Elşad Həsənov: "Azərbaycan Prezidentinin bu mesajının çox ciddi əsasları var və Ermənistanın faşist-terror siyasəti bölgə üçün böyük təhlükədir"
Terror dünyanın böyük bəlasına çevrilib və çağımızda terroru dəstəkləyən, onun yayılmasına "ilham" verən konkret dövlətlər var. Prezident İlham Əliyev yanvarın 7-də yerli televiziya kanallarına müsahibəsində Yaxın Şərqdəki proseslərə də münasibət bildirib və "Türkiyənin bütün digər sərhədlərində də terrorçuluğa yer olmamalıdır" bəyanatını verib.
Prezident Əliyev bildirib: "Biz çox şadıq ki, Suriyada dəyişikliklər baş verdi və bu münasibətlə Türkiyə ilə Suriyanın yeni hökuməti arasında mövcud olan əlaqələr, əlbəttə ki, bizi də çox sevindirir. Çünki Suriya Türkiyə ilə həmsərhəd olan ölkədir və hər bir ölkə öz sərhədlərinin kənarında vəziyyəti sabit görmək istəyir".
Prezident vurğulayıb ki, Türkiyənin bütün digər sərhədlərində də terrorçuluğa yer olmamalıdır. "Biz də Türkiyənin müttəfiqi kimi hər zaman istənilən formada onların yanındayıq və bunu Türkiyə tərəfi bilir", - deyə dövlət başçısı əlavə edib.
Prezidentin "Türkiyənin bütün digər sərhədlərində də terrorçuluğa yer olmamalıdır" fikrinə diqqət yetirərkən burada əsas təhlükə yaradan dövlətlərdən birinin Ermənistan olduğu aşkar görünür.
Bəli, Ermənistan terror ölkəsi kimi tanınır və bu ölkə prezidentlərinin terroru dəstəklədiyi, faşist siyasət apardığı məlumdur. Terroru dövlət siyasətinə çevirən Ermənistanla həmsərhəd olan dövlətlərin hər biri üçün bu böyük bir təhdiddir. Müstəqil Ermənistanın tarixində olan prezidentlərin hamısı, Levon Ter-Petrosyan da, Robert Köçəryan da, Serj Sarkisyan da faşist ideologiyası əsasında siyasət aparıb. Prezident İlham Əliyev yanvarın 7-də yerli televiziya kanallarına müsahibəsində də bildirib ki, müstəqil Ermənistan dövləti, əslində faşist dövlətdir: "Çünki əgər bu ölkəyə 30 ilə yaxın faşist ideologiyasının daşıyıcıları rəhbərlik ediblərsə, bu ölkəni onlar elə özləri kimi də formalaşdırıblar. İndi baxın, Ermənistanın birinci prezidentinin irqçi və faşist açıqlamaları nə dərəcədə eybəcərdirsə, bir o qədər də təhlükəlidir. O, etnik təmizləməni bir qürur mənbəyi kimi qələmə verir, azərbaycanlıların öz tarixi dədə-baba torpaqlarından qovulması ilə öyünür. Sadəcə olaraq, bu videomaterial, necə deyərlər, indi ictimailəşdirildi..."
Ermənistan prezidentlərinin faşist siyasəti nəticəsində azərbaycanlılar öz tarixi yurdlarından zorla qovulublar, soydaşlarımıza qarşı etnik təmizləmə siyasəti həyata keçirilib, nəticədə bu ölkə monoetnik dövlətə çevrilib. Petrosyanın, Köçəryanın, Sarkisyanın faşist əməlləri məlumdur. Ermənistanın birinci prezidenti Ter-Petrosyanın qalmaqallı açıqlaması hər kəsin yadındadır, 31 il sonra o, həyata keçirdikləri cinayət əməllərini açıqladı, faşist siyasətlərini öz dili ilə ifşa etdi. Yəni Petrosyandan tutmuş Paşinyana qədər Ermənistanın bütün rəhbərləri faşizm siyasətinə qulluq edib.
Prezident "Türkiyənin bütün digər sərhədlərində də terrorçuluğa yer olmamalıdır" bəyanatı ilə nə demək istəyib?
Siyasi ekspert Elşad Həsənov "Bakı-Xəbər"ə şərhində bildirdi ki, Prezident İlham Əliyevin bu fikirləri tamamilə əsaslıdır və Türkiyə ilə sərhəddə yerləşən dövlətlərdən biri terror ölkəsi Ermənistandır. "Azərbaycan Prezidentinin bu mesajının çox ciddi əsasları var və Ermənistanın faşist-terror siyasəti bölgə üçün böyük təhlükədir.
Çünki Türkiyə ilə də sərhəddə yerləşən Ermənistan uzun illərdir terror siyasəti həyata keçirir və bu da bütün bölgə üçün ciddi təhdid yaradır. Heç şübhəsiz ki, Türkiyə-Ermənistan sərhədində faşist-terror təhlükəsi gözlənilməz deyil.
Əlbəttə, söhbət ondan gedir ki, 30 ildən yuxarıdır Ermənistana rəhbərlik edən şəxslərin fəaliyyəti faşist ideologiyası əsasında qurulub. Biz o faşist siyasətinin əyani şahidi olmuşuq. Ermənistan rəhbərliyinin göstərişi ilə soydaşlarımız etnik təmizləməyə, deportasiyaya məruz qalıblar. Bu baxımdan hesab edirəm ki, Ermənistanın faşist siyasəti Türkiyə üçün də terror təhlükəsi deməkdir".
E.Həsənov qeyd etdi ki, bu gün dünyanın diqqəti Yaxın Şərqə yönəlib, çünki Suriyada Əsəd rejimi devrildi, orda yeni dünyəvi dövlətin qurulması üçün bütün ölkələr onlara dəstək göstərmək istəyir. "Əsas isə Suriya xalqının yanında olan Türkiyədir. Türkiyənin dəstəyi, məhz son dövrlər onlara verdiyi siyasi, iqtisadi, hərbi yardım nəticəsində Əsəd rejimi devrildi, bu rejimin arxasında duran qüvvələr darmadağın edildi, onlar Suriyadan çıxarılırlar. Bu da aydındır ki, Əsəd rejiminə İran və Rusiya dəstək verirdi, onlar da, necə deyərlər, Əsədi qoyub qaçdılar, Əsəd də qaçmağa məcbur oldu. Azərbaycan Prezidentinin bildirdiyi kimi, doğrudan da bizim Əsəd rejimi ilə işbirliyimiz yox idi. Çünki onlar Ermənistanın yanında idilər və Ermənistanla birləşib Azərbaycana qarşı müəyyən işlər aparırdı. Prezidentin də bildirdiyi kimi, Suriyada bizim səfirliyimiz bağlanmışdı, işləmirdi, əlaqələr tamam pozulmuşdu. Ona görə ki, Əsəd rejimi erməniyönümlü siyasət aparırdı. Buna səbəb də onun arxasında duran qüvvələr - Rusiya və İran idi. İran onlardan tələb edirdi ki, onlar belə siyasət aparsınlar. Bu da Əsəd rejiminin sonunu gətirib çıxardı. Suriya bizim üçün həm də ona görə önəmlidir ki, böyük şairimiz İmadəddin Nəsimi Hələbdə dəfn olunub, onun məzarı ordadır. Bizim müqəddəs yerimizdir. Eyni zamanda Suriyada çoxlu Azərbaycan kökənli insanlar yaşayıblar. Şamaxıda böyük zəlzələ olanda ora böyük köç gedib, Şirvandan da həmçinin. Orda bizim bacı-qardaşlarımız yaşayır. Azərbaycan Prezidentinin də dediyi kimi, biz Türkiyə ilə birgə Suriyanın yanındayıq və onlara dəstək göstərməyi özümüzə borc bilirik. Biz ora humanitar yardım göndərdik, Azərbaycan nümayəndələri də orda iştirak etdilər, görüç keçirdilər. Bundan sonra da, hesab edirəm ki, biz Türkiyə ilə birgə Suriyaya lazımı köməkliyi edəcəyik. Çünki Suriyasının indiki lideri artıq Suriyada dünyəvi dövlətin qurulmasını, terrorun dayandırılmasını, digər ölkələrlə xoş qonşuluq münasibətlərinin yaranmasını istəyir. Qadınların hüquqlarının qorunması və sair məsələlərlə bağlı apardığı danışıqlar, Avropa ölkələrinin xarici işlər nazirləri ilə keçirdikləri görüşlər onu deməyə əsas verir ki, Suriya artıq yeni bir dövrə qədəm qoyur. Burda da ilk növbədə onlara dəstək olan Türkiyədir və Azərbaycandır. Bu mənada hesab edirəm ki, Suriyada, bütövlükdə Yaxın Şərqdə vəziyyət getdikcə düzələcək. Baxmaraq ki, orda gərginliklər var, İsrail Suriyanın bəzi yerlərini işğal edib, Türkiyə də bu haqda öz fikirlərini bildirib. Türkiyə ilə İsrailin qarşı-qarşıya gəlməsi çox pis ola bilər, çox böyük müharibəyə səbəb olar. Bundan qaçmaq üçün Türkiyə böyük cəhdlər göstərir ki, İsrail öz qoşunlarını Suriya ərazisindən çıxarsın, Suriyada sabit və inkişaf etmiş bir dövlət qurulsun".
E.Həsənov qeyd etdi ki, Suriyada terrorun ayağının kəsilməsi, əlbəttə, Türkiyə ilə sərhəddə əminamanlıq deməkdir. Türkiyənin terrora qarşı ciddi mübarizə apardığını deyən E.Həsənov qeyd etdi ki, bölgədə terrorun kökü kəsilməlidir. Ekspertə görə, Ermənistan terrorunun geniş "vüsət" almasında, əlbəttə, Bəşər Əsəd rejiminin də dəstəyi olub və erməni terrorçuların, terror batalyonlarının bir çoxu Suriya ərazisində təlimlər keçib, ordan bizim bölgəyə nəql ediliblər. E.Həsənov onu da vurğuladı ki, bu gün Bəşər Əsəd terroruna son qoyulub və növbə Ermənistanın terror siyasətidir, onun da dayandırılması vacibdir.
Türkiyə ilə sərhəddə terrorçuluğun olmamasının çox mühüm əhəmiyyət kəsb etdiyini deyən siyasi ekspert bildirdi ki, Azərbaycan Prezidentinin müsahibəsində Yaxın Şərq məsələsinə toxunulması, eləcə də Türkiyə ilə bağlı fikirlər səsləndirilməsi bizim qardaş ölkə ilə birgə hərəkətlərimizin həm də gələcək inkişaf strategiyasını müəyyən edir: "Biz bu yöndə də işlərimizi davam etdirəcəyik".
İradə SARIYEVA
