Rauf Zeyni: "Prezident bütün məsələlərə aydınlıq gətirməklə bizə qarşı düşmən mövqeyi sərgiləyənlərin, əsassız ittiham irəli sürənlərin niyyətini ifşa etdi"
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Bakıda keçirilməsi mühüm tarixi hadisədir. Dünyanı cənginə alan qlobal iqlim dəyişikliyi probleminin həlli yolları Azərbaycanın paytaxtında axtarılır, bəşəriyyətin, insanlığın gələcəyi ilə bağlı ən mühüm qərarlar Bakıda verilir.
Azərbaycan qlobal iqlim dəyişmələri ilə mübarizədə öndə gedən ölkələrdəndir və bunu sözdə deyil, əməldə isbatlayır. Azərbaycanda "yaşıl enerjiyə" keçid prosesi gedir, artıq bu istiqamətdə nailiyyətlərimiz də var. Azərbaycanın "yaşıl enerjini" təşviq etdiyi və bu istiqamətdə davamlı siyasət həyata keçirdiyi məlum olsa da, təəssüf ki, bəzi Qərb ölkələri, onların mediası, bəzi güc mərkəzləri Azərbaycanı qaralamaqdan əl çəkmək istəmirlər. Onlar Azərbaycanı neft ölkəsi adlandırırlar və iddia edirlər ki, belə bir ölkə COP29 kimi tədbir keçirməli deyil. Amma faktiki olaraq Azərbaycan neft ölkəsi deyil və bu iddiada olanlar ətraflarına göz gəzdirsələr hər şeyi aydın görə bilərlər. Təəssüf ki, görmək istəmirlər. COP29 çərçivəsində keçirilən sammitdə, ayrı-ayrı tədbirlərdə, toplantılarda Azərbaycana əsassız ittiham irəli sürənlərin layiqli cavabları verildi, onların niyyətləri ifşa olundu.
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Liderlər Sammitinin açılış mərasimində Prezident İlham Əliyev açıq şəkildə bəyan etdi ki, bu gün Azərbaycan qlobal neft hasilatında 0,7 faiz, qlobal qaz hasilatında isə 0,9 faiz paya malikdir. Ölkə başçısı vurğuladı ki, amma dünyada bir nömrəli neft və qaz hasilatçısı olan, Azərbaycandan 30 qat artıq neft hasil edən ölkənin yalan xəbər mediası bizi neft dövləti adlandırır.
"Yaxşı olardı ki, ən azı onlar özlərinə və Azərbaycandan 10 dəfə artıq neft hasil edən özlərinin qonşuluğundakı ölkəyə baxsınlar. Azərbaycanın qlobal qaz atılmalarındakı payı cəmi 0,1 faizdir"-deyə Azərbaycan Prezideni bəyan etdi. Təkcə bu bəyanat kifayət edər ki, antiazərbaycan qüvvələri ifşa olunsunlar. Onlar geniş miqyasda ifşa olundular və əsl niyyətləri dünyaya bəlli oldu.
"COP29 tribunasından Azərbaycana qarşı düşmən münasibətində olanlara layiqli cavab verildi..."
Müstəqil ekspert Rauf Zeyni "Bakı-Xəbər"ə şərhində bildirdi ki, COP29 beynəlxalq tədbiri Azərbaycanın müasir tarixində əhəmiyyətli hadisə olması ilə yanaşı, həm də beynəlxalq tribuna olaraq çox əhəmiyyətlidir və bu tədbirdə 196 dövlətdən 72 min qonaq iştirak edir. "Ölkə başçısı, Müzəffər Ali Baş Komandan İlham Əliyev öz çıxışında COP29-un mahiyyətini, əhəmiyyətini qeyd etməklə yanaşı, həm də bir çox həqiqətləri dünya ictimaiyyətinə çatdırdı. Prezident Azərbaycanın neft ölkəsi olması iddiası ilə bəzi Qərb dövlətlərinin, bəzi Qərb mediasının çıxışlarına tutarlı cavab verdi. O, Azərbaycana qarşı təxribatla məşğul olan qüvvələrin ittihamlarını iqtisadi təhlilərlə, faizlərlə, konkret rəqəmlərlə, faktlarla ifşa etdi. Bildirdi ki, Azərbaycanın dünya neft istehsalında cəmi 0,7 faiz payı var. Prezident bütün məsələlərə aydınlıq gətirməklə bizə qarşı düşmən mövqeyi sərgiləyənlərin, əsassız ittiham irəli sürənlərin niyyətini ifşa etdi".
R.Zeyninin sözlərinə görə, biz COP-a yüksək səviyyədə ev sahibiliyi etməklə Cənubi Qafqaz ölkəsi olaraq perspektivli "yaşıl" ölkə olduğumuzu, dünyaya yeni açılan ölkə olmağımızı sübut etdik. 33 illik müstəqillik dövrümüzün ən möhtəşəm tədbirlərdən birini keçirdiyimizi deyən R.Zeyni qeyd etdi ki, Azərbaycan dünyaya COP örnəyi təqdim etdi, COP standartları müəyyən etdi, ona görə də COP29 Azərbaycan dövlətinin təşkilatçılığı ilə tarixə düşdü. "Bundan əvvəl keçirilən COP-lara baxanda, bundan sonra keçiriləcək COP-ları təəsvvür edəndə bizim təqdim etdiyimiz örənəyin mütləq şəkildə qeyd ediləcəyinə inanıram. COP28-ə Birləşmiş Ərəb Əmirlikləri ev sahibliyi etdi, COP29-a Azərbaycan ev sahibliyi edir, COP30-a Brazilya ev sahibliyi etmək niyyətindədir. COP31-ə isə Türkiyə Cumhuriyyəti namizədlərdən biridir. Düşünürəm, ona nail ola biləcək".
R.Zeyni deyir ki, Azərbaycanın 33 ildə nə qədər inkişaf etdiyi, bunun beynəlxalq nüfuzumuzun artmasına xidmət etdiyi göz önündəndir. O qeyd etdi ki, 2020-ci ildə baş verən əks-hücum əməliyyatları, 2023-cü ildə keçirilən lokal xarakterli antiterror tədbirləri nəticəsində işğal altında olan torpaqlarımız azad edildi. Ərazi bütövlüyünü, suverenliyini bərpa edən qalib bir dövlət kimi Azərbaycanın dünyada böyük nüfuz qazandığını qeyd edən R.Zeyni vurğuladı ki, xüsusilə də biz Azərbaycan Prezidentinin Cənubi Qafqazın sınırlarına sığmayan bir lider olduğunu görməkdəyik. "Dövlətlərin başçılarının, rəsmi şəxslərin Azərbaycan Prezidentindən ayaqüstü də olsa xahişlər etdiyini canlı yayımlarda görürdük. Onlar xahiş edirdilər ki, BMT-nin baş katibinin bizim ölkəmizə gəlməsinə də kömək edin. Yəni COP29 dünya üçün bir sübut oldu ki, Azərbaycan Prezidenti statistik rəqəmləri açmaqla Azərbaycanın dünyada yerini müəyyən etdi və o cümlədən Azərbaycana qarşı ədalətsiz mövqe sərgiləyən dünya siyasətçilərinə də COP29 tribunsından öz açıq mesajlarını göndərdi.
COP29 tribunasından Azərbaycana qarşı düşmən münasibətində olanlara layiqli cavab verildi və onlar təkzibolunmaz faktlarla ifşa edildilər".
R.Zeyni qeyd etdi ki, həm Cozef Borrellə, həm də digərləri ilə bağlı Prezident öz fikirlərini bildirdi. "Prezident onlara layiqli cavab verdi və bildirdi ki, biz cəngəllik ölkəsiyiksə bizdən kənar durun, bizim daxili işlərimizə qarşımayın. Bir məsələni bilmək lazımdır ki, belə beynəlxalq tədbirlərin çox böyük əhəmiyyəti, bunun görünən və görünməyən tərəfləri var. Ona görə də düşünürəm ki, COP tədbiri Azərbaycan tarixində çox uğurlu bir səhifədir. Biz belə beynəlxalq tədbirlərə çox böyük iddialarımızı ortaya qoymalıyıq, nə qədər imkan var o qədər belə böyük tədbirlər keçirməliyik.
Yeri gəlmişkən, QHT-lər də COP-da çox fəaldırlar. İstər Milli QHT Fondu, istər Beynəlxalq Avrasiya Mətbuat Fondu, istər ekoloji təşkilatlarımız COP çərçivəsində müxtəlif panellər keçirtdilər. onlar da Azərbaycan həqiqətlərinin dünya ictimaiyyətinə çatdırılmasında öz mühüm töhfələrini verdilər.
Dövlətimizə və xalqımıza uğurlar azrulayıram. Təbii ki, belə beynəlxalq tribunalardan gerçəkləri, reallıqları dünya ictimaiyyətinə çatdırmalıyıq" - deyə R.Zeyni vurğuladı.
İradə SARIYEVA
