Ermənistan və İranın Azərbaycana qarşı birgə hərbi təxribat hazırlaması ilə bağlı son həftələrdə media məkanında müxtəlif məlumatlar dolaşmaqda idi. Aprelin 11-də baş verənlər bunun artıq faktiki təzahürlərindən biri hesab edilir.
Xatırladaq ki, həmin gün Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətindəki üzbəüz mövqelərini müxtəlif çaplı silahlardan istifadə etməklə atəşə tutub. Daha sonra qarşı tərəf minaatan və iriçaplı silahlardan da istifadə etməklə mövqelərimizi atəşə tutmaqda davam edib. Ordumuz tərəfindən görülən cavab tədbirləri zamanı Ermənistan silahlı qüvvələrinin bölmələri xeyli sayda itki verib. Son məlumatlara əsasən, açılan atəş nəticəsində ordumuzun 3 hərbçisi şəhid olub. Azərbaycan ordusunun cavab tədbirləri nəticəsində isə Ermənistan 4 əsgərinin öldüyünü, 6-nın yaralandığını bildirib. Yaralı erməni hərbçilərdən üçünün vəziyyəti qənaətbəxş, digərlərinin durumu isə orta-ağır dəyərləndirilir. Dığ yaşayış məntəqəsi istiqamətində təxribat törədərkən yaralanan Ermənistan Əlahiddə Ümumqoşun Korpusunun komandiri Armen Gözəlyan da yaralılar sırasındadır. Armen Gözəlyan Azərbaycana qarşı daim təhdid ritorikası ilə çıxış edib. O, Vətən müharibəsində Suqovuşanda yerləşən ən yüksək döyüş hazırlıqlı erməni alayı olan 6-cı dağatıcı Madagiz alayının komandiri olub. Lakin Vətən müharibəsinin ilk günlərində mühasirəyə düşmək təhlükəsi ilə üzləşəndə silah-sursatını, xəritəsini ərazidə qoyaraq qaçıb. O, hazırda çalışdığı vəzifəyə fevralın 1-də təyin edilib. Dığ kəndi istiqamətində ermənilərin minaatanlardan və iriçaplı silahlardan istifadə ilə atəşi davam etdirdiyi və ordumuzun cavab tədbirləri gördüyü zaman İran İslam İnqilabı Keşikçiləri Korpusu (SEPAH) əraziyə PUA-lar göndərdiyini açıqladı. Bildirildi ki, İranın Azərbaycanla sərhədinə PUA göndərilməsinin səbəbi kəşfiyyat məlumatları toplamaqdır. SEPAH-a bağlı kanallar isə İranın Azərbaycanla sərhədə gətirilən qüvvələrinə ən yüksək döyüş hazırlığı tapşırığı verildiyi haqda məlumat yaydı. Buna səbəb guya ölkənin suveren ərazisinə təhlükə ilə bağlı idi. Halbuki, Dığ kəndi yaxınlığından İran sərhədinə qədər məsafə maşın yolu ilə 180 km-dan, hava yolu ilə isə 80 km-dan çoxdur. Hadisə baş verənə qədər isə belə məlumatlar yayılmışdı ki, Azərbaycan və Ermənistanın dövlət sərhədi yaxınlığında SEPAH-ın diversiya qrupuna təlimlər keçilir. O vaxt diqqətçəkən daha bir məlumat həm də o idi ki, Ermənistan-İran diversiya qrupu Azərbaycanın Qubadlı və Laçın rayonları istiqamətində iki hücum planlaşdırır. Artıq bunlardan biri Laçın istiqamətində özünü göstərdi. Amma indi ermənilər özləri də etiraf edir ki, İran onlara axıra kimi kömək etməyəcək. Ermənistanın “Demokratik Alternativ” partiyasının sədri Suren Surenyants bildirir ki, İranın hər hansı bir hərbi əməliyyata qarışması tələ ola bilər. Surenyants hesab edir ki, İranın məhdudlaşdırıcı rolu var, amma xilaskar deyil: “Bakı İrana qarşı olan mövqeyini Qərbə təqdim etməkdə çox uğurludur”.
Baş verənləri şərh edən Türkiyənin ölkəmizdəki keçmiş hərbi attaşesi, general Yücel Karauz isə mətbuata açıqlamasında çox maraqlı məqamlara toxunub: “Təbii ki, baş verən təxribat gözlənilən idi və Ermənistanın terror fəaliyyətləri artaraq davam edəcək. Çünki uzun müddətdir ki, təxribat törətməyə hazırlaşırdılar”. Yücel Karauz İranın da Ermənistana uzun müddətdir hər cür dəstəyi verdiyini qeyd edib və bildirib ki, elə əsas məqamlardan biri İranla bağlıdır: “İran 1992-ci ildən bəri strateji seçimini müsəlman Azərbaycan tərəfdən deyil, Ermənistan tərəfdən edib. Üstəlik, bunu 40 milyona yaxın azərbaycanlının ölkə içərisində yaşadığını bilə-bilə edirlər. Görünən odur ki, hələ uzun müddət İranın mövqeyi dəyişməyəcək. 30 ilə yaxın işğal dövründə olduğu kimi, ondan sonra da Ermənistana hər cür hərbi, siyasi, maddi dəstəyi verməyə davam edir. Son təxribatda Ermənistanın İran PUA-larından, silah və sursatından istifadə etməsi barədə məlumat yayıldı. Üstəlik toqquşmanın başladığı andan etibarən İranın müşahidə PUA-larının Azərbaycanla sərhəddə uçuşlar keçirməsini, SEPAH-ın “Teleqram” kanallarının döyüşlərin getdiyi ərazilərlə bağlı xəritələr paylaşmasını qətiyyən sadə məsələ hesab etmək olmaz. Yəni Azərbaycan tək Ermənistana qarşı yox, həm də onun havadarlarına qarşı mübarizə aparır. Bundan sonra da təxribat və terror fəaliyyətlərinin davam etməsini, sülh müqaviləsinin imzalanmamasını istəyən dövlətlər, güc mərkəzləri və qruplar toqquşmalardan faydalanmaq üçün vəziyyəti daha da qızışdıracaqlar. Ermənistanın ordunu döyüş hazırlığı vəziyyətinə gətirməsi, mülki şəxsləri silahlandırması da təxribatların davam edəcəyindən xəbər verir”. General Türkiyənin bütün hallarda Azərbaycanın yanında olduğunu vurğulayıb və Şuşa Bəyannaməsini xatırladıb: “Əlbəttə ki, Azərbaycan heç bir halda şəhidlərinin bir damla qanını da yerdə qoymayacaq, bir qarış torpağını belə düşmənə verməyəcək. Türkiyədəki seçki prosesindən və dünyadakı qeyri-müəyyənliklərdən faydalanmaq istəyən güclər Azərbaycanın yalnız olmadığını bilməlidirlər. Can Azərbaycan heç bir halda yalnız deyil və olmayacaq. Türkiyə öz qardaşı Azərbaycanla sonsuzadək birlikdədir. Azərbaycanla bağlı kirli və qanlı planlar quranlar Şuşa Bəyannaməsini unutmasınlar. Onlar türk dünyasını da gözardı etməməlidirlər. Qarşılarında iki yol var: Ya normal dövlət kimi davranıb, sülh içində yaşamağı öyrənəcəklər, ya da 44 günlük Vətən müharibəsindəki kimi başlarına dəmir yumruq enəcək və tarixin zibilliyinə gedəcəklər!". İran üzrə ekspert Qarik Misakyan isə qeyd edir ki, əvvəllər İranda yalnız Amerika və İsrail əleyhinə bəyanatlar eşidilirdi. İndi eyni hal Azərbaycana münasibətdə nümayiş etdirilir. O vurğulayır ki, İran faktiki olaraq Azərbaycanı özünün ideoloji düşməni kimi təqdim edir.
Nahid SALAYEV
