İranın ermənipərəst "Şərq" qəzeti Ermənistanın “Ana Vətən” partiyasının sədri Artur Vantsyanın Azərbaycana qarşı Ermənistan-İran birliyinin yaradılması haqda fikirlərini dərc edib.
Bu barədə Azad İran Teleqram kanalı məlumat verib.
“Tehran-İrəvan-Moskva oxunu praktikada tətbiq etmək lazımdır". Bu sözləri Artur Vantsyan deyib. O, həmçinin “Cənubi Qafqazda və Ermənistanın İranla beynəlxalq sərhədləri yaxınlığında alovlanma davam edir. "Badkubə" hökumətinin avantürası və İranla həmsərhəd hissələri zəbt etmək üçün gərginlik yaradan tədbirləri təhlükəli mərhələyə çatıb. Rusiyanın Ukrayna böhranına başının qarışması da Moskvanın Qafqazdakı proseslərə keçmişdə olduğundan daha az müdaxilə etməsinə səbəb olub.
Ümumiyyətlə, Ermənistan və İran bu gün oxşar təhdidlərlə üz-üzədir. Ölkələrimiz yalnız təhlükəsizlik məsələlərində daha sıx əməkdaşlıq etsələr, bu problemin öhdəsindən səmərəli şəkildə gələ bilərlər”-deyə əlavə edib.
Mollalarla haylar birləşib Azərbaycana qarşı növbəti təxribat həyata keçirməyə çalışırlar və burada “Tehran-İrəvan-Moskva oxunu praktikada” tətbiq etmək istədiklərini deyirlər.
“...Düşünmürəm ki, Ermənistan və İran öz istəklərinə çatsınlar”
Mövzu ilə bağlı “Bakı-Xəbər”ə şərh verən “SƏS” qəzetinin baş redaktoru, siyasi ekspert Bəhruz Quliyev “Sirr deyil ki, İran və Ermənistan regionda sülhün və sabitliyin əldə olunmasına qarşı əllərində olan bütün imkanlarından istifadə etməyə çalışırlar və bu kimi cəhdlərində Rusiyanın da rolunun daha dərindən iştirak etməsi üçün dəridən-qabıqdan çıxırlar”-deyə bildirdi.
Onun sözlərinə görə, xüsusilə, İran KİV-lərində son vaxtlar Tehran-İrəvan-Moskva oxu ətrafında yeni siyasi konfiqurasiya yaratmaq istiqamətində aparılan müzakirələr də buna hesablanıb: “Bunun üçün isə ilk növbədə təbliğatın aparılması lazımdır ki, İrəvan və Tehran KİV-ləri qarşılıqlı olaraq bu istiqamətdə işləməyə başlayıblar. Əbəs deyil ki, adıçəkilən İran mediası dərhal erməni siyasətçidən müsahibə alıb və hadisələr elə təqdim olunub ki, guya vəziyyəti mürəkkəbləşdirən onlar deyil, Azərbaycandır. Söz yox ki, məsələ Zəngəzur dəhlizi ilə bağlıdır və burada həm İranın, həm də Ermənistanın maraqları üst-üstə düşür. Yəni hə iki ölkə bu layihənin reallaşması əleyhinədirlər. Amma Rusiya bu maraqları bölüşmür”.
Siyasi ekspert Rusiyanın Ermənistanın və İranın bu maraqlarını qəbul edəcəyini və vəziyyəti gərginləşdirə biləcəyini hesab etmir: “Vanetsyanın, yaxud erməni KİV-lərinin, ya da İran mediasının nə yazmalarından asılı olmayaraq Rusiya 2020-ci ilin noyabrında imzalanan üçtərəfli bəyanatın vasitəçisidir və orada Zəngəzur dəhlizinin açılması ilə bağlı bənddə də açıq-aydın göstərilib ki, Rusiya dəhlizin təhlükəsizliyi təminatını öz üzərinə götürür və s. Yəni bu faktdır və əgər İrəvanla Tehran hər dəfə Moskvanı bundan imtina etməyə çağıracaqlarsa, əlbəttə ki, rədd cavabı alacaqlar. Ona görə də düşünmürəm ki, Ermənistan və İran öz istəklərinə çatsınlar”.
Bəhruz Quliyev bildirib ki, Azərbycan qətiyyətlə qarşısına qoyduğu bütün məqsədlərini realizə edir və o cümlədən, sərhədlərin delimitasiyası və demarkasiyaı yönündə proseslərin başa çatması üçün fəaliyyəti davam etdirir. “Hətta Ermənistan tərəfi buna mane olmağa cəhdlər göstərsə belə göründüyü kimi, sərhəd və mövqe dəqiqləşdirmələri ilə müəyyən problemlər aradan qaldırılır və Azərbaycan Ordusu bu məqsədlərin rezlizəsi üçün daim hazır vəziyyətdərir. İranın və Ermənistanın bu addımları əlbəttə ki, avantüraçılıqdır və belə davam olunarsa nə Bakı, nə də Moskva buna imkan verməyəcək”, deyə o bildirdi.
İradə SARIYEVA
