Ermənistan parlamentinin xarici əlaqələr daimi komissiyasının sədri Sarqis Xandanyan KTMT missiyasının sərhəddə yerləşdirilməsinə münasibət bildirib.
O, qeyd edib ki, Rəsmi İrəvanın mövqeyi və istəkləri nəzərə alındıqda KTMT missiyasının yerləşdirilməsi barədə danışmaq mümkün olacaq: “Ermənistan heç vaxt Ermənistanda KTMT-nin müşahidə missiyasını yerləşdirməkdən imtina etməyib, fakt odur ki, bu missiyanın yerləşdirilməli olduğu sənədə hələ də əlavələr edilir. Ermənistan KTMT-nin müşahidə missiyasını heç vaxt tərk etməyib, sadəcə olaraq belə bir missiyanın olması lazım olan sənəd hələ də yenilənmə mərhələsindədir. Bizim üçün vacib olan Ermənistan Respublikasının suveren ərazisi ilə bağlı faktiki baş verənləri, fikrimizcə, obyektiv təqdim etməliyik. Təbii ki, bu məqamları qəbul etmədən, vəziyyəti ətraflı qiymətləndirmədən missiyanın necə olması və bu missiyanın hansı regionda həyata keçirilməsini təsəvvür etmək çətin olacaq. Ermənistan rəsmi İrəvanın mövqelərini və istəklərini qane edən layihənin təqdim edildiyini görəndə, o zaman KTMT missiyasının yerləşdirilməsi barədə danışmaq mümkün olacaq”.
Bunlar hələ də KTMT-yə meydan oxuyur ki, Ermənistanın ərazisinə Azərbaycanın “təcavüzünü” etiraf edin. Halbuki, Rusiya rəsmi bəyan etmişdi ki, KTMT qüvvələrini istənilən vaxt göndərməyə hazırıq.
“Hesab edirəm ki, nə Kreml, nə də KTMT buna getməyəcək”
Məsələyə münasibət bildirən hərbi ekspert İbrahim Rüstəmli hesab edir ki, Ermənistan Rusiyanı şantaj edir: “Onsuz da Avropa İttifaqının missiyası sərhəddə fəaliyyət göstərir. Paşinyan istəmir ki, KTMT qüvvələri sərhəddə gəlsin. Ermənilərin məqsədi odur ki, KTMT Azərbaycanı “təcavüzkar” tərəf kimi tanısın. Buna da təşkilat getməyəcək. Birincisi, Azərbaycan Ermənistan ərazisinə daxil olmayıb. İkincisi, orada təmsil olunan dövlətlər Azərbaycanla çox yaxın əlaqələrə malikdilər. Üçüncüsü, Azərbaycan və Ermənistan sərhəddi delimitasiya olunmayıb. Belə olan halda hansı təcavüzdən söhbət gedə bilər? Düzdür, ötən həftə KTMT-nin toplantısında Ermənistana KTMT missiyasının göndərilməsi ilə bağlı fikirlər səsləndi. Ermənistanın təhlükəsizliyi naminə KTMT-nin belə bir addıma hazır olduğu bəyan edildi. İclasdan sonra mətbuat nümayəndələri üçün keçirilən görüşdə qurumun nümayəndəsi hərbi birliyin Ermənistanın təhlükəsizliyi naminə bölgəyə hərbi missiya göndərməyə hazır olduqlarını və bu missiyanın əsas məqsədinin Azərbaycanla Ermənistan sərhədinə yerləşməklə Ermənistanın təhlükəsizliyinin təmin olunmasına xidmət edəcəyini bəyan etdilər. Ancaq bütün bunlar o demək deyil ki, hər şey Ermənistanın istəyinə uyğun olacaq. Ermənistanın göstərdiyi ərazilərdə KTMT qüvvələri yerləşəcək. Əlbəttə ki, bunun belə olacağını düşünmürəm. Nəzərə almaq lazımdır ki, sərhədin əks tərəfi Azərbaycandır və ölkəmizlə əməkdaşlıq etmədən bu sərhəddə baş verə biləcək hadisələrin monitorinqinin və nəzarətinin həyata keçirilməsi, hesabatların hazırlanması qeyri-mümkündür. Ancaq biz görürük ki, belə açıqlamalarla Ermənistan rəsmiləri Rusiyanı şantaj edirlər. Bu, o deməkdir ki, Paşinyan hakimiyyətinin istəkləri nəzərə alınarsa, KTMT-nin sərhəddə yerləşdirilməsinə icazə veriləcək. Hesab edirəm ki, nə Kreml, nə də KTMT buna getməyəcək”.
Vidadi ORDAHALLI
