Xəbər verildiyi kimi, aprelin 11-i saat 16:00 radələrində Ermənistan ordusunun Dığ kəndi istiqamətində yerləşən bölmələri Azərbaycan Ordusunun bölmələrinə qarşı təxribat həyata keçirib. Ordumuzun 3 hərbçisi şəhid olub. Azərbaycan Ordusunun cavab tədbirləri nəticəsində isə Ermənistan 4 əsgərinin öldüyünü, 6-nın yaralandığını bildirib.
Dığ kəndi istiqamətində ermənilərin minaatanlardan və iriçaplı silahlardan istifadə ilə atəşi davam etdirdiyi və Ordumuzun cavab tədbirləri gördüyü zaman SEPAH əraziyə PUA-lar göndərdiyini açıqladı. Bildirildi ki, İranın “şimal-qərbinə” (Azərbaycanla sərhədə) PUA göndərilməsinin səbəbi kəşfiyyat məlumatları toplamaqdır.
SEPAH-a bağlı kanallar İranın Azərbaycanla sərhədə gətirilən qüvvələrinə ən yüksək döyüş hazırlığı tapşırığı verildiyi haqda məlumat yaydı. Buna səbəb guya İranın suveren ərazisinə təhlükə ilə bağlı olub. Halbuki, Dığ kəndi yaxınlığından (Laçın rayonu) İran sərhədinə qədər məsafə maşın yolu ilə 180 km-dan çox, hava yolu ilə isə 80 km-dan çoxdur.
Görünür, provokasiya etdiyi təxribatı daha yaxından müşahidə etmək və Ermənistana guya “hazır olduğunu” görüntüləmək istəyib. İranın bu addımının başqa hansı səbəbləri ola bilər?
Hərbi-siyasi ekspert Ədalət Verdiyev “Bakı-Xəbər”ə açıqlamasında bildirdi ki, İran Azərbaycana qarşı fəaliyyətləri ilə ilk dəfə deyil yadda qalır: “ Biz “SEPAH”ın Ermənistan ordusuna dəstək verməsi, onlara təlim keçməsi ilə əvvəllər də rastlaşmışıq. Belə bir silahların da onlara verilməsi istisna deyil. İran apardığı ləyaqətsiz anti-islam siyasəti nəticəsində davamlı olaraq Ermənistanı dəstəkləyib. İran dünyada azsaylı dövlətlərdən hesab olunur ki, işğalçı dövlətə daim dəstək verib. Bu da İranın Ermənistana olan ehtiyacından irəli gəlir. Silahların, PUA-ların Ermənistana verilməsinə dair kifayət qədər informasiya olsa da, bugünə qədər həmin silahların Ermənistanda olduğunu yalnız ehtimal etmək olar. Çünki, bunları təsdiq edən heç bir real sənəd, fotofakt mövcid deyil. “SEPAH”belə bir silahları vermə qərarını qəbul etmək səlahiyyəti yoxdur. Bu qərarlar adətən ölkə rəhbərliyi və dini lider tərəfindən qəbul edilir. Amma ola bilsin ki, belə bir qərar yuxarı instansiyalarda qəbul edilib, sadəcə “SEPAH”ın dilindən səsləndirilir. Bugünə qədər İran silahları, İran dronları dünyanın heç bir müharibəsində əsaslı və kardinal döngələrə, dəyişikliklərə səbəb olmayıb. Ona görə də bunların Ermənistana verilməsi əməliyyatlar meydanında çox şeyi dəyişməz, sadəcə bir az işğalçını cəsarətləndirəcək, vəssalam. Bu cəsarətlənmələrin isə nələr ilə nəticələndiyini vətən müharibəsi və ondan sonrakı dövrdə, ümumilikdə isə 1994 - cü ildən bugünə qədər müşahidə etməkdəyik. Qüvvələrin döyüş hazırlığına gətirilməsi isə mövcud gərginliklə bağlıdır. İranın bu gərginlikdən xəbəri var idi. Düşünmürəm ki, Azərbaycan tərəfi olaraq, İranda baş verənləri, sərhəddəki qoşun konsentrasiyasını və orda mövcud olan, cəmləşdirilən qoşunların döyüş hazırlığına gətirilməsini dövlətimiz nəzərə alır. Odur ki, gərginlik davam edir. Qismən bu gün ərazidə sakitlikdir. Amma vəziyyətin yenidən dəyişib- dəyişməməsi Ermənistanın davranışlarından asılıdır”.
Məhəmmədəli QƏRİBLİ
