Yerli icra hakimiyyəti orqanlarının rəhbərlərinin müavinlərinin yeni təyinat qaydası müəyyənləşib. Bu, Prezident İlham Əliyevin “Dövlət qulluğu haqqında” Azərbaycan Respublikasının Qanununda dəyişiklik edilməsi barədə” qanunun tətbiqi barədə fərmanda əksini tapıb. Beləliklə, Bakı Şəhər İcra Hakimiyyəti başçısının müavinləri Azərbaycan Respublikasının Prezidenti tərəfindən təyin olunacaq.
Digər yerli icra hakimiyyəti orqanlarının rəhbərlərinin müavinləri müvafiq yerli icra hakimiyyətlərinin başçıları tərəfindən Azərbaycan Respublikası Prezidenti Administrasiyasının rəhbəri ilə razılaşdırılmaqla təyin olunacaq.
Aydın Mirzəzadə: “Yerli icra başçısı müavinlərinin Prezident tərəfindən təyin olunması bu qurumların fəaliyyətinin inkişafına səbəb olacaq”
Yerli icra hakimiyyəti orqanlarının rəhbərlərinin müavinlərinin yeni təyinat qaydası barədə fikir bildirən millət vəkili Aydın Mirzəzadə “Bakı-Xəbər”ə açıqlamasında qeyd etdi ki, icra başçısı müavinlərinin Prezident tərəfindən təyin olunması müsbət addım kimi dəyərləndirilməlidir: “Məlumdur ki, icra başçıları görəcəyi işlərlə bağlı Prezident İlham Əliyevin tövsiyə və göstərişlərinə uyğun olaraq fəaliyyətlərini davam etdirir. İcra başçıları və onların müavinləri Prezident İlham Əliyevin fikirlərini özləri üçün fəaliyyətlərində vacib hesab edəcəklər. Danılmaz faktdır ki, ölkə başçısı bütün fəaliyyəti dövründə xalqa yaxınlığı ilə seçilib. Vaxtaşırı cəmiyyətlə görüşməsi, təyinat zamanı bütün tapşırıqları xalqın problemlərinin həll olunması istiqamətindədir. Bütün bunlar onu göstərir ki, Prezident İlham Əliyev istənilən hakimiyyət orqanına rəhbər şəxs və ya müavin təyin edərkən yalnız əhalinin firavanlığını düşünür”.
Millət vəkili hesab edir ki, yerli icra başçıları müavinlərinin Prezident tərəfindən təyin olunması bu qurumların fəaliyyətinin inkişafına səbəb olacaq. Həmin şəxslər Prezident tərəfindən təyin olunma məsuliyyətini hiss edəcək və öz vəzifələrini layiqli şəkildə icra edəcəklər.
Vüqar Bayramov: “Yerli səviyyədə strukturun inkişaf etməsi yeni modelin formalaşması deməkdir”
Millət vəkili Vüqar Bayramov qəzetimizə açıqlamasında bildirdi ki, icra hakimiyyəti orqanında strukturun yenilənməsi və kadr potensialının səmərəli şəkildə istifadə olunması prioritetdir: “Yerli icra hakimiyyəti başçılarının müavinlərinin Prezident tərəfindən təyin olunmasının məqsədi insan kapitalına uyğun olaraq kadr potensialını daha səmərəli istifadə etməkdir. Həmçinin, yerli icra hakimiyyəti orqanlarının səmərəli fəaliyyətini genişləndirməkdən ibarətdir”.
Millət vəkili hesab edir ki, yerli səviyyədə strukturun inkişaf etməsi yeni modelin formalaşması deməkdir. Prezidentin xüsusi nümayəndələrinin təyin edilməsi bu islahatıların bir hissəsidir: “Məlumdur ki, xüsusi nümayəndələr işğaldan azad olunan ərazilər və Naxçıvanda fəaliyyət göstərir. Cənab Prezident öz çıxışlarında qeyd edib ki, gələcəkdə Qarabağ və Şərqi Zəngəzurda tətbiq edilən modelin digər bölgələrə də transferi nəzərdə tutulur. Bu səbəbdən də növbəti dövrlərdə yerli icra hakimiyyəti orqanlarında strukturun inkişaf etməsi, yeni müasir çağırışlara uyğun olaraq idarəetmə sisteminin formalaşması müşahidə ediləcək”.
Günel CƏLİLOVA
