Tural İsmayılov: "Paşinyan keçmiş müttəfiqlərinə qarşı da repressiyaları bir alətə çevirib"
Ermənistanda Nikol Paşinyanın elan edilməmiş "seçki kampaniyası" davam edir. Avropanın təmtəraqla "demokrat" adlandırdığı Nikol Paşinyan 2026-ci il seçkilərində ona rəqib olacaq deyil, hətta azacıq maneə yarada bilən bütün siyasi qüvvələri və personaları zərərsizləşdirməkdə davam edir.
Nəinki müxalifətə qarşı, hətta "etibarsız" komanda üzvlərinə belə qarşı repressiya maşını işə düşüb.
Belə ki, məhkəmə Ermənistan Silahlı Qüvvələrinin Baş Qərargah rəisinin keçmiş müavini, general-leytenant Tiran Xaçatryanı həbs edib.
Bu barədə Ermənistan KİV məlumat yayıb.
Ermənistan Baş Qərargah rəisinin keçmiş müavini səhlənkarlıqda ittiham olunur.
Əvvəllər Milli Qəhrəman və Baş Qərargah rəisinin keçmiş müavini barəsində 44 günlük müharibə zamanı yol verdiyi qanun pozuntularına görə iş açılıb. Generalın özü ittihamları qəbul etmir.
"Gözlənildiyi kimi, (müdafiə tərəfinə – red.) 1200 səhifəlik işlə tanış olmaq üçün kifayət qədər vaxt vermədən, hakim Masis Melkonyan ağlabatan şübhə və əsasların olmamasına məhəl qoymadan müstəntiqin vəsatətini təmin etdi və general-leytenant Tiran Xaçatryanı 2 ay müddətinə həbs etdi", – müdafiə tərəfinin bəyanatında qeyd olunur.
Bəyanatda bildirilir ki, beş saata yaxın davam edən məhkəmə iclasında Xaçatryana qarşı irəli sürülən ittihamların əsassızlığı və onun həbsi üçün əsasların olmaması tam təsdiqini tapıb.
Xüsusilə vəkillər bildirdilər ki, bu, orta ağırlıqda cinayət törətməkdə təqsirləndirilən şəxsin tutulması ilə bağlı nadir hallardan biridir və istintaqa mane olmaq üçün mücərrəd ehtimal Xaçatryanın dörd illik istintaq zamanı davranışı ilə təkzib olunur.
Bəyanatda o da qeyd olunur ki, bu cinayət işi üzrə iddia müddəti yaxınlaşır və Xaçatryanı həbs cəzası gözləmir.
Hüquqşünaslar hesab edirlər ki, Xaçatryana qarşı fərdi yanaşma tətbiq edilib, o, dörd illik istintaqın gedişatını təmin etmək üçün deyil, fəal siyasi və vətəndaş mövqeyinə görə cəza kimi, eləcə də müharibədə məğlubiyyətdə "günahlandırmaq" məqsədi ilə həbs edilib. Xaçatryan həbsini Vardaşen istintaq təcridxanasında çəkəcək.
Tiran Xaçatryan müharibə zamanı istiqamətlərdən birinə komandirlik edib. 2020-ci ilin oktyabrında hərbi əməliyyatların qızğın vaxtında ona milli qəhrəman adı verilib. Lakin sonradan general gözdən düşdü və 2021-ci ilin fevralında vəzifəsindən uzaqlaşdırıldı. Buna səbəb Xaçatryanın Paşinyanın "İsgəndər" raketləri ilə bağlı bəyanatına cavab olaraq ironik açıqlamaları olub. Baş nazir bildirib ki, müharibə zamanı raketlər "partlamadı və ya sadəcə 10% partladı". General istefa verdikdən sonra dəfələrlə hakimiyyətin siyasətinə tənqidi qiymətlər verib. 2024-cü ilin yanvarında isə o, restoranlardan birində mübahisə və davadan sonra həbs edilib. Dava zamanı Xaçatryan silahdan atəş açaraq, təsadüfən mübahisə ilə heç bir əlaqəsi olmayan restorana gələn qonaqlardan birini yaralayıb. O, mart ayında zaminə buraxılmışdı.
Məsələyə münasibət bildirən politoloq Tural İsmayılov dedi ki, Nikol Paşinyan əsla demokratik bir siyasətçi deyil: "O, hakimiyyətə gəldiyi ilk gündən Ermənistanda özünə rəqib olan, onun siyasətini bəyənməyən, müxalif mövqedə dayanan insanları, vətəndaş cəmiyyəti fəallarını və medianı susdurmaqla məşğuldur. Nikol Paşinyanın avtoritar və diktatorcasına yanaşması Ermənistanda maksimum həddə çatıb. Sadəcə olaraq, çox təəssüf ki, Qərbin bəlli mərkəzləri sorosçu Paşinyan komandasını "atəşli şüarlarla" alqışlamaqla məşğuldur. Onlar Paşinyanı dəstəkləmək üçun ölkədəki repressiyalara göz yumurlar, hətta bəzən haqq qazandlrırlar. Bunun isə ağır nəticəsi ondan ibarətdir ki, Ermənistandaki müxalif siyasi qüvvələr sıxışdırılır və sıradan çıxarılır. Bu gün Ermənistanda sözünü deyən, hakimiyyəti tənqid edən qüvvələr sərt repressiyalara məruz qalır. Hətta Paşinyan komandasının içərisində belə real tənqidi mövqeyə malik məmurlara qarşı cinayət işləri qaldırmağı sifariş edir. Paşinyan keçmiş müttəfiqlərinə qarşı da repressiyaları bir alətə çevirib.
Məsələn, hakim komandaya mənsub deputat Ovik Aqazaryanın deputat mandatından imtina etməsi ilə bağlı ona qarşı edilən basqılar, cinayət işinin qaldirılması bir daha onun göstəricisidir ki, Ermənistanda demokratiyanın ən sadə elementləri belə mövcud deyil".
Dəniz NƏSİRLİ
