Hafiz Cabbarov: "O dərslik məndə var, hazırda onu analiz edirəm"
Ermənistanda VII sinif üçün nəzərdə tutulan "Ermənistan tarixi" dərsliyində Qarabağ Azərbaycan ərazisi kimi göstərilib. Bu barədə erməni mediası məlumat yayıb. Bildirilir ki, kitabdakı xəritələrdən birində Qarabağ Azərbaycanın bir hissəsi kimi təqdim olunub.
Qeyd olunur ki, dərsliyin müəllifi Smbat Hovhannisyandır. Sözügedən xəritə dərsliyin 80-ci səhifəsində yerləşdirilib.
Məlumat üçün bildirək ki, VII sinif "Ermənistan tarixi" dərsliyindəki xəritədəki dəyişiklik, yəni Qarabağın Azərbaycan ərazisi kimi göstərilməsi ciddi qalmaqala səbəb olub. Bununla bağlı "Qolos Armeniya" müəllifi və Paşinyan hökumətini tənqid edən məqalə verib. Oktyabrın 26-da yayımlanan məqalədə bildirilir ki, Paşinyan rejimi qəsdən tarixi "saxtalaşdırmaq" siyasəti aparır və bununla bağlı "əsaslı şübhələr" var. Sözügedən sayt da qeyd edir ki, "Artsax" təyinatı "Ermənistan tarixi" dərsliyindəki xəritədən silinib. "Əvvəlcə Paşinyan rejimi bu adı rəsmi sənədlərdən çıxardı, daha sonra mətbuat katibi Nazeli Baqdasaryan brifinq zamanı "Artsax" dediyi üçün üzr istədi, sonra dərslikdə mövcud qalmaqal başladı. Azərbaycanlıların qədim zamanlardan guya ermənilərlə yan-yana yaşadıqlarını dərsliklərdə ağ vərəqdə qara hərflərlə yazan "tarixçi" Smbat Hovhannisyana məqalədə "sağ ol" da deyilirdi.
Yəni Ermənistan hökumətinin sözügedən dərslikdəki xəritədə Qarabağın Azərbaycan ərazisi olaraq göstərilməsinə göstəriş verməsi erməni cəmiyyətində narazılıq yaratsa da, Qarabağın Azərbaycan torpağı olduğu etiraf edilib.
"...Real tarixlə barışıblar"
Erməni mediasında Ermənistanda VII sinif üçün nəzərdə tutulan "Ermənistan tarixi" dərsliyində Qarabağın Azərbaycan ərazisi kimi göstərilməsi barədə yayılan xəbərə şərh verən orta məktəblər üçün "Azərbaycan tarixi" dərsliklərinin həmmüəlliflərindən olan tarixçi Hafiz Cabbarov "Bakı-Xəbər"ə şərhində bildirdi ki, Ermənistan və ermənilər heç zaman Azərbaycana qarşı əsassız ərazi iddialarından əl çəkə bilmir. "Həmin dərslikdən götürdüyüm xəritəni də sizə təqdim edirəm, bu ilk dəfə sizdə çap olunacaq. O dərslik məndə var, hazırda onu analiz edirəm. Bizdə bəzən yanlış xəritə paylaşırlar. Ermənilərin bizə qarşı yenə də əsassız ərazi iddiaları davam edir. Bu xəritənin adı belədir: "Böyük Tiqranın imperiyası müasir sərhədlərdə". Burada sadəcə olaraq bir məqam var ki, real tarixlə barışıblar. Yəni burada qondarma, tarixdə heç zaman olmayan və heç zaman olmayacaq dırnaqarası, terrorçu, separatçı rejimin xəritəsini artıq göstərmirlər. Azərbaycan Respublikasının 86,06 min kvadratkilometrlik rəsmi ərazisini belə göstərirlər. Ancaq xəritədə gördüyünüz kimi, yenə də onların Azərbaycana qarşı ərazi iddiaları qalır. Azərbaycanın qanuni ərazilərinə qarşı yenə də yazılar qeyd olunur, guya bunların tarixən əraziləri olub. Düzdür, müəyyən dəyişiklik ediblər, bu da irəliyə addımdır, reallıqla hesablaşırlar. Ancaq ermənilər elə bir toplumdur ki, onların saxta iddialardan əl çəkəcəklərinə inanmıram. Hətta VII sinif "Ermənistan tarixi" dərsliyində başqa xəritələr də var, yenə də ənənəvi olaraq qədim və müasir Azərbaycan torpaqlarını tarixdə heç zaman olmayan "Böyük Ermənistanın" ərazisi kimi göstərirlər. Guya bu torpaqlar o utopik "dövlətə" aid olub. Əqrəb yenə öz əqrəbliyindədir. Sadəcə üstün cəhəti odur ki, qəhrəman ordumuzun qalibiyyətli nailiyyətləri nəticəsində yaradılan reallıqla hələ ki, barışırlar. Burada artıq Azərbaycan Respublikasının ərazisi tam şəkildə göstərilib"-deyə bildirən tədqiqatçı bunu bir üstünlük sayır.
H.Cabbarov dedi ki, xəritə sözügedən dərsliyin 80-ci səhifəsində yer alıb. Bununla belə, H.Cabbarov əlavə etdi ki, 80-ci səhifədə yer alan xəritədə Azərbaycan Respublikasının ərazisi tam şəkildə göstərilsə də, həmin dərslikdəki başqa xəritələrdə yenə də ərazi iddiaları qalır. "Həmin xəritənin adı "Böyük Tiqranın imperiyası müasir sərhədlərdə"dir və onlar bununla müasir sərhədləri qəbul edirlər. Ancaq məzmunu budur ki, "bu torpaqlar onların tarixi torpaqlarıdır". Təbii ki, bunun da heç bir əsası yoxdur"-deyə H.Cabbarov qeyd etdi.
İradə SARIYEVA
