Sahil Kərimli: “…Bu təşkilat dünyada dağıdıcılıqla, hətta terroru və terrorçuları maliyyələşdirməklə məşğul olub”
USAİD-in (ABŞ Beynəlxalq İnkişaf Agentliyi) terror təşkilatı şəbəkələri ilə əlaqələri, onları maliyyələşdirdiyi faktları ifşa edildikcə ortaya çox dəhşətli faktlar çıxır. Bu faktları isə elə ABŞ rəhbərliyi dilə gətirir.
ABŞ Konqresində Vaşinqtonun terror təşkilatlarını maliyyələşdirməsi ilə bağlı dinləmələrdə şok etiraflar edilib. ABŞ Nümayəndələr Palatasının üzvü Skott Perri Konqresin iclasında ABŞ-ın “İŞİD”, “Əl-Qaidə”, “Boko Haram”, “İŞİD Xorasan” və terrorçuların təlim düşərgələrinə milyonlarla dollar köçürdüyünü iddia edib.
Prezident Donald Trampa yaxınlığı ilə tanınan Respublikaçılar Partiyasının üzvü Perri çıxışında Amerikanın terror təşkilatlarının və təlim düşərgələrinin əsas maliyyəçisi olduğunu və keçən il bu qruplara ümumilikdə 697 milyon dollar xərcləndiyini deyib.
“USAİD-in “İŞİD”, “Əl-Qaidə”, “Boko Haram”, “İŞİD Xorasan” və başqa terror təşkilatlarına milyonlarla dollar köçürməsi məsələsinin özü onun əsl mahiyyətini ortaya qoyur”
Siyasi ekspert Sahil Kərimli “Bakı-Xəbər”ə şərhində bildirdi ki, USAİD-in indiyə qədər hansı pozuculuq və dağıdıcılıq fəaliyyəti ilə məşğul olması gizlin deyil. S.Kərimlinin sözlərinə görə, bu qurumun qorxunc terror təşkilatlarına pul ayırması faktı onun əsl mahiyyətini, məqsədini ortaya qoyur. “Nəzərə almaq lazımdır ki, USAİD-in bu qanunsuz əməllərini üzə çıxaran və bu təşkilatın ölkədən çıxarılması ilə bağlı qərar verən ilk dövlət Azərbaycan olub. USAİD uzun illər ABŞ-ın büdcəsindən ayrılan pullarla dünyanın bir çox ölkəsində dövlət çevrilişləri, kütləvi iğtişaşlar, cəmiyyətdə pozuculuq fəaliyyətinin yaradılması, təxribatların hazırlanaraq çeşidlənməsi və reallaşdırılması istiqamətində çirkli fəaliyyətlə məşğul olub. Bu fəaliyyəti artıq ABŞ-ın hazırkı hakimiyyiyyəti ifşa edib və üzə çıxarılıb. İndi ABŞ şok etiraflarla çıxış edir ki, USAİD daha uzağa gedərək dünyada terrorçuluğu və bu kimi mənfi meylləri maliyyələşdirən təşkilat olub.
USAİD-in “İŞİD”, “Əl-Qaidə”, “Boko Haram”, “İŞİD Xorasan” və başqa terror təşkilatlarına milyonlarla dollar köçürməsi məsələsinin özü onun əsl mahiyyətini ortaya qoyur. Bütün bunlar onu göstərir ki, uzun illər dünyanın bir çox ölkəsində müəyyən adlar altında fəaliyyət göstərən, əslində isə qərəzli və qəbuledilməz əməllər həyata keçirən bu təşkilat dünyada dağıdıcılıqla, hətta terroru və terrorçuları maliyyələşdirməklə məşğul olub”.
S.Kərimli qeyd etdi ki, artıq ABŞ hökuməti bu təşkilata qarşı çox ciddi tədbirlər həyata keçirir, dünyanın əksər ölkəsində fəaliyyət göstərən bu təşkilatın bağlanması və ölkələrdən çıxarılması ilə bağlı addımlar atılır. “Çox uzağa getməyək. Bu təşkilat Cənubi Qafqazda uzun illər pozuculuq fəaliyyəti ilə məşğul olub. Hətta Cənubi Qafqazda yerləşən bəzi ölkələrdə mənfi tendensiyaları yaradan və təxribatçı, pozucu fəaliyyətlə məşğul olan bir qurum olub. Ona görə də artıq USAİD-lə bağlı şok detallar, faktlar üzə çıxarılıb. Təbiidir ki, hələ USAİD-in dünyada göstərdiyi fəaliyyətlə bağlı daha dərin, daha tutarlı faktlar, sübutlar ortaya çıxacaq”.
S.Kərimli hesab edir ki, bu istiqamətdə beynəlxalq təşkilatlar da öz mövqeyini bildirəcək.
İradə SARIYEVA
