İran Xarici İşlər Nazirliyinin sözçüsü Nasser Kənani Bakının dörd iranlı diplomatı ölkədən qovmasından sonra Azərbaycanı qarşılıqlı hörmətə çağırıb.
O, “yaxşı qonşuluq istiqamətində hərəkət etməyə və sionistlərin və region düşmənlərinin istədiklərindən uzaq durmağa” çağırıb. Kənani Bakının hərəkətlərini tələsik, emosional və qeyri-konstruktiv adlandırıb: “Biz Azərbaycan Respublikası hökumətinin bu cür davranışını mehriban qonşuluq prinsiplərinə zidd hesab edirik”.
Kənani onu da qeyd edib ki, İsrail “müsəlmanlara hücum edib Məscid-ül-Əqsanı murdarlayarkən” İran İslam dünyasını İsrailin “cinayətkar” rejiminə qarşı durmağa çağırır.
Məlumat üçün qeyd edək ki, aprelin 6-da Azərbaycan dörd iranlını diplomat statusu ilə bir araya sığmayan hərəkətlərə görə ölkədən çıxarıb.
İran rəsmisinin bu canfəşanlığı təəccüb doğurur. Ən azından ona görə ki, Ermənistan Zəngilanda, Ağdamda məscidlərə donuz bağlayıb müqəddəs məkanları murdarlayanda İran harada idi? Niyə bununla bağlı bir dəfə olsun xəbərdarlıq etmədi? Məsələni İslam Əməkdaşlıq Təşkilatının tədbirlərində gündəmə gətirmədi?
Məsələyə münasibət bildirən siyasi şərhçi Azər Həsrət hesab edir ki, İranın məlum yanaşması ikrah doğurur: “Bizdə bir deyim var. Deyir “mollanın dediyini elə, elədiyini eləmə”. İran da həmin o molladır. Yəni, dildə bir söz deyir, əməldə başqa işlə məşğul olur. Özləri Azərbaycan torpaqlarını işğal etmiş, məscidlərimizi murdarlamış, ora inak, donuz bağlayan ermənilərlə can bir olublar. Özü də bunu bizim gözümüzün qarşısında edirlər. O tərəfdən də Azərbaycanı sionistlərlə bir olmaqda, hansısa düşmən qüvvələrlə bir olmaqda ittiham edirlər. Ermənilər vandalcasına məscidləri, müqəddəs məkanları dağıdanda, murdarlayanda niyə bunu görmürdünüz? Yəni, nə qədər həyasız olmalısan ki, bütün dünyanın gördüyü bir gerçəyi danıb öz adını özgəyə qoyasan. Azərbaycanın İsraillə münasibətlər qurması, bu, bizim dövlətimizin suveren hüquqlarıdır. Heç bir başqa dövlətdən, o cümlədən İrandan bunun üçün icazə alası deyilik. Yaxud da ki, bizim İsraillə münasibət qurmağımız, səfirlik açmağımız hansısa üçüncü dövlətə qarşı addım deyil. Bu, ikitərəfli münasibətlər üçündür. İndi İran hesab edir ki, öz kirli burnunu bizim bütün işlərimizə soxmaq ixtiyarı var. Ona görə də bütün bunlar molla rejiminin həyasızlığının son həddidir. Bu baxımdan hesab edirəm ki, İran rəsmiləri, diplomatları bizə dil uzatmaq əvəzinə, gedib diplomatiyanı, dövlət idarəetməsini, qonşularla necə münasibətlər qurmasını öyrənsinlər. Bu gün İranı idarə edənlərin ümumiyyətlə, dövlət anlayışı yoxdur. Bu adamlar, çox təsadüfü adamlardır. Nə daxildə ölkəni idarə edə bilmirlər, nə də xarici əlaqələri normal qura bilmirlər. Az qala bütün dünya ilə düşməndir bu dövlət. Nəyin hesabına? Onun hesabına ki, idarəetməni və diplomatiyanı, beynəlxalq münasibətləri bilmirlər. Qonşuluq münasibətlərini öyrənməyiblər. İndi bunların durub Azərbaycana ağıl öyrətməsi, ölkəmizi emosianal, tələsik davranmaqda ittiham etməsi gülüncdür. Biz onların diplomatlarını sağ-salamat bütün normalar çərçivəsində ölkələrinə göndərdik. Onların burnu belə əzilmədi, kimsə onlara zorakılıq tətbiq etmədi. Bütün beynəlxalq konvensiyalar, ikitərəfli sazişlər ümumiyyətlə, dünyada qəbul edilmiş diplomatik normalar gözlənilməklə İran diplomatlarını ölkələrinə göndərdik. Əlimizdə də yetərincə dəlillər var ki, onları arzuolunmaz şəxs elan edək. Ancaq İran nə etdi? Bir nəfərin əlinə avtomat verərək bizim səfirliyimizin üzərinə göndərdi. Səfirliyi gülləbaran etdi. Bir insanımızı öldürdünüz, ikisini yaraladınız. İndi İran utanmadan bizə ağıl öyrədir. Ona görə də gedin öncə normal qonşu münasibətlərin fəlsəfəsini, başqa dövlətlərin daxili işinə müdaxilə etməməyi öyrənin. Ondan sonra gəlib bizə ağıl verərsiniz”.
Vidadi ORDAHALLI
