Mübariz Göyüşlü:"Ermənistan həmişə mədəni, dini abidələrin arxasında gizlənərək təxribatçı davranışlar sərgiləyib"
Tarixi abidələrdən sui-istifadə Ermənistana xas xüsusiyyətdir desək, yanılmarıq. Çünki onlar tarixi abidələrdən bir qalxan kimi yararlanmağa çalışırlar. İkinci Qarabağ müharibəsi dövründə abidələrə yaxın yerlərdə qərargah qururdular. O da məlumdur ki, məktəb, bağça, xəstəxana binalarında belə, qərargah yaratmışdılar. Bu mənfur siyasəti indi də davam etdirirlər.
"GSSR44" Teleqram kanalı Ermənistan Silahlı Qüvvələrinin dini abidələri hərbi məqsədlər üçün istifadə etdiyinə dair məxfi görüntülər əldə edib və yayıb.
Bildirilir ki, Ermənistan tərəfi hərbi birləşmələrini şərti sərhəd istiqamətindəki dini abidələrin yanında yerləşdirir.
Kanala görə, Ermənistan tərəfi bu yolla həm kamuflyaj olunmaq, həm də ehtimali cavab zərbəsi zamanı qarşı tərəfi dini abidələri vurmaqda ittiham etmək məqsədi güdür. Əslində isə, Azərbaycanın elə bir niyyəti yoxdur, müharibə "eşqi" ilə alışıb-yanan da, Azərbaycanın hücum edəcəyini uyduran da Ermənistandır.
"Əslində, hərbi birləşmələrin məqsədli şəkildə dini abidənin yanında yerləşdirilməsinin özü beynəlxalq hüquqa ziddir"
Cross Media Təhlil Mərkəzinin analitiki, siyasi şərhçi Mübariz Göyüşlü "Bakı-Xəbər"ə şərhində bildirdi ki, bu, Ermənistanın növbəti məkrli niyyətindən xəbər verir. "Ermənistandan, ermənilərdən hər zaman belə məkrli addımlar gözləmək olar. Ermənistan həmişə mədəni, dini abidələrin arxasında gizlənərək təxribatçı davranışlar sərgiləyib. Ermənistan həmişə dini və mədəni abidələrdən sui-istifadə edir. Biz bunu zaman-zaman görmüşük, yəni bu bizim üçün yenilik deyil. Əslində, hərbi birləşmələrin məqsədli şəkildə dini abidənin yanında yerləşdirilməsinin özü beynəlxalq hüquqa ziddir. Hərbi birləşmənin yerləşməli olduğu ərazinim tarixi, dini abidənin yanında olmasını yalnız Ermənistan düşünə bilər.
Təssüflər olsun ki, ermənilər sülh sazişinin imzalanmasına yaxınlaşdığı bir vaxtda belə bir məkrli addım atır. Bu onların nə dərəcədə xain xislətli olduqlarını göstərir. Necə deyərlər, xain xoflu olar.
Bu eyni zamanda da onu göstərir ki, Ermənistan gərginliyin qalmasında maraqlıdır, onları sülh maraqlandırmır.
Bu addımları ilə problemlərin çözülməsinə yox, daha da artmasına, qalmasına çalışırlar. Beləliklə də, problemin həllində yox, onun davam etməsində maraqlı, israrlı olduqlarını sübut edirlər.
Amma istənilən halda Azərbaycanı belə məsələdən çəkindirmək, onu öz yolundan döndərmək kimi məsələlər alınası deyil, Azərbaycan bu məsələlərdə qətiyyətlidir, qərarlıdır. Biz belə təxribatların qarşısını almaqda qətiyyətliyik və öz siyasətimizi də qərarlı, qətiyyətli şəkildə quraraq davam ediririk. Bu məsələlərlə bizi öz yolumuzdan çəkindirmək və dayandırmaq olmaz".
M.Göyüşlü qeyd etdi ki, bu məsələ beynəlxalq təşkilatların diqqətinə çatdırılmalı və Ermənistanın növbəti məkrli niyyətindən, təxribatlarından bütün dünya xəbər tutmalıdır. M.Göyüşlü qeyd etdi ki, Ermənistan sülh müqaviləsi imzalamaqdan yayınmaq üçün belə bir addım atıb, amma bu ona xeyir gətirən məsələ deyil.
İradə SARIYEVA
