Bayramovun səfərinə Brüsseldən ayrıca bəyanat yaxşıdır - Qarabağ ermənilərinə yanaşma isə qüsurlu...

Avropa İttifaqının Vyanadakı ATƏT və BMT strukturlarında nümayəndəliyi Azərbaycanın xarici işlər naziri Ceyhun Bayramovun səfəri ilə bağlı bəyanat yayıb. Bu barədə erməni mediası  məlumat verib. Bəyanatda artıq bitmiş  “Dağlıq Qarabağ” münaqişəsinə və Ermənistanla Azərbaycan arasındakı münasibətlərə də xüsusi diqqət yetirilib:

“Biz Azərbaycanı “Dağlıq Qarabağ”ın erməni əhalisinin hüquqlarını və təhlükəsizliyini qoruyacaq gündəm hazırlamağa çağırırıq. Hazırkı vəziyyət narahatedicidir və mənfi humanitar nəticələrə malikdir, çünki etnik erməni əhalisi əsas enerji və rabitə xidmətlərində dəfələrlə fasilələrlə üzləşib. Atəşkəs rejiminin tez-tez pozulması da onların rifahı ilə bağlı ciddi narahatlıq yaradır.

Biz Bakını etnik erməni əhalisinə qoyulan məhdudiyyətləri aradan qaldırmaq, sabit enerji təchizatını təmin etmək və enerji sisteminin qorunub saxlanmasına imkan vermək üçün konkret addımlar atmağa çağırırıq. Xüsusilə məhbusların azad edilməsi ilə bağlı əlavə etimad tədbirləri də görülməlidir”.

Çox maraqlıdır ki, bəyanatda Ermənistana deyil, yalnız Azərbaycana konstruktivliklə bağlı çağrışlar edilir. Eyni zamanda deyilir ki, Azərbaycan da Avropa Birliyinin missiyasını qəbul edib, regional təhlükəsizliyin iştirakçısına çevriləcək. Sanki belə anlaşılır ki, regional təhlükəsizliyin əsas təminatçısı Ermənistan olub, Azərbaycanın burada heç bir rolu yoxdur. Bəyanatın məzmununu qüsurlu saymaq olarmı?

Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, əvvəl bu dairələr tərəflərin məsuliyyətini eyniləşdirən məzmunlu bətanatlarla çıxış edirdi: “Azərbaycanın əldə etdiyi qələbədən sonra isə tam fərqli yanaşma ortaya qoyurlar. Sanki Azərbaycanı sülhü sabotaj edən tərəf kimi təqdim edirlər. Bu yolverilməzdir. Qarabağdakı ermənilərlə bağlı vəziyyətin tənzimlənməsi  Azərbaycanın daxili işinə aid olan məsələdir. Bununla bağlı Azərbaycan dəfələrlə öz mövqeyini açıqlayıb. Bəyan edib ki, erməni vətəndaşlarımız bütün vətəndaşlıq hüquqlarından istifadə edə bilər. Təbiidir ki, bütün bunlar sadə erməni vətəndaşlarına aiddir, separatçı dəstələrə heç bir aidiyyəti yoxdur. Avropa İttifaqı isə sadə vətəndaşlardan daha çox erməni separatçılarının müdafiəsinə diqqət ayırmış olur. Belə qərəzli münasibət Azərbaycanla Avropa Birliyi arasında münasibətlərə ciddi ziyan vurur. Avropa Birliyi Azərbaycanın əsas ticarət tərəfdaşıdır. Eyni zamanda, Mərkəzi Asiya, Cənub-Şərqi Asiya arasında da ölkəmiz mühüm logistika və kommunikasiya mərkəzidir. Orada Ermənistanın əsas dostu olan Fransanın təsiri güclüdür. Fransanın istər 44 günlük Vətən müharibəsindəki mövqeyi, istərsə də postmüharibə dövründə ölkəmizə qarşı qərəzli münasibəti onun Cənubi Qafqazda sabitliyin yaranmasına, tərəflər arasında sülh müqaviləsinin imzalanmasına əngəl törətdiyinin bariz nümunəsidir. Makronun bəyanatlarında guya Azərbaycanın dəhşətli müharibə törətdiyini iddia etməsi, faktları manipulyasiya cəhdi dünya ölkələrinin fikrini yayındırmaq məqsədi daşıyırdı. Buradan Fransanın heç də Ermənistandan geri qalmadığını və məkrli siyasəti ilə "öz tayını tapdığını" görmək mümkündür. Şübhəsiz, həm ermənilərin, həm də Fransanın bütün mənfur əməlləri əbəsdir. Çünki Azərbaycanın nüfuzu nəinki regionda, hətta beynəlxalq müstəvidə də kifayət qədər yüksəkdir. Ermənistan və onun dostları nə qədər qəbullanmaq istəməsə də, sülh müqaviləsinin imzalanması qaçılmazdır. Lakin ermənilər  dərk etməlidir ki, Azərbaycanın verdiyi bu şansın da müddəti tükənmək üzrədir. Əgər Ermənistanda bir az ağıl olsa, öz dövlətinin, xalqının rifahı üçün sülh razılığına gələr. Əks halda, Paşinyanın bu cür rüsvayçılıqları onun sonunu gətirəcək. Avropa İttifaqı bunu hamıdan yaxşı dərk etməlidir”.

Məhəmmədəli QƏRİBLİ