Ekofəalların Laçın yolunda başladığı aksdiyadan keçən müddətdə ermənilər bütün dünyaya “blokada” deyib car çəkirlər, hər yerə məktub göndərir, müraciət edirlər.
Belə məktublardan biri separatçılar adından fevralda Avropa Komissiyasının Prezidenti Ursula Von der Leyenə göndərilib. Nəhayət iki ay sonra Avropa Komissiyasının prezidentindən cavab məktubu alıblar. Məktubda bunlar qeyd edilir: “Avropa İttifaqı ötən ilin dekabrından Laçın dəhlizi ətrafında baş verən hadisələrdən son dərəcə narahatdır. Biz başa düşürük ki, Laçın dəhlizi ilə hərəkətin məhdudlaşdırılması yerli əhali üçün ciddi problem və humanitar narahatlıqdır. Əmin olun ki, Avroittifaq vəziyyətin həlli üçün diplomatik səylərini səfərbər etməyə davam edir”.
Ermənilər Ursuladan daha sərt açıqlama gözləyirdilər, amma bu baş vermədi. Ən maraqlısı odur ki, Ursulanın cavabında bir kəlmə olsun “blokada” sözü işlədilməyib. Xüsusən də bu məqam ermənilərdə böyük məyusluq yaradıb.
“Ona görə də Laçın yolu ilə bağlı ermənilərin Avropa İttifaqından gözləntiləri özünü doğrultmadı”
Məsələyə münasibət bildirən siyasi ekspert Elşad Həsənovun fikrincə, bu onu göstərir ki, artıq dünyada heç kəs ermənilərin yalançı göz yaşlarına inanmır: “Çünki artıq 120 gündür bizim ekofəallar Laçın yolunda aksiya keçirirlər. Bunun nəticəsində Azərbaycanın yeraltı sərvətlərinin talanmasının qarşısı alınıb. Ancaq Laçın yolunda aksiya keçirilsə də, bu, Qarabağın blokadaya salınması demək deyil. Hər gün sülhməramlıların müşayəti ilə onlarla yük maşını ora ərzaq və digər zəruri vasitələrin daşınmasını təmin edir. Bununla yanaşı, aksiya sayəsində Laçın yolu ilə Qarabağa silah-sursat daşınmasının qarşısı alınıb. O cümlədən, ermənilərin Xankəndi-Xələfli yolu ilə Qarabağa silah daşınmasının da qarşısını ordumuz aldı. Nəticədə ermənilərin gizli yollardan istifadə etmələri ifşa edildi. Artıq o yol vasitəsilə silah daşınması mümkün deyil. Ona görə də ermənilər dekabrdan üzübəri haray-həşir salıblar ki, Laçın yolu açılsın və onlar da istədiklərini daşısınlar. Nəticədə yeni bir münaqişə ocağını yaratsınlar. Biz isə buna imkan verməyəcəyik. Avropa Komissiyası Prezidentinin məlum məktubunda “blokada” sözünün işlədilməməsi ermənilərə bir siqnaldır. Bu o deməkdir ki, Laçın yolunda vəziyyət ermənilərin iddia etdiyi kimi deyil və Avropa İttifaqı bu yalanlara ortaq olmaq istəmir. Təkcə Aİ-yə yox, eyni zamanda dünyanın digər böyük təşkilatlarına məlumdur ki, Laçın yolunda heç bir blokada yoxdur. Ermənilərin uydurduğu kimi yol bağlı deyil və zəruri olan bütün məhsullar oradan Xankəndiyə daşınır. Yolda ekofəalların aksiyası sərvətlərimizin qanunsuz talan edilməsinin və silah daşınmasının qarşısını almaq məqsədi güdür. Avropa Komissiyası istəyir ki, regionda sabitlik olsun və bölgə inkişaf etsin. Avropa Parlamentindən fərqli olaraq, Avrokomissiya erməni yalanlarına ortaq olmur. Ona görə də Laçın yolu ilə bağlı ermənilərin Avropa İttifaqından gözləntiləri özünü doğrultmadı. Hesab edirəm ki, yaxın günlərdə Laçın yolunun Ermənistanla sərhəd hissəsində nəzarət-buraxılış məntəqəsinin yaradılması qaçılmazdır. Artıq proseslər buna doğru gedir. Bu məntəqə fəaliyyətə başlayandan sonra Laçın yolunda aksiyanın keçirilməsinə ehtiyac qalmayacaq”.
Vidadi ORDAHALLI
