Tehran Azərbaycan və İran xarici işlər nazirləri arasında son telefon danışığını müsbət qiymətləndirir. Bunu İran Xarici İşlər Nazirliyinin rəsmisi Nasir Kənani deyib.
Kənani Azərbaycanın 4 İran diplomatını “persona non-qrata” elan etməsini tələsik və səmərəsiz addım adlandırıb:
“İran regionda qonşu ölkə kimi Azərbaycanla münasibətlərinə önəm verir. Mən Azərbaycanı ümumi maraqlara diqqət yetirməyə və öz qeyri-qanuni maraqlarını həyata keçirmək istəyən, regional və qonşu ölkələr arasında nifaq və gərginlik yaradan dövlətlərin hər hansı sui-istifadəsinə yol verməməyə çağırıram. İran həmişə siyasi dialoqun zəruriliyini vurğulayır və pərdə arxasında mübahisəli məsələlərdən qaçmağa üstünlük verir. Gərginliyə baxmayaraq, Tehran anlaşılmazlıqları dialoq yolu ilə həll etməyə çalışır”.
Vəziyyətin normallaşması üçün İran hansı addımları atmalıdır?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, İran Azərbaycanla münasibətləri normallaşdırmaq üçün ilk növbədə ölkəmizə qarşı düşmənçilik siyasətində əl çəkməlidir: “İranın Azərbaycanda təxribat pozuculuq cəhdləri dərhal dayandırılmalıdır. Tehranda səfirliyimizə qarşı törədilən terror cinayəti şəffaf araşdırılmalı, günahkarlar cəzalandırılmalıdır. Azərbaycan parlamentinin deputatına qarşı törədilən sui-qəsd cianyətinə aydınlıq gətirilməldir. İranın molla rejimi bütün bunlara görə Azərbaycandan qzr istəməldir. Hərçənd ki, sadalanan cinayətlərin və xain planların İranın ən ali rəhbərliyi tərəfindən dəstəkləndiyi hamımıma məlumdur. Amma yenə də yolun yarısından qayıtmaq yaxşı olardı. İran rəhbərliyi son günlər Azərbaycanın təziqləri qarşısında duruş gətirə bilməyərək balanslaşdırılmış bəyanatlar verir, vəziyyəti yumşaltmağa çalışır. Sağlam dialoqdan, gərginliyi aradan qaldırmaqdan danışırlar. Olsun. Amma molla rejimi çox yaxşı bilir ki, proseslərin bu həddə çatmasında birbaşa məsuliyyət rəsmi Tehranın üzərinə düşür. Çünki, Azərbaycan daim öz qobnşularına mehriban dostluq və səmimi qonşuluq münasibətləri bəsləyib. Rəsmi Bakı dəfələrlə İranın mənafeyinə zidd olan addımlardan imtina edib, İranın milli maraqlarına xələl gətirən heç bir addım atmayıb. Amma qarşılığında isə həmişə mıənfur münasibət görüb. Odur ki, İran rəhbərliyi olanlardan dərs çıxarmalıdır”.
Azərbaycana qarşı təxribatçı qərarları məhz İranın güc strukturları və deputatları qəbul edirlər. Güc strukturlarının saytlarında və televiziyalarında Azərbaycan əleyhinə təbliğat heç zaman dayanmayıb, bu məsələlərə də aydınlıq gətirilməlidir, bu məsələlərin həlli İran Xarici İşlər Nazirliyinin səlahiyyəti xaricindədir. Eyni zamanda İranın ali dini lideri mollalarına Azərbaycan haqqında danışarkən diqqətli olmalarını tövsiyyə etməlidir.
Nazirlər telefon danışığı zamanı Azərbaycanla İran arasında mövcud olan layihələrin icrası istiqamətində iş aparılmasına dair razılıq ifadə ediblər. İki ölkə arasında ortaq layihələrin icrası vacibdir. Ancaq münasibətlərdə gərginlik azalmadan, İrandakı bütün strukturlar Azərbaycanın daxili işlərinə qarışmaqdan vaz keçməyincə, təxribatlarını durdurmadıqca, ortaq iqtisadi layihələrin reallaşması çətin olacaq.
Məhəmmədəli QƏRİBLİ
