Péter Siyarto "Türk axını"nın Mərkəzi və Cənubi Avropanın enerji təchizatı üçün həyati əhəmiyyət daşıdığını və bu cür hücumların region ölkələrinin suverenliyinə təhlükə yaratdığını bildirib. Avropa Komissiyası da hücumu pisləyib və Ukraynadan rəsmi açıqlama gözlədiklərini açıqlayıb.
Avrokomissiyanın nümayəndəsi Anna-Kaysa İtkonen bildirib ki, Avropa İttifaqı Ukrayna Silahlı Qüvvələrinin "Türk axını" qaz kəmərinin kompressor stansiyasına hücumu ilə bağlı xəbərlərdən narahatdır: "Enerji infrastrukturuna hər hansı hücum narahatlıq doğurur. Bu barədə Ukrayna tərəfdən heç bir məlumat almamışıq. Biz enerji təhlükəsizliyi ilə bağlı vəziyyəti nəzarətdə saxlayırıq".
Qeyd edək ki, Krasnodar vilayətinin Anapa rayonunda yerləşən "Russkaya" kompressor stansiyası "Türk axını"nın başlanğıc nöqtəsi kimi tanınır. Stansiyadakı güclü qaz nəqli avadanlığı xəttin min kilometri boyunca yüksək təzyiqli qazın ötürülməsini təmin edir.
"Türk axını" qazı Qara dəniz vasitəsilə Türkiyəyə daşıyan strateji enerji layihəsidir. Layihə hər birinin illik gücü 15,75 milyard kubmetr olan iki sualtı boru kəmərindən ibarətdir. Birinci xətt Türkiyənin daxili istehlakına xidmət edir, ikinci xətt isə Avropaya qaz ixracı üçün istifadə olunur. 2019-cu ildə tamamlanan "Türk axını" Rusiyanın enerji şirkəti "Qazprom" və Türkiyənin "BOTAŞ" boru kəməri şirkəti ilə birgə həyata keçirilib. Xəttin ümumi uzunluğu təxminən 930 kilometrdir, bunun 700 kilometri Qara dənizin dibi ilə keçir, qalan hissəsi isə Türkiyə və Avropadakı quru xətlərini əhatə edir.
TAHİR
