Paşinyan Qərb və Amerikanın maraqlarını Ermənistan vətəndaşlarının maraqlarından üstün tutur
Məlum olduğu kimi, ATƏT-in Minsk qrupunun buraxılması ilə bağlı təkliflə Azərbaycan prezidenti İlham Əliyev çıxış edib. Bu, sülh müqaviləsinin bağlanması üçün tamamilə məntiqlidir və bunu Paşinyan da təsdiqləyir.
Belə ki, Baş nazir Nikol Paşinyan erməni mediasına müsahibəsində ATƏT-in Minsk qrupunun buraxılması ideyasına Ermənistanın mövqeyi ilə bağlı sualı cavablandırarkən deyib ki, buna münasibətimiz konstruktivdir. O vurğulayıb ki, Ermənistan belə bir mövqeyi anlayır ki, əgər münaqişə yoxdursa, o zaman münaqişənin həlli ilə məşğul olan formatın mövcudluğunun nə mənası var?
Amma o, Azərbaycanın da məsələyə eyni məntiqlə yanaşmasına əminliyin vacib olduğuna və niyyətinin "qondarma" Qərbi Azərbaycan diskursunu inkişaf etdirərək Ermənistan Respublikasının ərazisinə qarşı təcavüzkar siyasət yürütmək olmadığına bizi inandırmalıdır.
Birincisi, Azərbaycanın məntiqi ilə Nikol Paşinyanın bu ifadəsində sərgilədiyi məntiq arasında heç bir fərq yoxdur. Ermənistan Azərbaycanın belə bir niyyətinin olduğunu hardan sezib? Əlbəttə, heç yerdən. Doğrudan da, bu gün münaqişə yoxdursa, onu tənzimləyən qurumun qalmasına heç bir ehtiyac yoxdur. Lakin Paşinyan heç bir ehtimalı olmayan məsələni arqument kimi gətirir. Lap tutaq ki, Minsk qrupu fəaliyyət göstərdiyi dövrdə Azərbaycan silahlı hücum edərək, 1920-ci ilə qədər ona məxsus olan torpaqları öz nəzarətinə götürdü. O zaman Minsk qrupu gəlib Ermənistanı müdafiə edəcək? 30 illik fəaliyyəti dönəmində məlum oldu ku, bu qurum heç bir münaqişənin həllinə qadir deyil. Sadəcə olaraq, Minsk qrupu Azərbaycan və Ermənistanın super güclər tərəfindən nəzarətdə saxlanilmasının ən zəif alətlərindən biridir. Az da olsa, bu qurum hər iki dövlətin iradəsinə təsir imkanlarına malikdir. Azərbaycan tərəfi Minsk qrupunun ləğv edilməsində məhz buna görə maraqlıdır. Ermənistənın baş nazirinin arqumenti isə tamamilə boş şeydir. Paşinyan sadəcə Qərbin və ABŞ-ın tapşırığı ilə belə bir anlaşılmayan "arqument" tapıb. Bu gün Avropaya inteqrasiyanı özünə məqsəd seçən, NATO-ya daxil olmağı hədəfləyən Ermənistan iqtidarı güvəndiyi qüvvələrin əsirinə çevrilib. Ermənistanla sülh sazişi imzalamaq istəyən Azərbaycan Minsk qrupunun ləğv edilməsini sülh sazişinin şərtlərindən biri kimi ortaya qoyub. Lakin Paşinyan bədnam müttəfiqlərinin onun boynuna qoyduğu öhdəliyi Ermənistan vətəndaşının taleyindən daha üstün tutur. Sülh sazişi nə qədər tez imzalansa, bu, Ermənistan iqtisadiyyatı üçün daha səmərəli olar. Ölkədə insanların həyat firavanlığı daha qısa müddətdə təmin edilə bilər. Lakin hökumət sülh sazişinin iki bəndini yerinə yetirmək istəmir. Paşinyan nə Minsk qrupunun ləğv edilməsini, nə də Avropa İttifaqı mülki müşahidə missiyasını sərhədlərdən geri çəkmək istəyir. Reallıq ondan ibarətdir ki, Avropa İttifaqının müşahidə missiyasının Ermənistanda qalma müddəti daha iki il uzadılıb. Bu o deməkdir ki, Minsk qrupu ləğv edilsə də, ən azı iki il - Avropa İttifaqının müşahidə missiyası Ermənistanda öz missiyasını başa vurana qədər sülh sazişini imzalamaq mümkün olmayacaq. O da vaxti yenidən uzatmasalar...
Bir qədər də konkretləşdirsək, Azərbaycanla Ermənistan arasında sülh müqaviləsinin bağlanmasına ABŞ və Avropa İttifaqı mane olur. Halbuki, bu dövlətlər 30 ildir bizə kömək etmək, ədalətli və ləyaqətli sülhün bağlanmasına yardım etmək istəyirlər. Bu gün bizim onların yardımına heç bir ehtiyacımız yoxdur, sadəcə bölgədən çıxıb, bizi iki qonşu baş-başa buraxmalarını istəyirik. Amma bunu da etmirlər. Hələ Ermənistana Amerika sərhədçilərinin də gəlişi planlaşdırılır...
Akif NƏSİRLİ
