Brüsseldə Ermənistan və Azərbaycan liderləri arasında Azərbaycanı Naxçıvanla birləşdirən əlaqə və onun necə qurulması barədə kifayət qədər ətraflı müzakirə aparılıb.
Bunu Brüsseldə Avropa Siyasət Mərkəzinin təşkil etdiyi “Cənubi Qafqazda Təhlükəsizlik” mövzusunda konfransda çıxış edən Aİ-nin Cənubi Qafqaz üzrə xüsusi nümayəndəsi Toivo Klaar deyib.
T.Klaarın sözlərinə görə, tərəflər müəyyən ümumi anlaşmaya gəliblər: “Biz müəyyən ümumi anlaşmaya nail olmuşuq və bunun necə həyata keçirilməsi baş nazir müavinlərindən ibarət işçi qrupuna qalıb, orada Ermənistan və Azərbaycan baş nazirlərinin müavinləri rusiyalı həmkarları ilə görüşüblər”.
Bununla belə, T.Klaar qeyd edib ki, tərəflərin mövqeləri arasında çox da məsafə yoxdur və bir az daha intensiv iş aparılmaqla fikir ayrılıqlarını aradan qaldırmaq, bu nəqliyyat əlaqəsinin necə təmin olunacağına dair anlayışa nail olmaq olar: “Regionun müsbət inkişafı Aİ-nin maraqlarına uyğundur. Bizim bu prosesdə iştirakımız heç bir üçüncü tərəfə qarşı yönəlməyib. Cənubi Qafqaz qonşu regiondur və bizim arzumuz budur ki, burada sülh və sabitlik olsun”.
“Klaarın açıqlamasından sonra belə məlum olur ki, artıq Avroittifaq buna qarşı deyil”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, T.Klaarın məlum açıqlaması ciddi məqamlardan xəbər verir: “Əvvəla qeyd edim ki, T.Klaar sıradan bir şəxs deyil. Avropa İttiffaqını təmsil etdiyi üçün onda bununla bağlı ciddi məlumatların olması istisna deyil. Bu o deməkdir ki, tərəflər arasında Zəngəzur dəhlizi ilə bağlı artıq prinsipial razılaşma var. Nəzərə almaq lazımdır ki, bu günlərdə Rusiya baş nazirinin müavini Aleksey Overçuk Ermənistanda səfərdə olub və baş nazir Nikol Paşinyanla görüşüb. Şübhəsiz ki, Overçukla müzakirə olunan əsas mövzulardan biri Ermənistan-Azərbaycan münaqişəsi kontekstində regional kommunikasiya xətlərinin açılması məsələsi olub. Overçuk 2021-ci il yanvarın 11-də İlham Əliyev, Vladimir Putin və Nikol Paşinyan arasında keçirilən görüş nəticəsində yaradılan baş nazir müavinlərinin üçtərəfli işçi qrupunda bu məsələlərlə məşğul olan Rusiya nümayəndəsidir. Onun əsas missiyası kommunikasiya xətlərinin açılması işində iştirak etmək və bununla bağlı məsələləri tənzimləməkdir. Çünki Zəngəzur dəhlizinin təhlükəsizliyini Rusiya Federal Təhlükəsizlik Xidməti təmin edəcək. Əvvəllər belə informasiyalar var idi ki, Avropa İttifaqı Zəngəzur dəhlizinin Rusiyanın nəzarəti altında olmasını istəmir. Ona görə də danışıqlarda Paşinyan tərəfi dirəniş göstərir. Ancaq T.Klaarın açıqlamasından sonra belə məlum olur ki, artıq Avroittifaq buna qarşı deyil. Təki Naxçıvanla quru əlaqəsi bərpa olunsun. Bu, həm də digər kommunikasiya xətlərinin açılmasına şərait yaradacaq. Bir məqamı da nəzərə almaq lazımdır ki, Azərbaycan üzü Zəmgilana doğru avtomobil və dəmir yollarının çəkilməsi ilə bağlı dayanmadan işləyir. Gələn il bununla bağlı bütün yollar hazır olacaq. Bununla paralel, Orta Dəhliz çərçivəsində yükdaşımaların həcmi artmaqdadır. Artan yüklər isə təkcə Bakı-Tbilisi-Qars dəmir yolu ilə deyil, həm də Zəngəzur dəhlizi ilə daşınacaq”.
Vidadi ORDAHALLI
