Uzun fasilədən sonra erməni parlamentinin “Mülki müqavilə” fraksiyasının deputatları Paşinyanla görüşüb və üç saatdan çox müzakirə aparıblar. Maraqlıdır ki, mümkün məlumat sızmalarının və onların nəticələrinin qarşısını almaq üçün deputatlara görüş barədə iclasdan beş dəqiqə əvvəl xəbər verilib:
“Paşinyan Qarabağda baş verənlərdən danışaraq, dövlət qurumlarına Qarabağ ermənilərinin nəinki ən sürətli və maneəsiz köçürülməsini, həm də onların işlə təmin olunması məsələlərini təşkil etməyi tapşırıb. Amma heç bir şəkildə onların İrəvana köçürülməsinə imkan verməməyi vurğulayıb. O, rusların fəaliyyətlərini davam etdirmək üçün Qarabağda müəyyən sayda insanı saxlamağa çalışacaqları ilə bağlı təəssüratını bölüşərək qeyd edib ki, bu artıq Ermənistan üçün problem deyil, qoy ruslar Azərbaycanla problemlərini həll etsinlər”.
Qarabağdan köçən ermənilərin İrəvana buraxılmaması ilə bağlı qərarı verməklə Paşinyan özünü inqilab risqindən sığortalamağa çalışırmı?
Politoloq Ramiyyə Məmmədova “Bakı-Xəbər”ə açıqlamasında bildirdi ki, baş verən son proseslərin Ermənistanın ziyanına olduğuna dair rəy yaratmağa çalışsalar da, əslində bunlar ermənilərin xeyrinədir: “30 illik işğal onları çox geriyə atdı. Onsuz da zəif iqtisadiyyatı olan bu ölkəyə Qarabağ məsələsi əlavə yük olmuşdu. Bundan sonra Ermənistanın qlobal iqtisadiyyata transformasiya olunması baş tutacaq. Paşinyanın eyni anda bir neçə stulda oturmaq istəməsi Ermənistanı təlatümlü vəziyyətə gətirib. Artıq bütün dünya şahiddir ki, Qarabağın Ermənistana heç bir aidiyyəti yoxdur. Biz orada yaşayan ermənilərə ölkə başçısı səviyyəsində bir neçə dəfə çağırış etdik ki, gəlib bayrağımız altında birləşsinlər. Amma təəssüf ki, qulaq asmadılar. İndi görürlər ki, Ermənistan tərəfdən onlara heç bir fayda yoxdur. Güvəndikləri Rusiya da bu məsələdə onlara dəstək vermədi. Bəzi ermənilər reinteqrasiya təklifini qəbul edib yaşıyacaqlar. Gedənlər isə erməni cəmiyyətinə çətinliklə inteqrasiya olunacaqlar. Çünki Qarabağ erməniləri ilə onların arasında fərq var. Bunu ermənilərin özləri də etiraf edir. Ermənilərin İrəvana yerləşdirilməsi Paşinyanın devrilməsi üçün əsas faktor ola bilməz. Paşinyanın sülh müqaviləsini imzaması lazımdır. Bunu əksər ölkələr istəyir. Bu baxımdan da Ermənistanda hakimiyyət dəyişikliyinin baş verməsi daxili faktordan az asılıdlr. Ermənistanda əhalinin çoxu ölkəni tərk edib. Əyalətlər boşdur. Qarabağdan köçən erməniləri əyalətlərdə, nisbətən zəif şəraitdə yerləşdirməklə Ermənistan həm də beynəlxalq qurumlardan külli miqdarda yardımlar almaq istəyir. Onsuz da imkanı olanlar gedib paytaxtda yaşayacaq”.
Ermənistan tərəfi Qarabağı tərk edən ermənilərin statistikasını açıqlayıb.
Qarabağda bu qədər erməninin olmadığı, rəsmi İrəvanın rəqəmləri şişirtdiyi bəllidir. Bunu Rusiya sülhməramlılarının rəqəmləri, Azərbaycanın əlində olan statistika və separatçıların etirafları da isbat edir.
44 günlük müharibədən sonra Rusiya sülhməramlıları erməniləri Qarabağa qaytarmağa başladı və son açıqladıqları statistika 52 min 700 nəfər idi. Bu rəqəmdən sonra statistika yenilənmədi. Ermənistan və separatçılar 120 min erməninin olduğu iddiasından əl çəkməsə də, 2021-ci ilin iyun ayında Araik Arutyunyan Paşinyanla münasibətlərinə görə ona qarşı irəli sürülən ittihamlara “Ermənistanla əlaqələr qurmadan 35 min “vətəndaşın” sosial probleminin həllini necə təsəvvür edirsiniz” cavabını vermiş, bununla da erməni əhalisinin real sayını etiraf etmişdi. Rəsmi Bakı iki il öncə Qarabağda 25 min erməninin olduğunu açıqlamış, bu statistikanın Laçın yoluna vizual nəzarət nəticəsində əldə edildiyini bildirmişdi: o vaxt rusların nəzarətində olan yoldan gəlib-gedənlərin sayı hesablanırdı.
Bu statistika fonunda Ermənistanın açıqladığı rəqəmlər nəinki reallıqdan uzaqdır, hətta özlərini də təkzib edirlər. Çünki müharibədən sonra separatçılar Qarabağa 105 min erməninin qayıtdığını iddia edirdi, bu gün isə ərazidə 120 min erməninin olduğu iddiasından bəhs edirlər.
Məhəmmədəli QƏRİBLİ
