Ermənistan Xarici İşlər Nazirliyi aprelin 11-də yarım gün ərzində Avropa İttifaqının (Aİ) müşahidə missiyasının komandiri Markus Ritteri Dığ kəndi istiqamətindəki erməni mövqelərinə getməsi üçün dilə tutub. Bu barədə erməni "Telegram" kanalları məlumat yayıb.
Aİ missiyası hətta erməni hərbçilərin müşayiəti ilə belə, kəndi ziyarət etməkdən imtina edib. Qeyd edək ki, aprelin 11-i saat 16:20 radələrində Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətindəki üzbəüz mövqelərini müxtəlif çaplı silahlardan istifadə etməklə atəşə tutub. Daha sonra qarşı tərəf minaatan və iriçaplı silahlardan da istifadə etməklə mövqelərimizi atəşə tutmaqda davam edib.
Hərbi qulluqçularımızın sayıqlığı nəticəsində Ermənistan tərəfinin təxribatının qarşısı qətiyyətlə alınıb, atəş mövqeləri susdurulub.
Ordumuz tərəfindən görülən cavab tədbirləri zamanı Ermənistan silahlı qüvvələrinin bölmələri xeyli sayda itki verib.
Ermənistan tərəfinin təxribatının qarşısını alarkən Azərbaycan Ordusunun hərbi qulluqçuları Zalov Vidadi Nizami oğlu, Həsənov Elşad Qabil oğlu və Tağıyev Səbuhi Gündüz oğlu şəhid olub.
Xatırladaq ki, fevralın 20-də Ermənistanda iki illik mandatla 100 nəfərdən ibarət yeni Avropa missiyası məskunlaşıb. Aİ missiyası mülki elan edilsə də, onun tərkibindəki 50 nəfər silahlı jandarmdır. Missiyanın məqsədi Ermənistanın sərhədyanı ərazilərində sabitliyi təşviq etmək, yerlərdə etimad yaratmaq və Ermənistanla Azərbaycan arasında münasibətlərin normallaşdırılması səyləri üçün əlverişli mühiti təmin etməkdir.
Missiyanın belə şübhəli davranışları onu deməyə əsas verirmi ki, Ermənistanı Dığ kəndindəki insidentə məhz Avropa Komissiyası təhrik edib?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, Qərbi Zəngəzurda cərəyan edən hadisələrdə xarici ölkələrin marağının olduğu açıq görsənir: “Söhbət həm də üçtərəfli müdaxilədən gedir. Bu müdaxilə, əsasən Rusiya, İran və Fransa tərəfdən daha çox edilir. Bölgədə münaqişə ocağının sönməsini istəməyən güclər var. Bu güclərin sırasında ən aktiv çıxış edəni Fransadır. Bu ölkənin mövqeyi sırf ermənipərəstdir. 44 günlük savaşda qazandığımız qələbədən sonra bir sıra ölkələrin əsl siması üzə çıxıb. Dünənə kimi gizli kartlarla blef edən qüvvələr indi açıq şəkildə təhdidlə məşğuldurlar. Öndə aktiv olanlarla yanaşı, arxa planda duranlar da var. Onlar istəmir ki, Ermənistanla Azərbaycan arasında sülh müqaviləsi imzalansın. Təəssüf ki, biz bundan doğan acı nəticələri də görürük. Onlar uzun müddətdir bunun üzərində işləyirlər. Ermənistanın məğlubiyyətindən sonra biz İranla aramızda olan 132 kilometrlik sərhədi tam bərpa etdik. Eyni zamanda Ermənistanla aramızdakı sərhədimizə nəzarəti həyata keçirdik. Onlar dinc ermənilərin də yaşamasına imkan vermirlər. Bu gün baş verən sərhəd təxribatlarında ermənipərəst Fransanın və onun formalaşdırdığı missiyanın da barmağının olduğu qənaətinə gəlirəm. Azərbaycan bu təzyiqlərə baxmayaraq, öz prinsipial mövqeyində qalmaqda davam edir. Azərbaycan öz sabitqədəm mövqeyi ilə bütün isətəklərinə nail olacaq. Bizim addımlarımız beynəlxalq qanunlarla ziddiyyət təşkil etmir. Xəbər verilir ki, Ermənistan Xarici İşlər Nazirliyi Avropa İttifaqının monitorinq missiyasının rəhbəri Markus Ritteri Dığ kəndi istiqamətində erməni mövqelərinə getməyə razı salmağa çalışıb, ancaq buna nail olmayıb.
Avropa İttifaqının müşahidə missiyasının Ermənistanın Azərbaycanla şərti sərhəd zonasına gəlişindən narazılığını rəsmi Bakı açıq mətnlə bəyan edib. Lakin Ermənistan hər dəfə buna qarşı əks mövqe sərgiləyib. İndi maraqlıdır ki, erməni tərəfinin də bu missiyadan narazılığı başlayıb”.
Məhəmmədəli QƏRİBLİ
